काठमाडौं– कञ्चनपुरकी १३ वर्षीया बालिका निर्मला पन्तको बलात्कारपछि हत्या प्रकरणमा प्रहरीले सुरुवाती चरणदेखि नै गल्ती गरेको राष्ट्रिय मानव अधिकार आयोगले औंल्याएको छ।
आयोगको टोलीले आइतबार सरकारलाई बुझाएको प्रतिवेदनमा शवको मुचुल्कामै कमजोरी गरेको औंल्याएको हो। शरीरमा भएको चोटपटकहरूको अभिलेखिकरण नगरिएको, कडापन र हाइपोस्टयासिस तथा छालाको रङ समेत नखुलाइएको प्रतिवेदनमा उल्लेख छ।
फोटोमा हेर्दा घाँटी, दुवै पाखुरा, दुवै तिघ्रा, पेटको भाग तथा खुट्टासमेत चोट देखिएको तर सो कुरा मुचुल्कामा नखुलाएर मुचुल्कामै कमजोरी गरेको उल्लेख गरिएको छ।
कपडाको विस्तृत व्याख्या नगरिएको, च्यातिएको, घस्रिएको केही लागेको कुराहरु केही उल्लेख नगरेकाले मुचुल्कामा समेत प्रहरीले कमजोरी गरेको आयोगको प्रतिवेदनमा उल्लेख छ।
शव परीक्षण प्रतिवेदनमा मृत्युको कारण हातले घाँटी अठ्याएर भनेर निर्क्योल निकालिएको छ तर त्यसका लागि पुष्टि गर्न चाहिने पर्याप्त आधार र फोटाहरु नभएकाले मुचुल्कामै कमजोरी भएको निष्कर्ष आयोगको छ।
त्यस्तै प्रहरी अधिकारी घटनाप्रतिसंवेदनशील नभएको, अनुसन्धानमा खटिएका व्यक्तिले घटनास्थललाई गम्भीर रुपमा नलिएको, घटनास्थलको छुट्टा छुट्टै मुचुल्का खडा नगरिएको, स्वच्छ सुनुवाइलाई अनुसन्धानको आधारस्तम्भको रुपमा नलिएको, लास जाँच मुचुल्काको सामान्य सिद्धान्तप्रति प्रहरी अधिकारी सजग र गम्भीर नभएको आयोगले औंल्याएको छ।
त्यस्तै,अनुसन्धानको क्रममा पक्राउ परेकाहरुलाई शारीरिक र मानसिक यातना दिइएको, सोको अफिसरले प्रमाणलाई संकलन गर्न नसकेको, शव परीक्षण हुँदा अनुसन्धानकर्ता उपस्थित नभएको, घटनास्थललाई घेराबन्दी नगरिएको लगायत दजर्नौं गल्ती आयोगले औंल्याएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749627050.jpg)
-1749627522.jpg)
