काठमाडौं– बलिउड फिल्म उद्योगका लागि सन् २०१८ अघिल्लो वर्षभन्दा केही फलदायी बन्न पुग्यो। निर्माताहरु कथावस्तुप्रति सचेत भएकै कारण फिल्मी बजारमा वृद्धि भएको भारतीय सञ्चारमाध्यमहरुले उल्लेख गरेका छन्।
२०१८ मा बलिउड बक्स अफिस सफल हुनुमा स्टार कास्टले मात्र भूमिका निर्वाह गरेका छैनन्। यसमा स्टारकास्ट, कथावस्तु र त्यसको प्रस्तुतीकरण बलियो बनेको छ। जसलाई भारतीय फिल्मकर्मीहरुले भविष्यका लागि राम्रो संकेतका रुपमा लिएका छन्।
भारतीय बक्स अफिसमा यस वर्ष सलमान, आमिर, शाहरुख कसैको जादु चल्न सकेन। बरु विभिन्न नारीप्रधान र बायोपिक फिल्महरुले सफलताको श्रेय लिए।
भारतीय सञ्चारमाध्यमका अनुसार विभिन्न समस्याबाट बलिउड फिल्म उद्योगमा एकातिर टिकटको मूल्य बढेको छ भने दर्शकको संख्या घटिरहेको छ। अर्कातिर सिंगल थिएटर हलमा दर्शकको अपेक्षा र चाहना अनुरुप फिल्महरु बन्न सकिरहेका छन्। यससँगै बक्स अफिसको अर्को मुख्य चुनौती भनेको वेब सिरिज हुन्। सिरिजहरु निर्माण गर्न पनि सहज र दर्शकको साथ उत्साहजनक रहेको पाइन्छ। यही चुनौती पार गर्दै हलसम्म दर्शक तान्ने विषयमा फिल्म निर्माण गर्नु निर्माताहरुका लागि अर्को चुनौती बनिरहेको छ। यो बलिउडमा मात्र नभई नेपाली फिल्म उद्योगमा पनि उतिकै सान्दर्भिक देखिन्छ।
यस्ता समस्याका बाबजुद सन् २०१८ मा केही बलिउड फिल्मले बक्स अफिसमा उत्साहजनक उपस्थिति जनाउन सफल भए।
ब्लकबस्टर
सन् २०१८ को बलिउड बक्स अफिसका लागि ब्लकबस्टर साबित भए ‘सञ्जु’ र ‘पद्मावत’। चर्चित अभिनेता सञ्जय दत्तको जीवनीमा आधारित सञ्जु जुन २९ बाट प्रदर्शनमा आएको थियो। फिल्म प्रदर्शनका दिन कुनै पनि सार्वजनिक बिदा परेको थिएन तर पनि निकै राम्रो व्यापार गर्न सफल भयो। फिल्मले रणवीर कपुरलाई समेत वर्षकै सर्बाधिक हिट अभिनेतामा उभ्याउन सफल भयो।
‘पद्मावत’ले पनि विभिन्न विरोधका बीच सफलता प्राप्त गर्यो। जनवरी २५ बाट प्रदर्शनमा आएको पद्मावत विरोधकै कारण अहिलेसम्म पनि भारतका कतिपय स्थानमा प्रदर्शनमा आउन सकेको छैन। तर फिल्मले ५ सय ८६ करोडभन्दा बढीको व्यापार गर्न सफल भयो।
सुपरहिट
वर्ष २०१८ को बलिउड सुपरहिट फिल्मको सूचीमा ‘बधाई हो’, ‘स्त्री’, ‘राजी’, ‘सोनु के टिटु की स्विटी’, ‘बागी २’ र ‘२.०’ सूचीकृत भएका छन्। स्टारकास्ट मात्र नभएर फिल्मको विषयवस्तु, स्क्रिप्ट, अभिनय र निर्देशकीय पक्षबाट फिल्महरु सफल बनेका भारतीय सञ्चारमाध्यमहरुले उल्लेख गरेका छन्।
फिल्म ‘बधाई हो’ले दर्शकलाई मज्जाले हँसायो। जसले परिवारसहित हलमा आएर फिल्म हेर्ने वातावरण सिर्जना गरेको थियो। ‘स्त्री’ले पनि दर्शकको मन जित्न सफल भयो। आलिया भट्ट स्टारर फिल्म ‘राजी’ले सय करोडभन्दा बढीको व्यापार गर्न सफल भयो। युवा वर्गलक्षित ‘सोनु के टिटु की स्विटी’ले पनि भारतीय बक्स अफिसमा राम्रो उपस्थिति जनाएको थियो।
