दुई पटक कार्यकाल थपिएको नेपाल विद्यार्थी संघले १२औं महाधिवेशन निर्धारित समयमा गर्न नसकेपछि वर्तमान समितिलाई निरन्तरता नदिने पक्षमा कांग्रेस नेताहरु पुगेका छन्। १२औं महाधिवेशन गर्नका लागि तदर्थ समिति बनाउने संकेत नेताहरुले दिएका छन्।
भदौ २ मा कार्यकाल सकिएको संघलाई कात्तिक २ सम्म पहिलोपटक तीन महिना थपिएको थियो। पहिलो पटक थपिएको समयमा महाधिवेशन हुन नसकेसँगै पार्टी केन्द्रीय समितिमा विवादका बीच माघ २ सम्मको समयावधि थपिएको थियो।
पछिल्लोपटक थपिएको अवधिमा १६ जिल्लामा अधिवेशन सकिएको थियो। अधिवेशन भएका केही जिल्लामा विवाद कायमै छ।
महाधिवेशन हुन नसकेपछि पार्टी संस्थापनको एक पक्ष र वरिष्ठ नेता रामचन्द्र पौडेल समूहका विद्यार्थीहरुमा सदस्यसहित केही पदाधिकारीले राजीनामा दिएका छन्। शुक्रबार र आइतबार दुई समूहका विद्यार्थी नेताहरुले दिएको राजीनामा संघलाई भंग गर्ने सोचले आएको थियो।
राजीनामा दिएका संस्थापन नजिकका उपाध्यक्ष पुष्पकुमार शाही दुई पटक थपिएको समयमा पनि महाधिवेशन गर्न नसक्ने वर्तमान कार्यसमितिलाई निरन्तरता दिनै नहुने बताउँछन्। ‘वर्तमान कार्यसमितिलाई जति नै समय बढाए पनि महाधिवेशन गर्नै सक्दैन,’ उनले ठोकुवा गरे।
अध्यक्ष नैनसिंह महर नजिक रहेका शाहीको बोलीसँग वरिष्ठ नेता पौडेल पक्षका विद्यार्थीहरुको मत पनि मिलेको छ। शनिबारदेखि सुरु हुनुपर्ने महाधिवेशन गर्न नसकेपछि नैतिकताका आधारमा वर्तमान कार्यसमितिले छोड्नुपर्ने केन्द्रीय सदस्य भोला नेपालले बताए। आइतबार पौडेलकहाँ पुगेर ४५ सदस्यले राजीनामा बुझाएका छन्।
पार्टी सभापतिलाई राजीनामा बुझाएका सात सहित आइतबार पौडेललाई राजीनामा दिएका गरी ५२ जना सदस्य वर्तमान कार्यसमितिलाई कार्यअवधि थप्न नहुने टुंगोमा पुगेका छन्।
वरिष्ठ नेता पौडेल पक्ष वर्तमान कार्यसमितिलाई समय बढाउने पक्षमा तीन महिना पहिले पनि थिएनन्। पौडेल पक्षले वर्तमान कार्यसमिलाई समयावधि थप्न नचाहनुको कारण संघको वर्तमान समितिमा उक्त पक्षको ‘भाइटल रोल’ नहुनु पनि थियो। संस्थापन पक्षले कात्तिकमा दुई महिना थप्ने प्रस्ताव गरेको थियो।
कांग्रेसको तेस्रो धारले दुई महिनामा महाधिवेशन गर्न सम्भव नहुने भन्दै ६ महिना थप्नुपर्ने प्रस्ताव गरेको थियो।
दुई समूहका विद्यार्थीहरुको राजीनासँगै संघको कार्यकाल बढाउन नहुने पक्षमा पार्टी नेताहरुको मत पनि थपिंदै गएको छ। त्यसको छनक आइतबार पार्टी सभापतिलाई भेट्न गएका विद्यार्थी नेताहरुसँग उनले दिएका छन्।
भेट्न गएका एक विद्यार्थी नेताले देउवाको बोली उधृत गर्दै भने, ‘तिमीहरुको विगतको गतिविधि हेरेर माघ १० मा निर्णय हुन्छ।’ कांग्रेस केन्द्रीय समितिको बैठक माघ १० मा बोलाइएको छ।
नेता प्रकाशमान सिंह वर्तमान कार्यसमिति असक्षम रहेकाले कार्यकाल बढाउन नहुने तर्क राख्छन्। जिल्ला तथा प्रदेश अधिवेशन गर्नै नसक्ने वर्तमान कार्यसमितिको स्थानमा नयाँ कार्यसमिति बनाउनुपर्नेमा जोड दिए। उनले भने, ‘बोक्नै नसक्नेलाई भारी थपिदिनु हुँदैन।’
संस्थापन पक्षकै विद्यार्थीबीच विवाद
१२औं महाधिवेशनलाई लिएर संघको संस्थापन पक्षमा विवाद उत्पन्न भएको छ। निर्वाचित कार्यसमितिले १२औं महाधिवेशन गर्नुपर्ने अडानमा अध्यक्ष नैनसिंह महर रहेपछि आफ्नै निकटका पदाधिकारीहरु उनीसँग टाढिएका छन्।
