काठमाडौं– बडिबिल्डिङको चर्चित र व्यवसायिक लिग ‘अन्तर्राष्ट्रिय फिटनेश फर बडिबिल्डिङ (आइएफबिबी) प्रोफेशनल लिग’ को फ्रेन्चाइज नेपाल ल्याइएको छ। आइएफबिबी प्रोफेशनल लिगले नेपाल च्याप्टरका लागि बडिबिल्डर सानु गुरुङलाई ‘फ्रेन्चाइज’ दिने निर्णय गरेको हो।
आइएफबिबी प्रोफेशनल लिगले आइएफबिबी लिग– नेपाल नामक संस्थालाई जिम्मेवारी सुम्पिएको हो। नेपाल च्याप्टरको अध्यक्षमा सानु गुरुङ रहेका छन्।
फ्रेन्चाइज नेपालमा भित्र्याएसँगै आइएफबिबी लिग – नेपालले आगामी फेब्रुअरी १५–१६ मा अन्तर्राष्ट्रिय बडिबिल्डिङका हस्तीहरूलाई सम्मिलित गरेर प्रतियोगिता आयोजना गर्ने भएको छ।
प्रतियोगिता आयोजनाका लागि विश्व बडिबिल्डिङका हस्ती बब चिकोरिलो नेपाल आउने पक्का भएको छ। उनले नै यो प्रतियोगिता सञ्चालन गर्ने शुक्रबार राजधानीमा आयोजित पत्रकार सम्मेलनमा जानकारी दिइयो। बब प्रतिष्ठित बडिबिल्डर हुन भने उनले ‘मिस्टर ओलम्पिया’ सञ्चालन गर्ने गरेका छन्।
नेपालमा पहिलोपटक आयोजना हुन लागेको प्रतियोगितामा २० भन्दा बढी राष्ट्रका खेलाडी भाग लिन आउने अध्यक्ष सानु गुरुङले जानकारी दिए। प्रतियोगितामा २ सयको हाराहारीमा खेलाडीले भाग लिने आयोजकको भनाइ छ। प्रतियोगिताको अनुमानित बजेट एक करोड ६८ लाख रुपैयाँ रहेको छ।
बडिबिल्डरलाई ‘विश्वकप’ मानिने ‘मिस्टर ओलम्पिया’ को ढोका
शारीरिक सुगठनको ‘विश्वकप’ मानिने ‘मिस्टर ओलम्पिया’ आइएफबिबी प्रोफेशनल लिगले मात्र आयोजना गर्दछ। ‘मिस्टर ओलम्पिया’ मा भाग लिन ‘प्रो कार्ड’ आवश्यक पर्ने गर्दछ।
नेपाल यसअघि यो संस्थामा आवद्ध थिएन। त्यसैले नेपाली खेलाडी ‘मिस्टर ओलम्पिया’ मा भाग लिने अवसरबाट बञ्चित थिए । तर, आइएफबिबी प्रोफेशनल लिगले नेपाल च्याप्टरका लागि सानु गुरुङलाई ‘फ्रेन्चाईज’ दिने निर्णय गरेपछि अब नेपाली खेलाडीले पनि ‘प्रो कार्ड’ पाउने ढोका खुलेको छ।
नेपालले यो प्रतियोगिताका लागि ४ वटा ‘प्रो कार्ड’ लिइसकेको छ। नेपालले ‘मेन्स फिजिक्स’, ‘क्लासिक फिजिक्स’, ‘मेन्स बडिबिल्डिङ’ र ‘ओमन्स फिटनेश’ तर्फको ‘प्रो कार्ड’ प्राप्त गरेको हो। नेपालमा हुने प्रतियोगितामा उल्लेखित चार विधामा उत्कृष्ट हुने बडिबिल्डरले ‘मिस्टर ओलम्पिया’ खेल्न पाउनेछन्।
नेपाल हुने प्रतियोगिताबाट चार खेलाडी मिस्टर ओलम्पियामा छनोट हुने भएकाले आइएफबिबी लिग– नेपाललाई ‘मिस्टर ओलम्पिया’ खेल्ने बाटोको रुपमा पनि लिन सकिन्छ। छिमेकी भारतले अहिलेसम्म ‘प्रो कार्ड’ लिन नसकेको अवस्थामा यो नेपाली खेलकुद जगतका लागि ठूलो उपलब्धि भएको आयोजकको दाबी छ।
अमेरिकामा मुख्यालय रहेको आइएफबिबी प्रोफेशनल लिगले सन् २०१९ को जनवरीमा आफ्नो क्यालेन्डरमा समेत नेपालमा हुने प्रतियोगिताको सम्पूर्ण व्यहोरा सार्वजनिक गर्ने अध्यक्ष गुरुङले बताए। जसका कारण नेपाली खेलकुदको विषयमा संसारभरी सकारात्मक सन्देश जाने गुरुङले पत्रकार सम्मेलनमा जानकारी दिए।
आइएफबिबी प्रोफेशनल लिगमा विश्वका १ सय ७० भन्दा बढी देश आबद्ध छन्। अमेरिकी मिडिया कम्पनीले सन् २००४ देखि आइएफबिबी प्रोफेशनल लिगसँग साझेदारको रुपमा काम गर्दै आइरहेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।