पोखरा– पोखरा महानगरपालिकाले मापदण्ड मिचेर बनाएका जनप्रतिनिधिका घरमा डाेजर चलाएकाे छ। महानगरले सार्वजनिक जग्गा फिर्ता अभियानको क्रममा सोमबार पोखरा– ४ का जनप्रतिनिधिले बनाएको संरचना भत्काएको हो।
महानगरपालिकाले वडा सदस्य विष्णुमाया परियारले बनाउँदै गरेको पिल्लर सहितको पक्की घर भत्काएको हो। महानगरपालिकाले चालु आर्थिक वर्षलाई सार्वजनिक जग्गा संरक्षण वर्षका रुपमा मनाइरहेको छ।
पटकपटक सूचना पठाउँदा पनि अटेरी गरेकाले भत्काउनु परेको महानगरका प्रवक्ता धनबहादुर नेपालीले जानकारी दिए। ‘सुरुबाटै हामीले नबनाउन आग्रह गर्दै आएका थियौं तर मान्नुभएन। हिजो (आइतबार) ढलान नै गर्नुभयो,’ उनले भने, ‘पटकपटक आग्रह गर्दा पनि अटेरी गरेपछि मेयरसाबले भत्काउने आदेश दिनुभएको हो।’
नेपालीले पहिले पनि पटकपटक परियारको सामान जफत गर्दै लगेको जानकारी दिए। उनले भने, ‘पहिले जग बसाल्दा नै बेल्चा, घन, गैंचीलगायत सामान उठाएर लगेका थियौं। उहाँले अटेर गरिरहनुभयो।’ परियारले नेपाल स्काउट कास्की शाखासँगैको जग्गामा मापदन्ड विपरीत संरचना जेठ ४ बाट बनाउन सुरु गरेकी थिइन्।
वडा सदस्य परियारले भने आफूले वडाध्यक्ष र मेयरसँग मौखिक सहमति गरेरमात्रै घर बनाएको दाबी गरिन्। उनले भनिन्, ‘मेयर साबसँग दशौंचोटी बैठक गरेर मात्रै घर बनाएको हुँ। अहिले आएर त्यसै भत्काउन पाइन्छ?’ उनकोे पुरानो घरमा फिर्के खोलाको बाढी आएर पस्ने भएकाले माथि घर सारेको दाबी छ।
‘गरिब र सुकुम्बासी खोलाको पानी कोठामा पसेर मर्दा आवाज उठाउन सक्दैन। अहिले घर बनाएको भन्दै डोजर लगाउन पाउँछ?’ परियारले प्रश्न गरिन्, ‘फिर्केको मापदन्ड मिचेर सयौंले घर बनाएका छन्। के गरिबको कहिले दिन नआउने हो?’ उनले सो जग्गा २०४८ सालदेखि नै भोगचलन गर्दै आएको दाबी गरिन्।
परियारले उक्त ९÷१० लाख खर्चेर बनाएको बताइन्। घर बनाउन नमुना महिला समूहबाट १५ लाख ऋण लिएको समूहकी सदस्य देवका कोइरालाले जानकारी दिइन्। जनप्रतिनिधिले नै मापदन्ड मिचेर संरचना बनाइरहेको विभिन्न संचार माध्यममा समाचार प्रकाशन भएपछि महानगरले अनाधिकृत रुपमा नबनाउन आग्रह गर्दै आएको थियो।
पोखरा महानगरले सोमबार नै पोखरा ५ का मापदन्ड मिचेर बनाएका अन्य संरचना समेत भत्काएको प्रवक्ता नेपालीले जानकारी दिए। उनले भने, ‘सबैलाई पहिल्यै पत्राचार गरेका हौं। सबैले अटेरी गरेपछि महानगर आफैं अग्रसर हुनुपरेको हो।’ अब विस्तारै मापदण्ड मिचेका सबै संरचना भत्काइने उनले जानकारी दिए।
महानगरले पोखरा– ५, सिमानामार्गमा रहेको भरत लिगलको ४ कोठे संरचनासमेत भत्काएको छ। ‘उक्त संरचना व्यक्तिले दाबी गर्दै आउनुभएको थियो। तर हाल कानुनी रुपमै सरकारी भएको प्रमाणित भएपछि पनि नमानेपछि भत्काउनु परेको हो,’ प्रवक्ता नेपालीले भने। उनले पोखरा ५ बुलौंदी कि जमुना क्षेत्रीको ३ कोठे भवन पनि भत्काएको जानकारी दिए।
महानगरले अतिक्रमित जग्गा भत्काउन थालेपछि केही महानगरबासीले ५ दिनभित्रमा आफैं भत्काउने प्रतिबद्धता गरेका छन्। प्रतिबद्धता गर्नेमा युवराज खतिवडाले प्रयोग गरेको रामचन्द्र भण्डारीको घर, वासुदेव आचार्यको ३ कोठे भवन, शान्त बतास १ कोठाको भवन छ। उनीहरुले सोमबार नै महानगरसँग ५ दिनभित्र घर भत्काउने लिखित सहमति गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
