काठमाडौं- परराष्ट्रमन्त्री प्रदीप ज्ञवाली र भारतीय विदेशमन्त्री सुष्मा स्वराजबीच भेटवार्ता भएको छ। रायसिना संवादको चौथो संस्करणमा सहभागी हुन भारत पुगेका मन्त्री ज्ञवाली र स्वराजबीच भेटवार्ता भएको भारतीय विदेश मन्त्रालयले जानकारी दिएको हो।
भारतीय विदेश मन्त्रालयको सहकार्यमा अब्जर्भर रिसर्च फाउन्डेसनले आयोजना गरेको सो कार्यक्रममा सहभागी हुन मन्त्री ज्ञवाली आज बिहान भारत प्रस्थान गरेका थिए। भेटवार्ताको क्रममा दुई पक्षीय हितका विषयमा छलफल गरेको भारतीय विदेश मन्त्रालयको आधिकारिक ट्विटरमा उल्लेख गरिएको छ। मन्त्री ज्ञवालीले रायसिना संवादलाई सम्बोधन गर्ने कार्यक्रम रहेको छ।
रायसिना संवादमा सहभागी भएर बुधबार नेपाल आएका जापानका विदेशमन्त्री तारो कानोसँगको दुई पक्षीय भेटपछि मन्त्री ज्ञवाली भारत प्रस्थान गरेका थिए। परराष्ट्रमन्त्री ज्ञवाली र जापानी विदेशमन्त्री कानोको भेटमा क्षेत्रीय र अन्तर्राष्ट्रिय हितका विषयमा मिलेर अघि बढ्ने सहमति भएको छ। क्षेत्रीय र अन्तर्राष्ट्रिय हितमा मिलेर अघि बढ्ने बताइए पनि कस्ता विषय भनेर उल्लेख नगरिएको उक्त सहमतिलाई अमेरिकाले अघि सारेको ‘इन्डो प्यासफिक’ रणनीतिका रुपमा विश्लेषण गरिएको छ।
पछिल्लो समय दक्षिण एसियाली क्षेत्रमा चीनको बढ्दो प्रभावबीच क्षेत्रीय र अन्तर्राष्ट्रिय शक्ति राष्ट्रको नेपालमा चासो बढ्दै गएको छ। भारतको प्रभाव नेपालमा खस्किँदै गएको अवस्थामा नेपाललाई उक्त रणनीतिमा सहमति गराउन अमेरिका, जापान लगायतका देशले महत्वपूर्ण भूमिका खेल्ने प्रयास गरेको विज्ञहरूको विश्लेषण छ।
रायसिना संवादमा सहभागी हुन भारत पुगेका मन्त्री ज्ञवालीसँग भारतमा उनका समकक्षीले पनि उक्त विषयमा छलफल गर्न सक्ने आशंका गरिएको छ। चीनलाई घेर्ने नीतिमा अमेरिका, भारत, जापान लगायत देश सहकार्य गर्दैछन्।
भारतमा रहँदा मन्त्री ज्ञवालीले इपिजी प्रतिवेदन, नेपालमा रहेको प्रतिबन्धित भारतीय पैसाका विषयमा कुरा राख्ने परराष्ट्र मन्त्रालयले बताएको छ। अघिल्लो वर्ष परराष्ट्र सचिव शंकरदास बैरागी सहभागी भएको कार्यक्रमा यो पटक मन्त्री ज्ञवाली सहभागी भएका हुन्। ज्ञवाली शुक्रबार स्वदेश फर्कनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
