जनकपुर– मधेस आन्दोलनको क्रममा हत्या गरिएका सशस्त्र प्रहरीका असई थमन विकको हत्यासम्बन्धी मुद्दाको पेशी लगातार सर्दै आएको छ।
पछिल्लो पटक हिजो बिहीबार जनकपुर उच्च अदालतको बेन्च नम्बर–२ मा परेको पेसी १०औँ पटक सारिएको छ। यसअघि पुस १२ मा तोकिएको पेसी पनि सारिएको थियो । सो मुद्दाको पेसी पुनः आगामी बिहीबारको लागि तोकिएको उच्च अदालत जनकपुरका प्रवक्ता रामाकान्त यादवले जानकारी दिए ।
२०७२ साल भदौ २५ मा मधेस आन्दोलनका क्रममा महोत्तरीमा कार्यरत सशस्त्र प्रहरीका असई विकको हत्या भएको थियो। विकलाई आन्दोलनकारीहरूले जलेश्वरमा कुटपिट गरी गम्भीर घाइते बनाएका थिए। उनलाई उपचारको लागि जनकपुर अञ्चल अस्पताल लैजाने क्रममा महोत्तरी गाउँपालिका स्थित सोनउखडा भन्ने स्थानमा एम्बुलेन्सबाट थुतेरै आन्दोलनकारीहरूले खेतमा निर्घाट कुटपिट गरी हत्या गरेका थिए।
सो मुद्दामा २०७५ साउन २८ मा जिल्ला अदालत महोत्तरीले अभिराम शर्मा, रामाशंकर मिश्र, सुरेन्द्र पाण्डेय, धमेन्द्र राय लगायत २८ जनामाथि मुद्दा दर्ता गरेको थियो।
तीमध्ये शर्मा प्रदेश सरकारका सामाजिक विकास राज्यमन्त्री छन् भने मिश्र जलेश्वर नगरपालिकाका मेयर छन्। मिश्र, पाण्डेय, राय साधारण तारेखमा रिहा भइसकेका छन्।
महोत्तरी जलेश्वर नगरपालिका–३ का सञ्जयकुमार साह र जलेश्वर–२ का प्रदीप साह माझी पुर्पक्षका लागि थुनामा छन्।
साउन २८ मा जिल्ला अदालत महोत्तरीले गरेको आदेशमा त्रुटि भएको भन्दै सरकारी वकिल कार्यालय महोत्तरीले असोज ११ मा उच्च अदालत जनकपुरमा रिट दायर गरेको थियो।
साधारण तारेखमा छुटेका अभियुक्तहरूलाई थुनामा राखेर अनुसन्धान गनुपर्ने मागसहित सरकारी वकिलले उच्च अदालतमा रिट दायर गरेको हो।
तर, सो मुद्दामा उच्च अदालत जनकपुरले पटकपटक पेशी तोके पनि अहिलेसम्म सुनवाइ हुन सकेको छैन।
उच्च अदालत जनकपुरका प्रवक्ता रामाकान्त यादवले अहिलेसम्म मुद्दाको १० वटा पेसी तोकिएको भए पनि अभियुक्तहरूका वकिलहरूले पटक–पटक मुद्दाको पेशी सार्दै आएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1791388337.png)
