जनकपुर- जनकपुरमा सुरु भएको सप्ताहव्यापी रामजानकी विवाह महोत्सव अन्तर्गत आइतबार धनुष यज्ञ सम्पन्न भएको छ।
त्रेता युगमा भएको राम–सीताको विवाहको सम्झनामा जनकपुरमा प्रत्येक वर्ष मनाइने विवाह पञ्चमी महोत्सव यस वर्ष पनि धुमधामका साथ मनाइँदैछ।
मंसीर २१ गतेबाट सुरु भएको विवाहोत्सव पहिलो दिन जानकी नगर दर्शन गरी विधिवत रुपमा प्रारम्भ भएको थियो। शनिबारको कार्यक्रम फूलबारी लीला विवाहमण्डपको बगैँचामा गरिएको थियो भने तेश्रो दिन धनुष यज्ञ सम्पन्न भएको छ।
विवाह महोत्सवको चौथो दिन तिलकोत्सव, पाँचौँ दिन मटकोर र छैठौं दिन अर्थात् मंसिर २६ गते राम–सीता स्वयंवर तथा विवाह कार्यक्रम हुनेछ।
मंसीर २६ गते जनकपुरको जानकी मन्दिर परिसरमा वैदिक परम्परा अनुसार राम र सीताको वैवाहिक कार्यक्रम हुनेछ। विवाह महोत्सवको तयारी अन्तिम चरणमा पुगेको जानकी मन्दिरका छोटे महन्थ राम रोशन दास वैष्णवले बताए। वैवाहिक कार्यक्रमका लागि रामजानकी मन्दिर बेहुलीझैँ सिँगारिएको छ।
रामायणमा उल्लेख भएअनुसार त्रेता युगमा मिथिलाका राजा जनकले जनकपुरमा आफ्नी छोरी सीताको विवाहका लागि योग्य वरको चयन गर्न धनुष यज्ञ गरेका थिए। यसपछि तिलकोत्सवको आयोजना गरेका थिए। राजा जनकले शिवको अति नै बलियो धनुषयज्ञमा राखेर त्यसलाई उठाएर वाण चढाउन सक्ने व्यक्तिसँग छोरीको विवाह गर्ने शर्त राखेको कथा रामायणमा छ।
सो सर्त स्वीकार गर्दै अयोध्याका राजकुमार रामले धनुषयज्ञमा भाग लिई शिवको धनुषलाई उठाएर वाण चढाउन खोज्दा धनुष भाँचिएर तीन टुक्रामा विभाजित भएको र एक टुक्रा आकाशमा अर्को पातालमा र तेस्रो टुक्रा जनकपुरभन्दा २० किलोमिटर टाढा रहेको धनुषाधाम भन्ने स्थानमा खसेको किंवदन्ति छ।
धनुषाधाममा अहिले पनि ढुङ्गाको प्राकृतिक आकृति धनुषजस्तै बनेको देख्न सकिन्छ। सो धनुष खसेको स्थानमा मन्दिर बनाइएको छ भने त्यहाँ हजारौँ पर्यटक दर्शन गर्न जाने गर्छन्।
रामले धनुष भाँचेपछि राजा जनकले सीताको विवाह रामसँग गर्ने निर्णय गरेका थिए। सोही कथाका आधारमा जनकपुरमा प्रत्येक वर्ष विवाह महोत्वस गर्ने परम्परा छ।
विवाह महोत्सवमा सहभागी हुन आउने पर्यटकहरूका कारण जनकपुरका होटल, लोज र धर्मशालाहरू भरिभराउ छन्। साथै भक्तजनको सुविधाका लागि स्थानीय संघ संस्थाहरूले ठाँउ-ठाँउमा बासको प्रबन्धका लागि पन्डाल निर्माण गरिदिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
