बैठक टार्दै महन्थ ठाकुर

राजनीति

किशोर दहाल मंगलबार, पुस १०, २०७५ १८:३१

काठमाडौं– मंगलबार दिउँसो १ बजेको लागि बोलाइएको राष्ट्रिय जनता पार्टीको बैठक अन्तिम समयमा स्थगित भयो। बैठक अन्तिम समयमा स्थगित हुनुको कारण बताइयो, महन्थ ठाकुरको स्वास्थ्य। तर यसैगरी अन्तिम समयमा बैठक स्थगित भएको यो पहिलो पटक होइन। राजपामा संयोजक परिवर्तन भएपछि पटकपटक भइसकेको छ।

यसरी बैठक बस्नै नसक्ने स्थिति आउनुलाई महतो पक्षका नेताहरु भने ठाकुरको असन्तुष्टिलाई जोडेर प्रतिक्रिया दिने गरेका छन्। ठाकुर र उनी पक्षका नेताहरुले संयोजक परिवर्तनलाई स्भाविक रुपमा लिन नसक्दा पार्टीमा गम्भीर बैठक नै हुन नसकेको महतो पक्षका नेताहरुले तर्क छ। 'खासमा ठाकुरलाई संयोजकबाट हट्नुपरेकोमा निकै ठूलो पीडा छ', एक नेता भन्छन्, 'उहाँले सहज रुपमा लिनै सक्नुभएको छैन।'

विवादको जरो
गत मंसिर ४ गतेको अध्यक्ष मण्डलको बैठकले मंसिर ५ गतेदेखि लागू हुने गरेर राजपामा अध्यक्ष मण्डलको संयोजक परिवर्तन गर्‍यो। नयाँ संयोजकको रुपमा अर्का अध्यक्ष राजेन्द्र महतो चयन भए। बहुमतबाट यो निर्णय गरिएको थियो। निर्णयमा अनिल झाले मात्रै 'नोट अफ डिसेन्ट' लेखेका छन्।

राजपा गठन भएको झन्डै २० महिनापछि भएको यो परिवर्तनलाई ठाकुर पक्षीय नेताहरुले स्वभाविक रुपमा लिन सकेका छैनन्। कतिपय नेताहरु त ठाकुरमाथि 'कू' भएको प्रतिक्रिया नै दिने गरेका छन्।

संयोजक परिवर्तनसँगै ठाकुर पार्टी कार्यालयमा पनि कमै मात्र जान थालेका छन्। सो विवादपछि उनी बबरमहलस्थित तत्कालीन तमलोपाको पुरानो कार्यालयमा बारम्बार जान थालेका थिए। उनले राजपामा देखिएको परिवर्तन नरुचाएको विभिन्न संकेतहरु दिएका छन्। परिवर्तनबाट असन्तुष्ट नेताहरुमा पूर्व तमलोपाका नेताहरु छन्। ठाकुरले उनीहरुको असन्तुष्टि सम्बोधन गर्न भन्दै आफ्नो असन्तुष्टिलाई घुमाउरो रुपमा महतोलाई संकेत गरिरहेका छन्। जसका कारण राजपाको बैठक बस्नै सकस हुँदै आएको छ।

'उहाँ पक्षका नेताहरुलाई भेटेर शनिबार नै छलफल गरिएको पनि हो', एक नेता भन्छन्, 'तर कुनै पनि कुरा स्पष्ट भन्दैनन्। सबैलाई मिलाएर अघि बढ्नुपर्छ भन्छन्। त्यसका अतिरिक्त यो भएन पनि भन्दैनन्। यसो गर्नुपर्‍यो पनि भन्दैनन्। अर्घेल्याइँ गर्ने अभिप्राय देखिन्छ।'

बैठक निरन्तर स्थगित
महतो संयोजक भएको एक महिना बितिसक्दा समेत एउटा पनि बैठक बस्न सकेको छैन। मंसिर ६ तथा ७ मा बस्ने तयारी गरिएको बैठक स्थगित भयो।

संयोजक परिवर्तनपछि पहिलोपटक मंसिर १० गतेका लागि बैठक बोलाइयो। तर अन्तिम समयमा बैठक स्थगित भयो। ठाकुरले असन्तुष्टि जनाइरहेकै थिए, अर्का नेता राजकिशोर यादव पनि उपत्यका बाहिर भएपछि बैठक बस्न सकेन।

अर्को बैठक मंसिर १४ का लागि बोलाइयो। यो बैठकमा पनि ठाकुर नआउने भएपछि उनलाई फकाउन महतो उनको निवासमै पुगेका थिए। बाहिर नराम्रो सन्देश गएको भन्दै उनले बैठकमा आउन जोड गरेका थिए। तर सो दिनको बैठकमा पनि प्रभावकारी भएन। ठाकुरले आफू अस्वस्थ भएको र उपचारका लागि नयाँ दिल्ली जानु परेकाले फर्केपछि बैठक बस्न प्रताव गरेका थिए। त्यसपछि बैठक औपचारिक रुपमा नबस्दै स्थगित भयो।
१४ गते स्थगित भएको बैठकपछि १६ गते ठाकुर उपचारका लागि भारत गए। उनी फर्केपछि पनि बैठक बस्नको लागि पहल हुँदै आएको तर बस्न नसकेको राजपाका नेताहरु बताउँछन्।

लामो समयपछि मंगलबारका लागि बोलाइएको बैठक पनि स्थगित भयो। ठाकुर बिरामी भएकाले बैठक स्थगित भएको राजपाका नेताहरुले जानकारी दिएका छन्।

आजै प्रधानमन्त्रीसँग भेट
आजै प्रधानमन्त्री र राजपा नेताहरुबीच भेटवार्ता भएको थियो। बिहान साढे १० बजेदेखि सुरु बैठक झन्डै २ घण्टा चलेको थियो। राजपामा संयोजक परिवर्तनपछि आजको भेट पहिलो थियो। भेटमा प्रधानमन्त्रीले राजपाका मागहरुमा आफू सकारात्मक रहेको र राजपा नेताहरुको चासोको विषयलाई एक साताभित्रै अघि बढाउने प्रतिबद्धता जनाएका थिए।

प्रधानमन्त्रीसँगको भेटवार्ताबाट राजपा नेताहरु सकारात्मक सुनिएका थिए। 'आइस ब्रेक भयो', राजपा अध्यक्ष मण्डलका नेता शरतसिंह भण्डारीले भने, 'उहाँले हाम्रा विषयमा सकारात्मक प्रतिक्रिया दिनुभयो। उहाँ हाम्रो चासोमा सकारात्मक हुनुहुन्छ भन्ने हामीले पनि महसुस गर्‍यौं।'

प्रधानमन्त्रीसँगको भेटवार्तामा आफ्ना कुरा राखेर फर्किएका राजपाका नेताहरु १ बजेको बैठकमा भने जुट्न सकेनन्। कारण बताइयो, ठाकुरको स्वास्थ्य अवस्था। 'बिरामी भएकै हुन् भने स्वास्थ्य लाभको कामना गर्छु। तर, बिहान २ घण्टासम्म प्रधानमन्त्रीसँग बैठक बस्न सकिने', एक नेताले असन्तुष्टि जनाए, 'पार्टीमा एक छिन पनि बैठक बस्न नसकिने? बैठक बस्ने बेलामा सधैं बिरामी?'

यसैबीच बुधबार बिहान ११ बजेका लागि बैठक बोलाइएको छ। 'त्यो पनि बस्ला भन्ने लाग्दैन', ती नेता भन्छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।