काठमाडौं– बलात्कार र कर्तव्य ज्यान मुद्दाका फरार अभियुक्तलाई प्रहरीले १० वर्षपछि पक्राउ गरेको छ। जिल्ला प्रहरी कार्यालय दाङबाट खटिएको प्रहरी टोलीले तुलसीपुर उप–महानगरपालिका–१८ का ३१ वर्षीय विष्णु चौधरीलाई पक्राउ गरेको हो।
तुलसीपुर उप–महानगरपालिका–१८ स्थित एक घरमा लुकेर बसेको अवस्थामा बिहीबार प्रहरीले उनलाई पक्राउ गरेको हो। उनलाई कारबाहीका लागि कारागार पठाउने तयारी भएको प्रहरीले जनाएको छ।
यसरी घटाइएको थियो घटना
२०६५ चैत १५ गते महेन्द्र बहुमुखी क्याम्पस घोराहीमा ‘प्लस टू’मा अध्ययनरत १७ वर्षीया कल्पना खनाल आफन्तकोमा गएर तुलसीपुरबाट घोराहीतर्फ पैदल आउँदै गरेको बेला वेलझुण्डीस्थित संस्कृत विश्वविद्यालय चोकको प्रतिक्षालय नजिकबाट उनलाई नियन्त्रणमा लिइएको थियो।
त्यही ठाउँको दक्षिणमा बिजौरीस्थित टिनको घुम्तीमा लगि नसालु पदार्थ खुवाई उनीमाथि रातभर सामूहिक बलात्कार भएको थियो। सामूहिक बलात्कारका कारण विछिप्त कल्पनाको घटना भएको ८४औँ दिनमा मृत्यु भएको थियो।
बलात्कार कसुरमा सर्वोच्च अदालतले २०७१ फागुन ३० गते १ वर्ष ११ महिना २ दिन कैद र ५० हजार रुपैयाँ जरिवानाको फैसला सुनाएको थियो।
त्यसपश्चात् चौधरी फरार थिए। चौधरीमाथि संस्कृत विश्वविद्यालयका पदाधिकारी माथि आक्रमण गरेको र विश्वविद्यालयको भौतिक सम्पत्ति तोडफोड गरी चोरी गरेको घटना सम्वन्धमा समेत अनुसन्धान भइरहेको प्रहरीले जनाएको छ।
साथै, उक्त बलात्कार घटनामा संलग्न अन्य ६ जनाले सजाय भुक्तान गरिसकेका छन्। घटनामा संलग्न मोहन पुन भने अझै फरार छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।