काठमाडौं– योनेक्स सनराइज नेपाल इन्टरनेशनल ब्याडमिन्टन सिरिजमा नेपालका विकास श्रेष्ठ अन्तिम ३२ मा पुगेका छन्। आज भएको अन्तिम ६४ को खेलमा माल्दिभ्सका सरिम मोहमदलाई २१–१५ र २१–७ ले हराउँदै विकासले अन्तिम ३२ मा स्थान पक्का गरेका हुन्।
यस्तै विजित थापा मगरले भुटानका सुभेसोन लामालाई २१–१९ र २१–७ ले हराएर अन्तिम ३२ मा पुगे। यस्तै प्रजुल महर्जनले मरिससका क्रिस्टोफर पाउलाई २१–१९ र २१–९ ले हराएर अन्तिम ३२ मा स्थान पक्का गरे।
दिपेश धामी पनि अन्तिम ३२ मा पुग्न सफल भए। उनले माल्दिभ्सका अहमेद नविललाई २१–५ र २१–९ ले हराए। प्रिंस दाहाले पनि अन्तिम ३२ मा पुग्ने क्रममा बंगलादेशका मंगल सिंहलाई २१–१५, १५–२१ र २१–९ ले पराजित गरे। नवीन श्रेष्ठले बंगलादेशका मोहमद सालमान खानलाई २१–१५ र २१–१९ ले हराएर अन्तिम ३२ मा स्थान पक्का गरे।
यता नेपालका साजनकृष्ण ताम्राकारलाई भियतनामका काओ कुवाङ पामले २१–१० र २१–१५ ले हराए। सुनील जोशी इरानका अमिर जबारीसँग २१–१७ र २१–१४ ले हार्दै अन्तिम ६४ बाटै बाहिरिए। रुकेश महर्जन, दीपक बोहोरा, इर्फान अन्सारी र गौतम कठायत पनि अन्तिम ६४ बाटै बाहिरिए।
नेपाल ब्याडमिन्टन संघको आयोजनामा हुने सिरिज हल्चोकस्थित एपीएफको ब्याडमिन्टन हलमा मंसिर २२ गतेसम्म संचालन हुनेछ। विश्व ब्याडमिन्टन महासंघको स्विकृत तथा ब्याडमिन्टन एशियाको कार्यक्रम अनुसार हुने सिरिज भएको हो।
सिरिजमा नेपाल सहित २० राष्ट्रका ६१ महिला र ११७ पुरुषसहित कुल १ सय ७८ खेलाडीले प्रतिस्पर्धा गरिरहेका छन्। सिरिजमा नेपालसहित, अमेरिका, जर्मनी, फ्रान्स,अष्ट्रेलिया, थाइल्याण्ड,मलेसिया, भारत, मरिसस, भुटान, श्रीलंका, बंगलादेश, इरान, मगोलिया, पाकिस्तान, माल्दिभ्स, भियतनाम, बहराइन, म्यानमार र सिंगापुरका खेलाडीले प्रतिस्पर्धा गर्नेछन्।
सिरिजमा पुरुष एकल, महिला एकल, पुरुष युगल, महिला युगल तथा मिश्रीत युगल गरि ५ स्पर्धामा प्रतिस्पर्धा हुनेछ । नेपालबाट पुरुष एकलमा १६ तथा महिला एकलमा १३ खेलाडीले प्रतिस्पर्धा गर्नेछन्।
सिरिजमा पुरुष र महिला एकल तर्फको विजेताले ७ सय ५० डलर, दोस्रोले ३ सय ८० डलर, सेमिफाइनल पुग्नेले १ सय ९० डलर, क्वाटरफाइनल पुग्नेले ३० डलर तथा अन्तिम १६ मा पुग्नेले १५.५ डलर पाउनेछन्।
यस्तै पुरुष युगल तथा महिला युगलतर्फको विजेताले ७ सय ९०, दोस्रोले ३ सय ८० डलर, सेमिफाइनल पुग्नेले २ सय ८० डलर , क्वाटरफाइनलमा पुग्नेले ३६.२५ डलर तथा अन्तिम १६ मा पुग्नेले १८.७५ डलर पाउनेछन्।
त्यस्तै मिश्रीत युगलतर्फ पनि विजेताले ७ सय ९०, दोस्रोले ३ सय ८० डलर, सेमिफाइनल पुग्नेले २ सय ८० डलर , क्वाटरफाइनलमा पुग्नेले ३६.२५ डलर तथा अन्तिम १६ मा पुग्नेले १८.७५ डलर पाउनेछन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।