काठमाडाैं- नेपाली कांग्रेसले भातृ संगठनहरुलाई आइतबारदेखि सडकमा उतारेको छ। शुक्रबार संसदबाट चिकित्सा विधेयक पारित भएसँगै साेकाे विराेधमा कांग्रेसले भातृ संगठनहरुलाई सडकमा उतार्ने निर्णय गरेको हो।
आज मध्यान्ह १२ः३० बजे माइतीघरमा संयुक्त रुपमा विरोध प्रदर्शन गर्ने कांग्रेस भातृ संगठनहरुले जनाएका छन्। विरोध प्रदर्शन नेपाल विद्यार्थी संघ, तरुण दल र महिला संघले संयुक्त रुपमा गर्न लागेका हुन्।
यसअघि आइतबार बिहान नेविसंघले उपत्यकाका विभिन्न्न क्याम्पस अघि विरोध प्रदर्शन गरेको छ। आन्दोलनरत विद्यार्थीहरुले प्रधानमन्त्री केपी शर्मा ओलीकाे पुत्लासमेत दहन गरे।
वरिष्ठ चिकित्सक गोविन्द केसीको माग विपरित ‘राष्ट्रिय चिकित्सा शिक्षा विधेयक’ सरकारले प्रतिनिधिसभाबाट पारित गरेपछि झनै आक्रोशित भएको नेपाल विद्यार्थी संघले त्यसको विरोधमा आइतबार बिहान काठमाडौंको चावहिलस्थित पशुपति बहुमुखी क्याम्पस अगाडि सरकारविरुद्ध चर्का नाराबाजी लगाउँदै प्रधानमन्त्री ओलीको पुत्ला दहन गरेको हाे।
त्यस क्रममा उनीहरुले गोविन्द केसीको माग सम्बोधन गर्न तथा निर्मला पन्तको हत्यारालाई पक्राउ गरी कारबाही गर्न नसकेको भन्दै सरकारको चर्को आलोचना गरेका थिए।
गत शुक्रबार नेपाली कांग्रेसको अवरोधका बीच प्रतिनिधिसभाबाट राष्ट्रिय चिकित्सा शिक्षा विधेयक पारित भएपछि त्यसको विरोध गर्दै नेविसंघले सडक संघर्षलाई तीव्रता दिएको हो। सरकारले जनताको मागलाई सुनुवाइ नगरेकाले आफूहरु सरकारविरुद्ध आन्दोलनमा जानु परेको नेविसंघको तर्क छ।
नेविसंघको पशुपति बहुमुखी क्याम्पस इकाई समितिको आह्वानमा आयोजना गरिएको विरोध प्रदर्शनका कारण चावहिल क्षेत्रको सवारी आवागमनसमेत केहीबेर अवरुद्ध भएको थियो।
त्यस्तै, काठमाडाैंका ग्रामिण तथा एनआर कलेज अगाडि विरोध गर्ने क्रममा प्रहरीले नेविसंघका पवन थापा, सन्तोष गुरुङ, किरण भट्टराई, सुशान्त सिटौला,परोपकार अधिकारी, सुवास अधिकारी, सन्ताेष अधिकारीलगायतलाई नियन्त्रणमा लिएको विद्यार्थी नेता निरञ्जन थापाले जानकारी गराए।
त्रिचन्द्र क्याम्पसअघि पनि बिहान प्रदर्शन भएको थियो।
डा केसीका माग सुनुवाई, कांग्रेस पूर्व सभापतिद्धयका नाममा रहेका अस्पतालकाे खारेजी फिर्ता, पारित चिकित्सा शिक्षा विधेयकको विरोधस्वरुप प्रदर्शन गरिने महिला संघकी अध्यक्ष उमा रेग्मीले जानकारी गराइन्।
यता तरुण दलले सरकारका विरुद्ध देशव्यापी प्रर्दशन गरिरहेको छ। गत माघ ८ गतेदेखि जारी तरुण दलको विरोध प्रदर्शन सोमबार धनगढीमा टुंगिने बताइएको छ।
आइतबार बस्ने कांग्रेसकाे केन्द्रीय कार्यसमिति बैठकले देशभर विरोध प्रदर्शन गर्ने कार्यक्रम सार्वजनिक गर्ने छ।
नेविसंघले उपत्यकामा गरेकाे विराेध प्रदर्शनका अन्य तस्बिरहरु:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771492980.png)
-1764146706.png)
