सुर्खेत– कर्णाली प्रदेशमा हरेक वर्ष अपराधका घटना बढ्दै गएका छन्। प्रदेश प्रहरी कार्यालयका अनुसार पछिल्लो तीन वर्षको तथ्यांक हेर्दा वर्षेनी अपराध बढिरहेको छ।
आर्थिक वर्ष २०७२/०७३ मा कर्णालीका दश जिल्लामा १ हजार १७ वटा अपराधजन्य घटना भएका थिए। आव २०७३/०७४ मा उक्त संख्या बढेर १ हजार ४७ पुग्यो।
त्यसैगरी आव २०७४/०७५ मा १ हजार २ सय ४८ वटा अपराधका घटना भएका थिए भने हालसम्म ५ सय ७३ वटा अापराधिक कार्य भइसकेको प्रदेश प्रहरी कार्यालय सुर्खेतले जानकारी दिएको छ।
अपराधका घटना बढेसँगै प्रहरीलाई पनि चुनौती थपिएको छ। अपराध अनुसन्धानदेखि अभियुक्तहरूको खोजी कार्यमा चुनौती बढेको प्रदेश प्रहरी कार्यालयका प्रमुख (डिआइजी) महेशविक्रम शाह बताउँछन्।
उनले अहिले पनि ठूलो संख्यामा अभियुक्तहरु फरार रहेको भन्दै उनीहरुको खोजी गर्न प्रहरी लागिपरेको बताए।
कर्णाली प्रदेश प्रहरी कार्यालय सुर्खेतका अनुसार विभिन्न समयमा कर्णालीका दश जिल्लाबाट २ हजार ५ सय १४ जना अपराधी फरार रहेका छन्। उनीहरु अदालतबाट दोषी ठहर भई फरार भएका हुन्।
प्रहरीका अनुसार दश जिल्लामध्ये सुर्खेतबाट सबैभन्दा धेरै फरार भएका छन्। सुर्खेतका १ हजार १ सय ७३ जना फरार रहेको प्रहरीले जनाएको छ।
त्यसैगरी दैलेखबाट २३ जना, सल्यानबाट ८० जना, जाजरकोटबाट ८ जना र रुकुम पश्चिमबाट ५५ जना फरार भएका छन्।
यसैगरी जुम्लाबाट १ सय ४१, हुम्लाबाट ४ जना, डोल्पाबाट १७ जना, मुगुबाट १९ जना र कालिकोटबाट १ सय ६२ जना अपराधी फरार रहेको प्रदेश प्रहरी कार्यालयको तथ्यांकमा छ।
फरार अपराधीहरूबाट जम्मा ४ हजार ९८ वर्ष ९ महिना २९ दिन कैद सजाय भुक्तान हुन बाँकी छ। उनीहरुबाट ५ करोड ११ लाख रुपैयाँ बराबरको जरिवाना असुल हुन बाँकी छ।
प्रहरी तथ्यांकअनुसार विभिन्न अपराध कार्यमा संलग्न भएको आरोप लागेका ४ सय ९४ जना पनि फरार रहेका छन्।
जसमा सुर्खेतबाट सबैभन्दा बढी १ सय १९ जना, दैलेखबाट २३, सल्यानबाट ८०, जाजरकोटबाट ८ र रुकुमबाट ५५ जना अभियुक्त फरार भएका छन्।
यस्तै जुम्लाबाट १ सय ४१, हुम्लाबाट ४ जना, डोल्पाबाट १७ जना, मुगुबाट १९ जना र कालिकोटबाट २८ जना अभियुक्त फरार छन्।
फरार अभियुक्त र दोषी ठहर भएका अपराधीहरुलाई प्रहरीले खोजी गरिरहेको डिआइजी शाहले जानकारी दिए। उनले अपराधरहित समाज निर्माणका लागि प्रहरीले काम गरिरहेको भन्दै अपराधमा संलग्नहरुलाई कानुनी कारबाहीको दायरामा ल्याउनका लागि सहयोग गर्न नागरिकसँग आग्रह समेत गरे।
कर्णालीमा विशेष गरी मानव बेचबिखन, बहुविवाह, बालविवाह, जबरजस्ती करणी, हत्या लगायतका अपराधजन्य कार्य बढी हुने गरेको पाइएको छ।
पछिल्लो तीन वर्षको तथ्यांकअनुसार सबैभन्दा धेरै जबरजस्ती करणी सम्बन्धी अपराध भएका छन्। आव २०७२/०७३ देखि आव २०७४/०७५ सम्म जबरजस्ती करणीका २ सय ७६ वटा घटना भएका छन्।
बहुविवाहका १ सय ३१, मानव बेचविखन सम्बन्धी २० वटा घटना भएको प्रहरीले जनाएको छ।
कर्णाली प्रदेशमा आत्महत्याका घटना पनि अधिक मात्रामा हुने गरेका छन्। पछिल्लो तीन वर्षमा ७ सय २ जनाले आत्महत्या गरेका छन्।
जसमा सबैभन्दा बढी झुण्डिएर आत्महत्या गर्नेको संख्या छ। आत्महत्या गर्नेहरूको संख्या बढेपछि कर्णाली प्रदेश प्रहरीले आत्महत्या विरुद्धको अभियान चलाउने भएको छ।
डिअाइजी शाहले कर्णालीमा आत्महत्या प्रमुख समस्याको रुपमा देखिएको भन्दै यसलाई न्यूनिकरण गर्न गाउँ–गाउँमा अभियान नै चलाउने जानकारी दिए।
उनले अभियानका लागि आन्तरिक मामिला तथा कानुन मन्त्रालयसँग सहकार्य गरिने समेत बताए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।