काठमाडौं– उही मागका लागि वरिष्ठ चिकित्सक डा गोविन्द केसी १६औँ अनसनमा छन्।
इलाममा १६औँ अनसनमा बसेको डा. केसीको अवस्था नाजुक भएपछि उनलाई सेनाको हेलिकप्टरमार्फत शुक्रबार बिहान काठमाडौं ल्याइयो।
प्रतिनिधिसभाअन्तर्गत शिक्षा तथा स्वास्थ्य समितिले उनीसँगको सम्झौताविपरीत विधेयक पारित गरेपछि पुन: अनसन बसे। तर, १०औँ दिन पुगिसक्दा पनि अनसन टुंगिने छाँट देखिएको छैन।
आफ्नो स्वास्थ्य अवस्था नाजुक भइरहँदा पनि डा. केसीले आफ्नो मागबाट पछि हट्ने छनक देखाएका छैनन्। सरकार पनि त्यसप्रति त्यति संवेदनशील बनेको पाइएको छैन।
सत्तारुढ दल नेपाल कम्युनिष्ट पार्टीका नेता योगेश भट्टराई लगायतका नेताहरू डा केसीको अनसनप्रति निकै आक्रामक देखिएका छन्। अन्तिम आशा गरिएका प्रधानमन्त्री केपी शर्मा ओली पनि डा केसीसँग भएका सहमतिअनुसार नै विधयेक ल्याउने कुरामा अहिलेसम्म सकरात्मक देखिएका छैनन्।
शुक्रबार सांसदसँगको प्रश्नोत्तरमा पनि डा. केसीबारे उठेको प्रश्नमा सरकार संसदको सर्वाभौमिकताविरुद्ध नजाने भन्दै उम्किए। ‘खास जनताको सत्ता प्रयोग गर्ने संसद यसको सार्वभौकिताको प्रश्न हो,’ उनको जवाफ थियो, ‘संसदको सर्वोच्चताको हैसियतप्रति, विधेयक निर्माणप्रति म नतमस्तक छु।’
तर, चरम निराशाकाबीच पनि डा. केसी र सरकारबीच मिल्ने/मिलाउने कुरामा भेटघाट र परामर्श भइरहेका छन्।
त्यस्ता भेटघाट र परामर्शको पहलकदमी लिने नेतामा पर्छन् नेकपा प्रवक्तासमेत रहेका नारायणकाजी श्रेष्ठ। पार्टी डा. केसीको अनसनप्रति असहिष्णु देखिए पनि उनी निरन्तर रुपमा दुई पक्षबीच समन्वय गरेर मिलाउने प्रयासमा लागिरहेका छन्।
अन्तिममा नरायणकाजीकै भर
इलाममा गएर अनसन बसेका डा केसीको अवस्था नाजुक भएको खबर आएपछि पूर्वप्रधानन्यायाधीश सुशीला कार्की, प्रा केदारभक्त माथेमा, पूर्वसभामुख दमननाथ ढुंगाना र वरिष्ठ अधिवक्ता सुरेन्द्र भण्डारी डा. अभिषेकराज सिंहसँग इलाम जाने सुरसार कसे।
डा. सिंह लामो समयदेखि डा. केसीको अनसन सहयोगीका रुपमा काम गरिरेहका छन्।
बिहीबार काठमाडौंबाट ११ बजे नै इलाम जाने योजना भए पनि जहाज भने तीन बजे मात्रै उड्यो। ‘फ्लाइट डिले’ भइसककाले डा. केसी अनसनरत इलामको फुलगाँछी पुग्दा साँझको ६ बजिसकेको थियो।
धरानबाट गएको विशेषज्ञ चिकित्सकको समूहले डाक्टर केसीको अवस्था नाजुक भएको बुधबार नै बताइसकेको थियो।