दुई पटक कार्यकाल थपिएको वर्तमान कार्यसमितिलाई नै केही समय बढाएर महाधिवेशन गराउन दिनुपर्ने महरको धारणा छ। तर, उनी निकट सात पदाधिकारी काम गर्न नसक्ने वर्तमान कार्यसमितिलाई समय बढाउन दिन नहुने पक्षमा छन्। संस्थापन समूहमा नै आन्तरिक एकता हुन नसकेपछि सात पदाधिकारीले राजीनामा दिएका छन्।
गत शुक्रबार पार्टी सभापति शेरबहादुर देउवालाई सामूहिक राजीनामा बुझाउनेहरुमा उपाध्यक्षत्रय पुष्पकुमार शाही, सञ्जय यादव, विकास केसी छन्। महामन्त्री सरोजकुमार थापाले पनि राजीनामा दिएका छन्। सहमहामन्त्री प्रेमराज जोशी, प्रकाश घिमिरे र अच्युतराज कलौनीले पनि राजीनामा बुझाएका छन्।
विधानतः संघको अध्यक्षलाई राजीनामा बुझाउने व्यवस्था भए पनि विधान उल्लंघन गरी पार्टी सभापतिलाई राजीनामा बुझाएका छन्। संघको ‘आफ्नै नेतृत्वमा विश्वास नभएको’ जनाउँदै उनीहरुले पार्टी सभापतिलाई राजीनामा बुझाएका हुन्।
राजीनामा दिएका शाहीले भने, ‘संघ पार्टीकै निर्देशनमा चल्ने भएकाले पार्टी सभापतिलाई राजीनामा बुझाएका हौं। संघका अध्यक्षको दास होइनौं, असक्षम अध्यक्षलाई पक्षमा सधैं हुनपर्छ भन्ने छैन।’
संस्थापन समूहकी सहमहामन्त्री अम्बिका चलाउनेले अध्यक्षलाई राजीनामा नबुझाएर पार्टी सभापतिलाई बुझाउनु विधान विपरीत भएको बताइन्।
संगठनमा आफू निकटका पदाधिकारीले साथ छोडे पनि महरलाई महामन्त्री कुन्दनराज काफ्ले समूहको साथ भने रहेको छ। पदावधि बढाउन चाहेका महरलाई साथ दिंदै काफ्ले भन्छन्, ‘पदावधि वैशाखसम्म बढाए, महाधिवेशन गर्न सकिन्छ।’
तदर्थ समितिमा स्वार्थको लडाईं
१२औं महाधिवेशन तोकिएको समयमा हुन नसकेपछि तदर्थ समितिमा आफ्नो स्थान बनाउनका लागि विद्यार्थी नेताहरुले ‘पूर्व तयारी’ गरेका छन्।
पार्टी संस्थापन पक्षमा पार्टी सभापति देउवा वर्तमान कार्यसमितिलाई समय बढाउन तुलनात्मक रुपमा सकरात्मक छन्। उनी पक्षधर दोस्रो तहका नेताहरु तदर्थ समितिको पक्षमा भएको बताइन्छ।
उपसभापति विमलेन्द्र निधि, सहमहामन्त्री डा प्रकाशशरण महत र बालकृष्ण खाँड वर्तमान समितिलाई अघि नबढाउने पक्षमा छन्। शुक्रबार राजीनामा दिएका सात पदाधिकारीहरु निधि,महत र खाँड नजिक रहेकाहरु हुन्।
तदर्थ समितिमा भूमिका बनाउन नेताहरुकै सल्लाहमा उनीहरुले राजीनामा मञ्चन गरेको एक सदस्यले आरोप लगाए। राजीनामा दिएका शाहीले भने, ‘राजनीति गर्दा उपल्लो तहमा पुग्ने इच्छा हुन्छ। पार्टीले जिम्मेवारी दिए, संगठन चलाउँछु।’
१२औं महाधिवेशन पश्चात् उमेर हदबन्दी लाग्ने हुनाले त्यसअघिको कार्यसमितिमा भूमिका पाउनका लागि विद्यार्थी नेताहरुले आन्तरिक तयारी गरेका छन्। दुवै उमेर समूह (३२ वर्ष माथि र तल) तदर्थ समितिमा अवसर बनाउन प्रयत्नरत छन्।
आइतबार वरिष्ठ नेता पौडेलकहाँ राजीनामा बुझाउन पुगेका संघका सदस्यहरु गत महाधिवेशनमा पराजित मनोजमणि आचार्य र हिमालदत्त श्रेष्ठ नजिकका हुन्। कथं तदर्थ समिति बनेको अवस्थामा नेतृत्व प्राप्त हुने अभिलाषाले विद्यार्थी नेताहरुले आफू नजिकका सदस्यहरुलाई राजीनामा गर्न लगाएको बताइएको छ।
पौडेल नजिकका केन्द्रीय सदस्य नविन्द्रराज जोशी११औं महाधिवेशनमा सभापतिमा पराजित मनोजमणि पौडेललाई अध्यक्ष बनाई १२औं महाधिवेशन गर्नुपर्ने बताउँदै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
