जनकपुर– कमला नदीमा पुल र सडक निर्माणका लागि दबाब दिन हुलाकी सडक संघर्ष समितिले रिले अनसन सुरु गरेको छ।
पहिलो दिन रामबालक यादव, विनयकुमार शर्मा, मनोज पासवान र रामेश्वर यादव अनसन बसेका छन्।
यसअघि पुस १७ गतेदेखि सिराहामा बसेको २४ घण्टे रिले अनसन अझै जारीे छ।
कमला र बलान नदीमा गत २०६८ सालमै पुल निर्माणको काम सुरु गरिए पनि सात वर्ष बित्दासमेत पुल निर्माण पुरा नभएकाले सरकारलाई दबाब दिन अनसन सुरु गरिएको संघर्र्ष समितिका संयोजक रामरिझन यादवले जानकारी दिए।
कमला र बलान नदीमा अलपत्र अवस्थामा छाडिएको पुलको काम ६ महिनाभित्र सक्ने प्रतिवद्धता सरकारबाट नआएसम्म संघर्षका कार्यक्रम नरोकिने संयोजक यादवले बताए।
तराई मधेसको मेरुदण्ड मानिने हुलाकी सडकमा पर्ने कमला नदीको पुल निर्माण गर्न २०६८ साल जेठ ३१ गते शर्मा पप्पु लुम्बिनी जेभीले २८ करोड १५ लाख ९७ हजारमा ठेक्का लिएको थियो।
साढे तीन वर्षभित्र काम सम्पन्न गर्ने सम्झौता गरे पनि अहिलेसम्म काम पुरा हुन सकेको छैन।
त्यस्तै सिरहा र सप्तरीलाई जोड्ने बलान नदीमा पुल बनाउन २०६८ चैत १५ गते २४ करोड १२ लाखमा शर्मा पप्पु जेभीले ठेक्का लिए पनि अहिलेसम्म काम सम्पन्न गर्न सकेको छैन।
सो पुल निर्माणको लागि हालसम्म १५ करोड ५८ लाख भुक्तानी लिइसके पनि करिब ५० प्रतिशत पनि काम हुन नसकेको स्थानीयको गुनासो छ।
संघर्ष समितिले गत भदौ ३१ गते प्रदेश नं. २ का भौतिक पूर्वाधार मन्त्री जितेन्द्र सोनलको अगुवाइमा राजविराजबाट हुलाकी सडकमा पैदलयात्रा आरम्भ गरी असोज ७ मा जनकपुर पुगेर प्रदेश नं. २ को सरकारलाई ज्ञापनपत्र बुझाएको थियो।
निर्माणपछि जनकपुरबाट सिरहा जानलाई जम्मा २५ किलोमिटरको दूरी तय पुगिन्छ।
अहिले सिराहा जान झन्डै ६० किलोमिटरको यात्रा तय गर्नुपर्ने अवस्था छ।त्यस्तै, बलान पुल निर्माण भएपछि जनकपुरबाट हुलाकी सड़क हुँदै जम्मा ८० किलोमिटर दूरी तय गरेपछि राजविराज पुगिन्छ।
अनसन बसेकाहरूले ६ महिनाभित्र पुल निर्माण सक्न माग गरेका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