धरानबाट गएको मेडिकल टिमलाई नेतृत्व गरेका डाक्टर डा. अभिषेकले उपचाररत टिमसँग डा केसीको स्वास्थ्यबारेमा ‘डिटेल’ लिए। केसीको नाजुक अवस्था त्यस ब्रिफिङबाट नै उनले बुझिहाले। त्यसपछि जति सक्यो चाँडो केसीलाई काठमाडौं ट्रान्सफर गर्ने मत डा. सिंह र काठमाडौंबाट गएका नागरिक अगुवाहरूबीच बन्यो। तर, त्यसका लागि डा. केसी काठमाडौं आउन तयार हुनुपर्थ्यो।
अर्धचेत अवस्थामा रहेका केसीलाई पहिले डा सिंहले भेटे। उनले केसीलाई आफूसँग पूर्वप्रधानन्यायाधीश शुशिला कार्की, प्रा केदारभक्त माथेमा, पूर्वसभामुख दमननाथ ढुंगाना र वरिष्ठ अधिवक्ता सुरेन्द्र भण्डारी भेट्न आएको कुरा राखे।
उनले डा. केसीलाई स्वाथ्य स्थिति निकै नाजुक भइरहेको भन्दै काठमाडौं सिफ्ट हुुनुपर्ने र त्यसमा नाइनास्ती गर्न नपाइने आग्रह गरे।
१० मिनेट डा. सिंहको जतिको एकहोरो संवादमा केसीले कुनै प्रतिक्रिया दिएनन्। यसलाई डा. केसी काठमाडौं आउन तयार भएका रुपमा बुझियो।
त्यसपछि पूर्वप्रधानन्यायाधीश कार्की लगायतको नागरिक अुगुवाको समूहले भित्र गएर डा. केसीसँग भेटघाट गरे। त्यति बेलासम्म रातको साढे आठ बजिसकेको थियो।
इलामका प्रमुख जिल्ला अधिकारी श्रवणकुमार तिमिल्सिनाले दिउँसोेदेखि नै केसीलाई काठमाडौं ल्याउनका लागि हेलिकप्टरको व्यवस्था गर्न प्रयास गरिरहेका थिए। तर, मिलिरहेको अवस्था थिएन।
त्यसपछि पूर्वप्रधानन्यायाधीश कार्कीले रक्षामन्त्री आफ्नो छिमेकी पनि भएकाले हेलिकप्टरको व्यवस्था गर्छन् कि भनेर फोन लगाइन्। तर, मन्त्रीको फोन उठेन
त्यसपछि के गर्ने सकिन्छ भनेर छलफल भयो। विगतमा नेकपा नेता नारायणकाजीसँग डा. सिंहको संवाद भएको थियो र उनीहरूबीच राम्रै चिनजान थियो। त्यसैलाई प्रयोग गरेर सिंहले श्रेष्ठलाई फोन लगाए।
एक दुई घन्टीमै फोन उठ्यो। डा. केसीको अवस्थाका बारेमा सबै कुरा बताएपछि श्रेष्ठले आर्मीसँग कुरा गरेर हेलिकप्टर मिलाइदिने आश्वासन दिए।
प्रधानमन्त्री ओली, अर्का अध्यक्ष प्रचण्ड र नेपाली सेनाका प्रधान सेनापतिसँग कुरा गरेपछि श्रेष्ठले १० मिनेटमै फेरि डा. सिंहलाई फोन गरे। फोनमा उनले सेनाको नाइटभिजन पठाइदिन लागेको बताए र सेनाका जर्नेल जोतिन्द्र महतको नम्बर पठाइदिए।
यसबारे बुझ्दा नेता श्रेष्ठले डा केसीको अवस्था नाजुक भएपछि काठमाडौंमा ल्याएर उपचार गर्नका लागि समन्वय गरेको छाटो प्रतिक्रिया दिए। ‘उहाँको स्थिति नाजुक छ भन्ने रिपोर्ट आएपछि समन्वय गरेर उपचारका लागि काठमाडौं ल्याउने व्यवस्था गरेको हुँ,’ उनले नेपाल लाइभसँग भने।
