काठमाडौं– राष्ट्रिय टिमका फरवार्ड विमल घर्तिमगर बुधबार बेल्जियम जाने भएका छन्। ट्रायलका लागि बेल्जियम जाने भएसँगै उनले सहिद स्मारक ए डिभिजन लिगका खेलहरु गुमाउने भएका छन्।
नवप्रवेसी च्यासल युथ क्लबमा आवद्ध विमलले युरोप ट्रायल दिन जाने बताएपछि क्लब छाड्न उनलाई यसअघि नै अनुमति थियो। उनी दुई साता अघि नै युरोप जाने बताइएपनि प्राविधिक समस्याका कारण बुधबार जान लागेका हुन्।
विमलले पनि लिगका खेलहरु गुमाउने पुष्टि गर्दै च्यासल युथ क्लब,अफिसियल र शुभचिन्तकलाई धन्यवाद दिएका छन्। फेसबुकमार्फत उनले ए डिभिजन लिगमा डेब्यू गर्दा खुसी लागेको बताएका छन्। तर च्यासलले राम्रो सुरुवात गर्न नसकेको बताएका उनले च्यासलसँगको यात्रा सकिएको लेखेका छन्।
यसअघि पनि युरोपका बेल्जियम र नेदरल्यान्ड्सको क्लबमा ट्रायल दिएका उनले अहिले कुन क्लबमा ट्रायल दिन लागेको खुलाएका छैनन्।
जारी सिजनको सुरुवाती ५ खेल खेल्दा च्यासलले १ खेलमा बराबरी र १ खेलमा जित निकलेको छ। ३ खेलमा भने हार बेहोरेको छ।
गत सिजन विमल भारतको चर्चित फुटबल क्लब मोहन बगानमा आबद्ध भएका थिए। सिजनको अन्तिम तीन महिना मात्र बाँकी रहँदा मोहन बगानले नेपालका मुख्य स्ट्राइकर विमललाई अनुबन्ध गरेको थियो। तर उनले क्लबमा सोचेअनुरुप मौका पाएका थिएनन्।
विमलले सिजनको सुरुवातमा राष्ट्रिय लिग च्याम्पियन थ्री स्टार क्लबबाट खेलेका थिए। थ्री स्टारले लिगका लागि २५ जना खेलाडीसँग सम्झौता गर्दा विमलसँग सम्झौता गरेको थिएन। थ्री स्टारसँग सम्झौता हुन नसकेपछि विमल च्यासलको सम्पर्कमा पुगेका थिए।
विमलले राष्ट्रिय टिममा डेब्यू गरेको ६ वर्षपछि यहि सिजनको ए डिभिजन लिग डेब्यू गरेका थिए।
उनले ‘ए’ डिभिजन लिगमा नवप्रवेशी क्लब च्यासलबाट मच्छिन्द्र क्लबबिरुद्ध खेल्दै डेब्यू गरेका थिए। अन्तिम समयमा च्यासलमा अनुबन्धित भएका विमलको ए डिभिजनमा डेब्यू भने सुखद रहन सकेको थिएन। उनको क्लब च्यासललाई मच्छिन्द्रले गोलरहित बराबरीमा रोकेको थियो।
१४ वर्षको उमेरमा बङ्गलादेशविरुद्ध मैत्रीपूर्ण खेलमार्फत राष्ट्रिय टोलीमा स्थान बनाउँदै आएका विमलले राष्ट्रिय टोलीका लागि ९ गोल गरिसकेका छन्। उनले सन् २०१२ देखि अहिलेसम्म २६ क्याप जितिसकेका छन्।
विमलले यसअघि २०७१ सालको राष्ट्रिय लिगमा सुदूरपश्चिमबाट खेलेका थिए । एन्फाको बुटवल एकेडेमीमा २०६७ सालमा प्रवेश गरेका विमलले त्यहाँ रहेर दुई वर्ष प्रशिक्षण गरे । सन् २०१२ को एएफसी यू–१४ प्रतियोगितामा राम्रो प्रदर्शन गरेपछि उनलाई राजधानीको एकडेमीमा ल्याइयो। राष्ट्रिय टोलीका तत्कालीन प्रशिक्षक कृष्ण थापाले १४ वर्षकै उमेरमा उनलाई राष्ट्रिय टोलीबाट खेलाएका थिए।
तस्बिरहरु : एन्फा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
