काठमाडौं– सहिद स्मारक ‘ए’ डिभिजन लिग फुटबल प्रतियोगितामा सशस्त्र प्रहरी बल (एपिएफ) क्लबले न्यूरोड टिम (एनआरटी)लाई पराजित गरेको छ।
सातदोबाटोस्थित एन्फा कम्प्लेक्स मैदानमा भएको खेलमा एपिएफले एनआरटीलाई २–१ गोलअन्तरले पराजित गरेको हो। जारी प्रतियोगितामा एपिएफको यो दोस्रो जित हो। यता अंक तालिकाको पुछारमा रहेको एनआरटीको यो लगातार पाँचौ हार हो।
पहिलो खेलमा त्रिभुवन आर्मीसँग २–२ गोलको बराबरी खेलेको एनआरटीले त्यसयता सबै खेलमा हार बेहोरेको छ। जितसँगै एपिएफले ७ अंक जोड्दै अंक तालिकाको सातौँ स्थानमा उक्लेको छ। एनआरटीको भने ६ खेलबाट १ अंक मात्र छ भने अंक तालिकाको १४औं स्थानमा छ।
यसअघि खेलको पाँचौं चरणको खेलसम्म विभागीय टोली एपिएफले लिगमा एकमात्र जित दर्ता गरेको थियो भने एकमा बराबरी र तीनवटा खेलमा पराजित भएको थियो। एपिएफको जितमा युवराज लामा र सुदीप शिख्राकारले एक–एक गोल गरे। युवराजले खेलको पहिलो हाफमा एक गोल गरे भने सुदीपले दोस्रो हाफमा गोल गरे।
खेल पाँचौं मिनेटमा युवराजले गोल गर्दै एपिएफलाई पहिलो अग्रता दिलाए। १० मिनेट पनि बित्न नपाउँदै एनआरटीका राजेश परियारले एक गोल फर्काए। खेलको ७३ मिनेटमा सुदिपले एक गोल थप्दै एपिएफको लागि विजयी गोल गरे। सुदिपले पेनाल्टीमा गोल गरेका हुन्। युवराज खड्कालाई एनआरटीका डिफेन्डरले लडाएपछि एपिएफले पेनाल्टीको मौका पाएको थियो।
अंक तालिकामा मनाङ मस्र्याङ्दी क्लब १५ अंक जोडेर पहिलो स्थानमा छ। त्रिभुवन आर्मी क्लब १३ अंकसाथ दोस्रो तथा १२ अंक जोडेको थ्रिस्टार क्लब तेस्रो स्थानमा छ।
तस्बिर : एन्फा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
