काठमाडौं- नेपाली सेना र अमेरिकाको इन्डो-प्यासिफिक सेनाबीच मुस्ताङको जोमसोममा संयुक्त सैन्य अभ्यास सञ्चालन भई रहेको नेपाली सेनाले जानकारी दिएको छ। अमेरिकी सरकारले अख्तियार गरेको ‘इन्डो-प्यासिफिक’ रणनीतिमा नेपालको महत्वपूर्ण स्थान रहेको बताइदै गर्दा दुइपक्षीय सैन्य अभ्यास सञ्चालन भएको हो।
नेपाली सेनाका प्रवक्ता यमप्रसाद ढकालका अनुसार सैन्य अभ्यास फागुनको पहिलो हप्तासम्म सञ्चालन हुनेछ। माघको तेस्रो हप्तादेखि सुरु भएको उक्त संयुक्त सैन्य अभ्यासमा नेपाली सेना र अमेरिकाको इन्डो प्यासिफिक कमन्ड गरी ४८ जना सहभागी छन्।
विगत १५ वर्षदेखि सञ्चालन भएको सैन्य अभ्यास निरन्तरको अर्को अध्याय रहेको उनले दाबी गरेका छन्। 'सैन्य अभ्यासमा नेपाली सेनाको महावीर रेञ्जर रेजिमेन्ट र हिमाली युद्धकला विद्यालय र अमेरिकाको इन्डो प्यासिफिक कमान्डको सहभागिता छ।
सैन्य अभ्यासमा हिमाली क्षेत्रमा हुने आपत्कालीन उद्धारलगायतका विषयमा अभ्यास केन्द्रित रहने नेपाली सेनाले जानकारी दिएको छ।
यसै विषयमा नेपालीस्थित अमेरिकी दूतावासले पनि संयुक्त सैन्य अभ्यासको विषय पुष्टि गरेको छ। समय र स्थानको पूर्ण विवरण विना दूतावासले सैन्य अभ्यास सम्बन्धि सूचना दिएको हो।
नेपालको उत्तरी भेगमा अमेरिकी चासो नेपालसँगको दौत्य सम्बन्ध स्थापना गरेदेखिकै हो। तर, पछिल्लो समय चीनको आर्थिक उन्नयनसँगै अमेरिकाको चासो नेपालमा फेरी बढ्न थालेको विश्लेषणका बीच अमेरिकाको इन्डो-प्यासिफिक क्षेत्र हेर्ने सेनाको गतिविधि नेपालमा बढ्न थालेको छ।
गत पुस २६ गते इन्डो-प्यासिफिक कमान्डका सेना प्रमुख एडमिरल फिलिपले दुई दिने नेपाल भ्रमण गरेका थिए। फिलिपको नेपाल भ्रमणलाई पुस ३ गते भएको परराष्ट्रमन्त्री प्रदीप ज्ञवाली र अमेरिकी समकक्षी माइक पोम्पेओसँगको भेटमा नेपाललाई इन्डो-प्यासिफिक रणनीतिमा सहभागी गराउने प्रयासका रुपमा नै व्याख्या गरिएको थियो।
नेपालको राजनीतिक मामिलाभन्दा सैन्य मामिलामा अमेरिकाको चासो बढी रहेको विश्लेषण पनि हुने गरेको छ।
गत भदौमा काठमाडौंको एक होटेलमा नेपाली सेनासहित अमेरिकाको इन्डो-प्यासिफिक सेनालगायत २० देशका सेनाले विशेष प्रशिक्षण लिएका थिए।
सबै तस्बिरः नेपालस्थित अमेरिकी दूतावास
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।