काठमाडौं– आज पुस १५, गुरुङ समुदायले पुरानो वर्षलाई बिदाइ गरी नयाँ वर्षलाई स्वागत गरेर ‘तमु ल्होसार’ पर्व मनाउँदैछन्।
‘ल्हो’ को अर्थ वर्ष र ‘सार’ को अर्थ फेरिनु भएकाले वर्ष फेरिने दिनलाई ‘तमु ल्होसार’ भनिएको गुरुङ समुदायको विश्वास छ।
‘तमु ल्होसार’ पर्व सूर्यको किरणसँग सम्बन्धित छ। गुरुङ बाहुल्य रहेका लमजुङ, गोरखा, तनहुँ, स्याङ्जा, मनाङ, कास्की, पर्वतलगायत जिल्लामा सूर्यको ताप पहिले आउने विश्वासका साथ पुस १५ मा यो पर्व मनाउने गरिएको हो।
यसपछि क्रमशः तामाङ र शेर्पा जातिको बसोबास भएको क्षेत्रमा सूर्यको ताप आउने भएकाले ती समुदायमा भने माघ र फागुनमा यो पर्व मनाइने गरिन्छ।
पुस १५ गतेको रात सबैभन्दा लामो हुने र यसपछिका रात घट्दै जाने भएकाले पनि यस पर्वको महत्व रहेको बताइन्छ।
१२ राशीजस्तै गुरुङ जातिमा १२ जीवजन्तुकाे नाममा १२ वटा वर्ग विभाजन गरिएकाे हुन्छ। आजैबाट कुकुर वर्ग सकिएर मृग वर्गसमेत सुरु भएकाे छ। आजबाट आगामी पुस १४ सम्म जन्मिने गुरुङ सन्तान मृग वर्गकाे हुनेछन्।
यस अवसरमा आज काठमाडौंको टुँडिखेलमा विशेष कार्यक्रम गरिएकाे छ। गुरुङ समाजले आयाेजना गरेकाे कार्यक्रममा गुरुङ समुदायकाे संस्कृित झल्किने भेषभुषा, सामाग्री, बाजागाजा तथा नाचगान प्रस्तुत गरिएकाे थियाे।
त्यस्तै देश तथा विदेशमा रहेका नेपाली गुरुङ समुदायले गुम्बा, चैत्य तथा बिहारहरुमा विशेष पूजाअर्चना गर्दै नयाँ वर्षको शुभकामनासमेत साटासाट गरिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
