धनगढी- पूर्वप्रधानमन्त्री तथा नेपाली कांग्रेसका सभापति शेरबहादुर देउवाले नेपाल वायुसेवा निगमले खरिद गरेको वाइडबडी जहाज अनियमिततामा आफ्नो कुनै दोष नभएको दाबी गरेका छन्। लिखित कागज निकाल्दै उनले भने, 'वाइडबडी अनियमितताविरुद्ध सुरुमा आवाज उठाउने म नै हुँ। यतिबेला आएर मलाई पनि जोड्नु अन्याय हो।’
आफू प्रधानमन्त्री भएका बेला १९ वटा मन्त्रालयको जिम्मेवारी रहेको भन्दै उनले मन्त्रीस्तरीय निर्णयसमेत नभएको दाबी गरे। 'सचिवस्तरीय भएको भए मलाई जानकारी छैन,’ उनले भने, ‘ओली प्रधानमन्त्री भएकै बेला खरिद प्रक्रिया अघि बढेको हो।’
धनगढीमा नेपाल प्रेस युनियन कैलालीले आज आयोजना गरेको पत्रकार सम्मेलनमा बोल्दै उनले ओली सरकारका पालामा तीन महिनाभित्र प्रतिवेदन बुझाउने गरी उपसमितिको गठन भएको समेत बताए।
प्रचण्ड प्रधानमन्त्री भएका बेला वाइडबडी खरिदका अन्य प्रक्रिया अघि बढेको उनको भनाइ थियो। ‘प्रचण्डजी प्रधानमन्त्री भएका बेला सरकार जमानत बस्ने निर्णय भएको हो,’ देउवाले भने।
पछिल्लो समयमा आफ्नो संलग्नता रहेको भन्ने हल्ला बद्नियतपूर्ण रहेको बताउँदै उनले आर्थिक अनियमिततामा संलग्न जो सुकैलाई कारबाही हुनुपर्नेमा जोड दिए।
अर्को प्रसंगमा उनले निर्मला बलात्कार तथा हत्या प्रकरणमा प्रमाण मेटाउने र वास्तविक अपराधी लुकाउने काम यही सरकारले गरेको आरोप पन लगाए। ‘जनतालाई करमाथि कर थोपरेर ढाड सेक्ने काम गरिएको छ,’ उनले भने।
यस्तै सरकारले चिकित्सा शिक्षा विधेयक चोर बाटोबाट पारित गरेको समेत उनको आरोप थियो।
नेपालमा चिकित्सा शिक्षा व्यवस्थित होस्, डाक्टर पढ्न विदेश जानु नपरोस् भन्ने लगायतका कुरालाई ध्यानमा राखेर डाक्टर केसीसँग सहमति गराएर चिकित्सा विधेयक आफ्नो सरकारका पालामा पास गरेको बताउँदै उनले भने, ‘विधेयक पास भएको धेरै समय भएको थिएन तर, अहिले त्यसलाई परिवर्तन गरियो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