महतसँग डा सिंहको सिधा कुरा भयो। झापाको भद्रपुरमा हेलिकप्टर आउने कुरा भएपछि डा केसीलाई इलामबाट राति नै एम्बुलेन्समा राखेर भ्रदपुर विमानस्थल लगियो।
डा केसी भद्रपुर पुग्नुभन्दा एक घण्टा अगावै सेनाको हेलिकप्टर भद्रपुरमा ल्याण्ड भइसकेको थियो। राति करिब दुई बजे केसीलाई भद्रपुरबाट सेनाको हेलिप्टरमा काठमाडौं ल्याइयो।
डा केसी काठमाडौं अवतरण गर्नु केही बेरअघि सेनाको हेलिकप्टरमा।
शुक्रबार बिहान तीन बजे काठमाडौं विमानस्थल आइपुगेका डा. केसीलाई सिधै त्रिवि शिक्षण अस्पताल महाराजगञ्जको आइसियूमा लगियो।
शुक्रबार पनि खटे श्रेष्ठ
नेकपा स्रोतका अनुसार डा केसीलाई काठमाडौं ल्याएपछि शुक्रबार पनि समन्वयको पहल यथावत नै राखे।
शुक्रबार दिउँसो उनले डा केसी पक्षसँग विमति भएका बुँदाहरूका बारेमा करिब दुईघण्टा जति कुराकानी गरे। डा केसी पक्षसँग गोप्य रुपमा भएको उक्त भेटपछि उनी दिउँसो पाँच बजे पार्टी अध्यक्ष प्रचण्डलाई भेट्न गए।
प्रचण्डलाई भेटेपछि उनले बेलुका नै अर्का अध्यक्ष एवम् प्रधानमन्त्री ओलीलाई भेटेर केसीको अनसन र मिल्न नसकेको बुदाँबारे छलफल गरे।
डा. केसीकै विषयले राजीनामा
चिकित्सा शिक्षा सुधारको माग गर्दै जुम्लामा १५औँ आमरण अनसन बसेका डा केसीसँग भेटघाट गरेको विषयमा पार्टीभित्र विवाद हुँदा उनले नेकपाका प्रवक्ताबाट नै राजीनामा दिनुपरेको थियो।
गत ७ साउन गतेको नेकपा सचिवालय बैठकमा केसीको माग सम्बोधन गर्ने विषयमा श्रेष्ठले भूमिका खेलेको र भेटघाटसमेत गरेको भन्दै प्रधानमन्त्री ओलीले प्रश्न उठाएपछि प्रवक्ताको जिम्मेवारीबाट राजीनमा दिएका थिए।
उनले केसीले उठाएका माग सम्बोधन गर्नुपर्ने र त्रिविका पूर्वउपकुलपति माथेमा नेतृत्वको कार्यदलले दिएको प्रतिवेदन ठीक रहेका धारणा राखेपछि प्रधानमन्त्री ओलीले प्रतिवाद गरेका थिए।
उनले पार्टीको जिम्मेवार व्यक्ति एवम् प्रवक्तासमेत भएको व्यक्तिले कुनै पनि विषयमा पार्टीको तत्कालीन पोसिजन के छ, त्यो ख्याल गर्नुपर्ने भन्दै आपत्ति जनाएपछि श्रेष्ठले प्रवक्ता पद आफूलाई नचाहिने भन्दै तत्काल राजीनामा दिएका थिए।
उनले राजीनामा दिए पनि त्यो स्वीकृत भने भएन। आवेशमा आएर राजीनामा दिएको भन्दै उनलाई पार्टीकै जिम्मेवारीमा फर्काउने पहल पार्टीभित्रबाट भयो। नेताहरूको आग्रहमा पछि उनी पुरानै जिम्मेवारीमा फर्किन तयार भए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
