लमही– ट्राफिक प्रहरी कार्यालय तुलसीपुरले जथाभाबी हर्न बजाउने सवारी चालकलाई कारबाही गरेको छ। आइतबार र सोमबार हर्न बजाउने ९१ सवारी चालकलाई कारबाही गरेको ट्राफिक प्रहरी कार्यालय तुलसीपुरका प्रहरी नायब निरीक्षक विवेक महराले जानकरी दिए।
निषेधित क्षेत्रमा हर्न बजाउने आइतबार ४५ चालक तथा सोमबार ४६ चालकलाई कारबाही गरिएको छ। कारबाहीमा परेकाबाट जनही ५ सय रुपैयाँका दरले १६ हजार रुपैयाँ राजश्व सङ्कलन भएको महराले बताए। ती बाहेक अन्य सवारी चालकको कागजात जफत गरिएको छ। कारबाहीमा पर्नेमा सबैभन्दा बढी मोटरसाइकल चालक रहेका छन्।
हर्न निषेध अभियानलाई प्रभावकारी बनाउन प्रदेश प्रहरीले २०, इलाका प्रहरी कार्यालय तुलसीपुरले ७ तथा ट्राफिक प्रहरी कार्यालयले १० जना प्रहरी खटाएको छ। पैदलयात्रुलाई छेउबाट हिँडाउनका लागि वीरेन्द्र चोकमा ट्राफिक कोण राखेर डोरी बाँधिएको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
