भैरहवा– माघी पर्व तथा मकर संक्रान्तिका अवसरमा प्रदेश ५ सरकारले २ दिन सार्वजनिक बिदा दिने घोषणा गरेको छ।
माघी पर्वलाई प्रदेशको साझा पर्वको रुपमा मनाउन भन्दै सरकारले माघ १ र २ गते सार्वजनिक बिदा दिएको हो। प्रदेश सरकारका प्रवक्ता बैजनाथ चौधरीले प्रदेश ५ मा थारु समुदायको बाहुल्य रहेकोले माघी पर्व बनाउनका लागि बिदा दिइएको बताए।
यसैबीच, प्रदेश ५ का मुख्यमन्त्री शंकर पोखरेलले माघी पर्वको अवसरमा स्वदेश तथा विदेशमा रहेका नेपाली दाजुभाइ, दिदीबहिनीहरुमा सुख, शान्ति र समृद्धिको कामनासहित शुभकामना व्यक्त गरेका छन्।
मुख्यमन्त्री पोखरेलले आज एक विज्ञप्ति जारी गर्दै यस दिनलाई विविधतायुक्त नेपाली समाजमा कसैले मकर संक्रान्तिको रुपमा र कसैले माघी पर्वको रुपमा मनाउने चलन रहेको उल्लेख गरेका छन्।
‘सांस्कृतिक विविधतायुक्त नेपाली समाजमा माघी पर्वले बन्धुत्व, एकता, सद्भाव र सहिष्णुता कायम गर्न सघाउ पुर्याउँदै आएको मैले विश्वास लिएको छु’, मुख्यमन्त्री पोखरेलले विज्ञप्तिमा भनेका छन्।
यस्तै, प्रदेश ५ का सभामुख पूर्णबहादुर घर्तीले पनि एक विज्ञप्ति जारी गर्दै माघी पर्वको अवसरमा सबैमा शुभकामना दिएका छन्।
थारु समुदायले मुख्य पर्वको रुपमा माघीलाई धुमधामसँग मनाउने प्रचलन छ। मगर समुदायले पनि माघीलाई निकै महत्वका साथ मनाउँदै आएका छन्। यी दुई समुदायबाहेक अन्य समुदायले पनि मकर संक्रान्तिको रुपमा मनाउँदै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
