काठमाडौं- साँघुरो बाटो र मुलुकभर बढ्दो सवारी साधनका कारण देशभर १० हजार ६८० दुर्घटना भएका छन्।
प्रहरी प्रधान कार्यालयका अनुसार चालू आर्थिक वर्षको ६ महिनामा मुलुकभर उक्त सङ्ख्यामा सवारी दुर्घटना भएको हो। दुर्घटना भएका सवारी साधनमध्ये सबैभन्दा धेरै मोटरसाइकल छन्।
मोटरसाइकल ४ हजार २३०, जिप कार २ हजार ९५२, बस १ हजार २४४, ट्रक ट्याङ्कर ९८८, टिपर २५१, टेम्पो १७१ र अन्य ५१ सवारी दुर्घटना भएका छन्।
प्रहरी प्रवक्ता उत्तमराज सुवेदीले चालकको लापरवाहीका कारण धेरै दुर्घटना हुने गरेको बताए। साँघुरो बाटो, तीव्र गति र कमजोर पूर्वाधारका कारण बढी दुर्घटना भएको उनको भनाइ छ।
प्रहरीले दुर्घटना घटाउनका लागि ट्राफिक सचेतनामूलक कक्षा सञ्चालन गर्नुका साथै पर्चा, पम्प्लेट, ब्रोसरबाट जानकारीमूलक सन्देश चालक, सहचालक र पैदलयात्रुलाई प्रदान गर्दै आएको छ।
प्रदेश–१ मा ९२४, प्रदेश–२ मा ६६८, प्रदेश–३ मा ५३३, गण्डकी प्रदेश ३४१, प्रदेश–५ मा ७४६, कर्णाली प्रदेश ७८ र सुदूरपश्चिम प्रदेशमा १३० सवारी साधन दुर्घटना भएका छन्।
यसैगरी दुर्घटना न्यूनीकरण गर्न गृहमन्त्री रामबहादुर थापाले गृहमन्त्रालयबाट जारी भएको ८२ बुँदे गृहप्रशासन सुधार योजना र प्रहरी महानिरीक्षक सर्वेन्द्र खनालको १० बुँदे प्राथमिकताका आधारमा सातै प्रदेशमा रि–फेसिङ सेन्टर (आरामस्थल) स्थापना गरिएको छ। उक्त आरामस्थलमा चालक, सहचालक र पैदलयात्रुलाई आराम गर्नुका साथै ट्राफिक जनचेतनामूलक कक्षासमेत सञ्चालन गरिएको छ।
उपत्यकामा धेरै दुर्घटना, कर्णाली प्रदेशमा कम
सवारी दुर्घटना भएकामध्ये सवैभन्दा धेरै काठमाडौँ उपत्यकामा भएको छ। महानगरीय ट्राफिक प्रहरी महाशाखाका अनुसार काठमाडौँ उपत्यकामा मात्र सात हजार २६० दुर्घटना भएका छन्।
प्रदेश–१ मा ९२४, प्रदेश–२ मा ६६८, प्रदेश–३ मा ५३३, गण्डकी प्रदेश ३४१, प्रदेश–५ मा ७४६, कर्णाली प्रदेश ७८ र सुदूरपश्चिम प्रदेशमा १३० सवारी साधन दुर्घटना भएका छन्।
महाशाखाका प्रमुख एवं प्रहरी वरिष्ठ उपरीक्षक वसन्त पन्तले साँघुरो बाटो र अत्यधिक सवारी साधन भएका कारण बढी दुर्घटना हने गरेको बताए। 'चालकको लापरबाही र सवारी नियम नमान्दा बढी दुर्घटना भएको हो,' उनले भने।
एक हजार ४१३ जनाको मृत्यु
चालू आर्थिक वर्षको ६ महिनामा सवारी दुर्घटनामा परी एक हजार ४१३ जनाको मृत्यु भएको छ।
यस्तै २ हजार १५३ व्यक्ति गम्भीर घाइते भएका छन्।
'सवारीको तीव्रगति कम गरेर निर्धारित गतिमा सवारीसाधन चलाउने र सडक लेन तथा सवारी नियम मात्रै पालना गर्ने हो भने ५० प्रतिशत दुर्घटना कम हुन्छ।'
लामो समयदेखि महानगरीय ट्राफिक कार्यालयमा कार्यरत पूर्वप्रहरी उपरीक्षक जगतमान श्रेष्ठले ९० प्रतिशतभन्दा बढी दुर्घटना मानवीय कारणले हुने गरेको बताए।
यातायात व्यवस्था विभागका अनुसार हाल देशभर ३२ लाख सवारी साधन सञ्चालनमा छन्। तीमध्ये झण्डै नौ लाख सवारी साधन काठमाडौँ उपत्यकामा सञ्चालित छन्।
८४ प्रतिशत दुर्घटना सवारी चालकको लापरबाहीबाट
महानगरीय ट्राफिक प्रहरी महाशाखा प्रमुख वसन्तकुमार पन्तले ८४ प्रतिशत दुर्घटना सवारी चालकको लापरवाहीका कारण हुने गरेको बताएका छन्।
भक्तपुर ट्रक व्यवसायी सङ्घको १९औं वार्षिक साधारणसभा तथा सातौँ अधिवेशनको उद्घाटन कार्यक्रममा शुक्रबार बोल्दै उनले ठूला चारपाङ्ग्रे र दुई पाङ्ग्रे सवारीसाधनको लापरबाहीका कारण दुर्घटना हुने गरेको बताए। 'सवारीको तीव्रगति कम गरेर निर्धारित गतिमा सवारीसाधन चलाउने र सडक लेन तथा सवारी नियम मात्रै पालना गर्ने हो भने ५० प्रतिशत दुर्घटना कम हुन्छ,' उनले भने। ट्राफिक नियम पालना नगर्ने चालक पर्फेक्ट चालक होइनन् भन्दै उनले चालकको लापरबाहीकै कारण कहालीलाग्दो अवस्थाको दुर्घटना हुने गरेको बताए।
महाशाखा प्रमुख पन्तले विश्वमा आधुनिक प्रविधिको व्यवस्था भए पनि नेपालमा हातकै भरमा ट्राफिक व्यवस्थापन गर्नुपर्ने बाध्यता रहेको चर्चा गर्दै दैनिक १२ लाख सवारीसाधन गुड्ने यहाँका सडकमा सडकको वैकल्पिक व्यवस्था नभएसम्म ट्राफिक जामलाई घटाउन मुस्किल हुने भनाइ राखे।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1764146706.png)
