काठमाडौं– फिल्म ‘सय कडा दश’बाट डेब्यू गर्दै नवअभिनेत्री हुन्, सोनिया राई।
राई भन्नासाथ नेपालको पूर्वी पहाडी जिल्लाबाट आएकी हुन् कि भन्ने लाग्न सक्छ। तर, उनी बर्मामा जन्मिएकी हुन्। सोनिया नेपाली नभई नेपाली मूलकी बर्मेली हुन्।
बर्माको सुन्दर सहर म्याउँम्याउँको याक्यजिसक्कोमा गोखार्ली सेनाको परिवारमा जन्मिएकी हुन् उनी। हाल थाइल्यान्ड बस्दै आएकी सोनिया यतिबेला फिल्म ‘सय कडा दश’को प्रदर्शन मिति पर्खेर बसेकी छन्। फिल्म यही माघ १८ बाट प्रदर्शनको तयारीमा रहेको छ।
‘प्रेम गीत’को सिक्वेल ‘प्रेम गीत २’ बाट निर्देशकका रुपमा सफल दरिएका रामशरण पाठकले सोनियालाई थाइल्यान्डदेखि नेपाली फिल्मी क्षेत्रमा प्रवेश गराएका हुन्। पाठकको निर्देशनमा बनेको फिल्मबाट नेपाली फिल्म क्षेत्रमा डेब्यू गर्न पाउँदा सोनिया पनि उतिक्कै खुसी छिन्।
पछिल्लो समय सार्वजनिक फिल्मको गीत तथा ट्रेलरबाट प्राप्त प्रतिक्रियाले झनै ऊर्जा थपेको सुनाउँछिन्।
भन्छिन्, ‘आफन्त, साथीभाइ तथा दर्शकको प्रतिक्रियाले एकदमै हौसला थपिरहेको छ। यो खुसी व्यक्त गर्ने मसँग कुनै शब्द छैन।’
सबैले फिल्म कहिले आउँछ आफूलाई सोधिरहने उनी बताउँछिन्। 'पर्खाइ धेरै भइसक्यो भनेर जिस्काइहरहनु हुन्छ, खुसीले सीमा नाघिसक्यो,’ उनले भनिन्।
बर्मा र थाइल्याडको रहनसहन, पढाइ र उतैको वातावरणमा हुर्किएकी सोनिया नेपाली र नेपालप्रति मोहित छिन्।
नेपाली फिल्ममा अभिनय गर्न पाउनु गर्वको कुरा भएको सोनियाको भनाइ छ।
आफ्नो अभिनयमा रहेको फिल्मप्रति पनि उनी निकै आशावादी छिन्। भन्छिन्, ‘म निकै आशावादी छु, मेहनत पनि निकै गरेका छौँ। त्यसैअनुसारको ट्रेलर तथा गीत पनि सार्वजनिक भएका छन्। त्यसैले फिल्म पक्कै सफल हुनेछ।’
बर्मा र थाइल्यान्डमा नेपाली समुदायकै विविध कार्यक्रममा स्टेज प्रस्तुति दिँदै आएकी सोनियाले त्यसबाट पाएको ‘वाहवाही’ र सफलतासँगै अभिनयको सपना देख्न थालेकी थिइन्।
अन्ततः उनका लागि ‘सय कडा दश’त्यही सपना पूरा गर्ने माध्यम बन्न पुग्यो। आफू कति सफल हुने र नेपाली फिल्ममा भविष्य कस्तो बन्न भन्ने आधार फिल्मको रिलिजपछि तय हुने उनको विश्वास छ।
यसअघि पनि बर्मा र थाइल्यान्डमा रहँदा उनलाई अभिनयका अफर भने नआएको होइन। त्यतिबेला उनले थुप्रै प्रस्ताव अस्विकार गरिन्।
‘तर निर्देशक रामशरण पाठक र थाई नेपाली संघका अध्यक्षकुमार कार्की राखेको अभिनयको प्रस्तावलाई नकार्न सकिनँ,’उनी मुस्कुराउँदै भन्छिन्।
नेपाली समाजभित्रका विकृति, भ्रष्ट्राचार लगायतका सामाजिक विषयवस्तुलाई आधार बनाएर कोरिएर फिल्मको स्क्रिप्ट सुनेर नै आफूलाई काम गर्न रुचि लागेको उनी बताउँछिन्।
सोनिया फिल्ममा आफूले निर्वाह गर्न पाएको भूमिकाबाट पनि मख्ख छिन्। सोनिया अन्य अभिनेत्रीसँग आफू दाँजिन चाहँदिनन्। आफूले गर्ने जुनसुकै कामको पनि मेहनेतमा विश्वास राख्छिन् उनी।
आगामी दिनमा पनि नेपाली फिल्मका लागि प्रस्ताब आएमा, फिल्मको कथा चित्त बुझेमा र परिवारिक समर्थन मिलेमा अभिनयको बाटोमा आफूलाई निरन्तर डोहोर्याउने उनको योजना छ।
सोनियालाई फिल्मको ट्रेलर तथा गीत सार्वजनिक भएपछि धेरैवटा अफर आए। तर, फिल्म ‘सयकडा दश’प्रदर्शनमा नआउन्जेल भने कुनै पनि अफर स्वीकार नगर्ने उनको योजना छ।
भाषिक र सांस्कृतिक रुपमा एकै भए पनि नेपाल र नेपालीसँग घुलमिल नगरेकी सोनियाले फिल्म सुटिङका क्रममा धेरै कुरा सिकेको बताउँछिन्। ‘सबैले बोलेजस्तो नेपाली बोल्न सुरुमा थोरै समस्या भयो। तर, पछि सिक्दै गएँ। सुटिङका क्रममा धेरै कुरा सिक्ने मौका मिल्यो,’उनी खुसी हुँदै भन्छिन्, ‘फिल्म युनिटका सबै सहयोगी भएकाले गाह्रो महसुस भएन।’
'सय कडा दश’को सुटिङ सकिएपछि सोनिया पुनः थाइल्यान्ड नै फर्किइन्।
उतिबेला थाइल्यान्ड फर्किएर कुनै बिजनेस गर्ने योजनामा थिइन्। तर, त्यहाँ अहिले व्यवसायमा त्यति राम्रो वातावरण नभएकाले उचित समयको पर्खाइमा रहेकी छन् उनी।
सोनिया यतिबेला फिल्मको प्रदर्शनको तयारीमा व्यस्त छिन्। जनवरी २६ मा थाइल्यान्डमा फिल्म प्रदर्शनको तयारी हुँदैछ। त्यसैको प्रचारप्रसारमा छिन् उनी।
‘नेपाल कहिले आउने?’ भन्ने प्रश्नमा उनी हाँस्दै भन्छिन्, ‘आफ्नो पहिलो फिल्म आफ्नै ठाउँमा प्रदर्शन हुँदैछ। तयारी त गर्नैपर्यो नि! त्यसपछि नेपाल आउने प्रयासमा छु।’
भिडियो-
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
