काठमाडौं- नेपाली कांग्रेस महासमिति बैठक सुरु भएको छ।
काठमाडौंको रामशाहपथस्थित एक प्यालेसमा शनिबार पार्टी सभापति शेरबहादुर देउवाले महासमिति बैठकको उद्घाटन गरे।
आजै अपराह्नबाट बन्द सत्र सुरु हुने कार्यक्रम पनि तय गरिएको छ। बन्द सत्रमा पार्टी केन्द्रीय कार्य समितिबाट पारित पाँच वटै प्रतिवेदनहरु पेस हुनेछन्।
'पार्टीका उपसभापति विमलेन्द्र निधिले राजनीतिक प्रतिवेदन, महामन्त्री डा. शशांक कोइरालाले सांगठनिक प्रतिवेदन, पार्टीका अर्का महामन्त्री पूर्णबहादुर खड्काले विधान संशोधन प्रतिवेदन, सहमहामन्त्री डा. प्रकाशशरण महतले अर्थनीति सम्बन्धि प्रतिवेदन र कोषाध्यक्ष सितादेवी यादवले पार्टीको आय/व्यय विवरण समेटिएको प्रतिवेदन बन्द सत्र सुरु भएकै दिन पेस गर्नु हुनेछ,' प्रवक्ता विश्वप्रकाश शर्माले भने।
पुस १ गतेबाट महासमिति बैठकमा सो प्रतिवेदनमाथि प्रदेश स्तरीय छलफल गर्न ७ वटा समूह बनाउने छ। प्रवक्ता शर्माले पुस ३ गते मध्यान्हसम्म सो प्रतिवेदनमाथि छलफल गरी महासमिति बैठकले आवश्यक निर्णय लिने जानकारी दिए।
करिब १ हजार ६ सय प्रतिनिधि तथा पर्यवेक्षक सहभागी भएका छन्। महासमिति बैठकलाई कांग्रेसले मिनी महाधिवेशनको रुपमा लिने गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
