जनकपुर– सीताराम विवाह महोत्सवअन्तर्गत आज मटकोर विधि सम्पन्न भएको छ।
मिथिलाको विधिअनुसार जनकपुरधामस्थित गंगासागरबाट पवित्र माटो उत्खनन गरी मटकोर विधि सम्पन्न गरिएकाे हाे।
त्रेतायुगमा भगवान सीता र रामको विवाहका लागि यज्ञवेदी निर्माण गर्न उक्त सागरबाट पवित्र माटो उत्खनन् गरी लगिएकाले वर्षेनि विवाह पञ्चमी महोत्सवमा यसरी माटो लगिने परम्परा रहेको छ।
मिथिलाको विधि अनुसार बेहुली पक्षबाट मटकोर गरी दुलही सीतालाई पहेँलो रङको सारी, चोलीलगायत नयाँ लुगा लगाउन लगाई उक्त सागरमा नुहाउने प्रचलन छ।
मटकोर कार्यमा श्रद्धालु महिला संलग्न भई विवाह सम्बन्धी लोक भाका गाउने परम्परा छ। मटकोर कार्य सम्पन्न भएपछि मिथिलाञ्चलमा बदाम, पुरी र खीर वितरण गर्ने चलन रहेको छ।
मटकोर कार्यक्रमको प्रमुख अतिथि प्रदेशप्रमुख रत्नेश्वरलाल कायस्थ रहेका थिए।
विवाह पञ्चमी महोत्सवको पहिलो दिन नगर दर्शन, दोस्रो दिन फुलबारी लीला, तेस्रो दिन धनुष यज्ञ, चौथो दिन तिलकोत्सव हुँदै अाज पाँचौँ दिन मटकोर विधि सम्पन भएको हाे।
भोलि छैठौं दिन राम–सीता स्वयंवर तथा विवाह कार्यक्रम हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
