जनकपुर– नेपाल पत्रकार महासंघ प्रदेश–२ ले आमसञ्चार ऐनको नमूना मस्यौदा सुझाब प्रदेश सरकारलाई बुधबार हस्तान्तरण गरेको छ।
आन्तरिक मामिला तथा कानुन मन्त्री ज्ञानेन्द्र कुमार यादवलाई ‘प्रदेश आमसञ्चार ऐन’ सम्बन्धी मस्यौदा प्रदेश महासंघका महासचिव किरण कुमार कर्णले सुझाबको लागि बुझाएका हुन्।
समितिले बुझाएको आमसञ्चार ऐनको मस्यौदा–२०७५ पत्रकारमैत्री रहेको जनाएको छ।
प्रेस तथा अभिव्यक्ति स्वतन्त्रतासम्बन्धी विश्वव्यापी मान्यता, नेपालको संविधानको व्यवस्था र नेपालमा कार्यान्वयनमा रहेको ३ तहका सरकारको मूल मर्मअनुरुप यो मस्यौदा तयार गरेको महासचिव कर्णले बताए।
महासचिव कर्णले स्वतन्त्र मिडियामाथि राज्यका कुनै पनि तहका निकायबाट हस्तक्षेप हुनुहुँदैन भन्ने मान्यताअनुरुप मिडियासम्बन्धी स्वतन्त्र र स्वायत्त संरचनाको कल्पना गरिएको बताए।
मिडियाको कन्टेनबाहेक अन्य नियमन गर्न तथा हाल केन्द्रमा सूचना विभाग, प्रेस काउन्सिल र सञ्चार मन्त्रालय समेतले गरिरहेका वर्गीकरण, प्रशिक्षण, लोककल्याणकारी विज्ञापन वितरण, मिडियाको अभिलेखीकरण र लाइसेन्स वितरणजस्ता कामका लागि प्रदेश स्तरमा स्वतन्त्र र स्वायत्त खालको प्रदेश सञ्चार प्राधिकरण स्थापना गर्ने प्रस्ताव गरिएको मस्यौदामा उल्लेख छ।
मस्यौदा सुझाबमा हालसम्म केन्द्रमा मात्र रहेका मिडियाको दर्ता, नवीकरण, वर्गीकरण, विज्ञापन वितरण, पत्रकारिता प्रशिक्षण सहितका अधिकारहरू प्रदेश र स्थानीय तहमा ल्याउने प्रस्ताव गरिएको छ।
मिडिया दर्ता, नवीकरण तथा सरकारी विज्ञापनको भुक्तानी सम्बन्धी व्यवस्था स्थानीय तहबाटै हुने प्रस्ताव उल्लेख छ।
प्रदेश सरकार समक्ष महासंघले प्रस्तुत गरेको प्रारम्भिक मस्यौदालाई अझ बढी पत्रकारमैत्री बनाउन तथा केन्द्रका सञ्चारसम्बन्धी अधिकारहरू स्थानीय तहसम्म पुर्याउन विभिन्न विज्ञ र क्षेत्रबाट आउने सुझाबलाई महासंघले सधैँ स्वागत गर्ने महासचिव कर्णले स्पष्ट पारे ।
प्रेस सम्बन्धी एकीकृत कानुनको अवधारणाअनुरुप यो ऐन मस्यौदा तयार गरिएको छ।
यसमा पत्रपत्रिका, रेडियो, टिभी, अनलाइनलगायत आमसञ्चार माध्यम सञ्चालन र नियमन सम्बन्धी व्यवस्था, संविधानमा सञ्चार माध्यमले प्रकाशन प्रसारण गर्न नहुने भनेर तोकिएका प्रतिबन्धात्मक वाक्यांश विपरित प्रकाशन तथा प्रसारण गरेमा हुने सजायको व्यवस्था, प्रदेशका सरकारी विज्ञापन प्रदेशका सञ्चार माध्यममा समानुपातिक रुपमा वितरण गर्नुपर्ने व्यवस्था, प्रदेश स्तरमा आम सञ्चार प्रशिक्षण प्रतिष्ठानको स्थापना र पत्रकार हितका लागि पत्रकार वृत्ति कोषको स्थापना जस्ता प्रावधान राखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1664177809.jpg)
-1764146706.png)