अभिनेता टाइगर श्राफको एक्सनपूर्ण अभिनय रहेको ‘बागी २’ले पनि दर्शकको मन जित्न सफल बन्यो। फिल्मले २ सय ५० करोडभन्दा बढीको व्यापार गरेको थियो। यसैगरी वर्षको अन्त्यतिर प्रदर्शनमा आएको ‘२.०’ पनि भारतीय बक्स अफिसमा सुपरहिट लिस्टमा अटाउन सफल बन्यो।
हिट
‘अंधाधुन’, ‘परमाणु’, ‘सत्यमेव जयते’ जस्ता अलगअलग विधामा निर्माण भएका फिल्म हिट लिस्टमा अटाउन सफल भए। त्यसैगरी बरुण धवन र अनुष्का शर्माको अभिनय रहेको ‘सुई धागा’ले पनि दर्शकको मन जित्दै हिट लिस्टमा आफ्नो स्थान सुरक्षित गरेको छ।
श्रीदेवीकी छोरी जान्ह्वी कपुरको डेब्यू अभिनय रहेको ‘धडक’ले बक्स अफिसमा ११० करोडभन्दा बढीको व्यापार गर्न सफल भयो। जसले गर्दा धडक हिट फिल्म साबित भयो। महिला स्टारहरुको अभिनय रहेको ‘वीरे दी वेडिङ’ले पनि बक्स अफिसमा राम्रो दर्शकको साथ जुटाएको थियो।
यस्तै उच्च अपेक्षा बोकेका ‘रेड’ र ‘प्याड म्यान’ले अपेक्षा अनुसारको व्यापार गर्न सकेनन्। तर पनि भारतीय बक्स अफिसको हिट लिस्टमा सुरक्षित रहे।
औसत
औसत व्यपार गर्दै थोरै मात्र नाफामा चित्त बुझाउने फिल्मको सूची भने त्यति लामो छैन। जसमा अक्षय कुमारको ‘गोल्ड’ बक्स अफिसमा औसत देखिएको थियो। ‘सुरमा’, ‘१०२ नट आउट’, ‘अक्टोबर’, ‘परि’ र ‘हिचकी’ले औसत व्यापारमा चित्त बुझाउनुपर्यो। यसमा पनि रानी मुखर्जीको ‘हिचकी’ले भने अपेक्षाभन्दा बढी व्यापार गरेको थियो।
फ्लप
वर्ष २०१८ मा बलिउड बक्स अफिसमा ‘फ्ल्प’ फिल्महरुको सूची भने निकै लामो छ। त्यसमा पनि स्टारको स्टारडम बोकेका कलाकर्मीहरुकै फिल्म अग्रपंक्तिमा छन्।
पहिलो नम्बरमा आमिर खानको ‘ठग्स अफ हिन्दुस्तान’ छ।
करोडौंको लगानीमा तयार फिल्म दीपावलीमा प्रदर्शनमा आएको थियो। यसैगरी अर्का स्टार सलमान खान अभिनित ‘रेस–३’पनि फ्लप सूचीमा सूचीकृत बन्न पुग्यो। सलमानको ब्यानरमा बनेको ‘लव यात्री’को गीत सफल भए पनि फिल्म पूर्ण रुपमा असफल भयो। यसले निमार्ताहरुलाई फिल्म सफल बनाउन स्टारकास्ट मात्र सर्वोपरि हो भन्ने भ्रमबाट भने बाहिर निकालिदिएको छ।
‘बत्ती गुल मिटर चालु’पनि बक्स अफिसमा असफल बन्यो। करोडौंको लगानी रहेको फिल्म ‘विश्वरुप’ पनि असफलको सूचीमा रह्यो। त्यस्तै ‘पल्टन’, ‘लैला मज्नु’, ‘नमस्ते इङ्लैन्ड’, ‘फन्ने खान’ पनि दर्शकले रुचाइदिएनन्। ‘मुल्क’, ‘मंटो’, ‘मनमर्जिया’ले राम्रो प्रतिक्रिया प्राप्त गरे पनि यी फिल्मले दर्शक खुसी बनाउन असफल रहे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
