काठमाडौं– मौसममा आएको बदलीसँगै देशभरका उच्च पहाडी तथा हिमाली क्षेत्रमा हिमपात तथा अन्य क्षेत्रमा वर्षा भइरहेको छ। जल तथा मौसम पूर्वानुमान महाशाखाका अनुसार पश्चिमी वायुको प्रभावले मौसममा बदली आएको हो।
मौसममा बदली आएपनि हिमपातका कारण देशका विभिन्न क्षेत्रमा हिउँ खेल्न जाने आन्तरिक पर्यटकको संख्यामा भने वृद्धि भएको छ। काठमाडौंबाट केही घन्टाको दूरीमै पुग्न सकिने चन्द्रगीरि तथा फूलचोकी तथा कालिन्चोकलगायत क्षेत्रमा हिउँ खेल्न जानेको घुइँचो लागेकाे छ। सेताम्मे देखिएका डाँडा र वरपरको वातावरणमा मनोरन्जनका लागि पर्यटकहरु पुग्ने गरेका हुन्।
कालिन्चोकमा पनि केही दिनदेखि हिउँ परेपछि आन्तरिक पर्यटकको चाप बढेको छ। हिउँ खेल्नेको संख्या बढेसँगै कालिन्चोकका कुरी, चरिकोट लगायत स्थानका होटल तथा लज भरिभराउ छन्। हिउँ परेकाले नै यस क्षेत्रमा विभिन्न विद्यालय तथा कलेजहरुले समेत विद्यार्थीहरुलाई भ्रमण गराउन लगेका छन्।
हिमपातसँगै वर्षा पनि भएकोले सडकमा सवारीसाधनहरु बिग्रिएका पनि देखिन्थे। कतिपय हिउँमा फसेका मोटरसाइकलहरु धकेल्नमा व्यस्त थिए। पार्किङ गरिएका सवारी साधनमा हिउँले नै सुरक्षा दिइरहेको जस्तो लाग्थ्यो। सवारी साधनका नत प्रष्टसँग नम्बर प्लेट देखिन्थ्यो, नत ब्रान्ड नै।
हिउँ खेल्न जानेको भिडका कारण काठमाडौं चरिकोट खन्डको सडकमा सवारी चापसमेत बढेको छ। सोही कारण ठाउँठाउँमा सवारी जामसमेत भइरहेकाे ट्राफिक प्रहरीले जनाएकाे छ।
कालिन्चोक पुग्दा हिउँमा खेलिरहेको र रमाइरहेको दृश्य मनमोहक देखिन्थ्यो। कतिपय हिउँलाई तन्ना बनाएर सुतिरहेका भेटिन्थे भने कतिपय हिउँलाई नै आहारा बनाइरहेका देखिए। सडक किनारमा हिउँबाट मानव आकृति बनाएर टाेपी, चस्मा तथा गलबन्दी लगाइदिएर राखिदिएको भेटिन्थ्यो। यस्ता स्थानमा त्यस्ता मानव आकृतिसँग फोटो खिचाउनेको भिड पनि उत्तिकै थियो।
हिउँले कला भरेको कालिन्चोकको अर्को विशेष पक्ष भनेको हिउँ खेल्नेहरुको सेल्फी थियो। फरक–फरक अन्दाज र 'पोज'मा सेल्फी लिइरहेका व्यक्तिहरु देख्दा लाग्थ्यो उनीहरु कुनै स्वर्गीय आनन्द लिइरहेका छन्। हिउँसँगै लडिबुडी खेल्दै सेल्फी लिइरहेका एक युवाले भने, ‘सेल्फी होइन, ‘हिउँफी’ लिइरहेको हो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791781329.png)
-1791779517.png)
-1791778269.png)
-1791777931.png)
-1786602170.png)
