काठमाडौं– एभरेष्ट प्रिमियर लिग (इपिएल) टी–२० क्रिकेट प्रतियोगिताका लागि साविक विजेता विराटनगर वारियर्सले ४ जना विदेशी खेलाडी आवद्ध गरेको छ। विराटनगरले हङकङका बाबर हायत, नेदरल्यान्ड्सका रोइलोफ भान डेर तथा पाउल भान मीकेरिन र भारतका स्मीत पटेललाई भित्र्याएको हो।
हायतले गत सिजन पनि विराटनगरबाट खेलेका थिए। हङकङका ओपनिङ ब्याट्सम्यान उनले अहिलेसम्म २२ एकदिवसीय र २४ टी–२० खेलेका छन्।
यस्तै भान डेर अलराउन्डर हुन्। उनले अहिलेसम्म १३ एकदिवसीय र २५ टी–२० खेलेका छन्। उनी इपिएल टिम दिल्ली डेयरडेभिल्स र रोयल च्यालेन्जर्स बैंग्लोर पनि आवद्ध थिए। तीव्र गतिका बलर भान मीकेरिन अहिलेसम्म ४ एकदिवसीय र २३ टी–२० खेलेका छन्।
स्मीत पटेल भारतको प्रदेश स्तरिय क्रिकेट खेल्छन्। उनी गत महिना पोखरामा भएको पिपिएलमा चितवन राइनोजमा आवद्ध थिए।
यता विराटनगरले प्रशिक्षकमा भारतका उमेश पटुवाललाई आवद्ध गरेको थियो। नेपालको कन्सल्टेन्स ब्याटिङ प्रशिक्षक भइसकेका उनी पिपिएलको निर्देशक थिए।
आगामी मंसिर २२ देखि हुने तय भएको इपिएल कीर्तिपुरस्थित त्रिभुवन विश्वविद्यालयको मैदानमा हुनेछ। इपिएलमा काठमाडौं किंग्स इलेभेन, ललितपुर पाट्रिओट्स, विराटनगर वारियर्स, भैरहवा ग्लाडिएटर, पोखरा राइनोज् र चितवन टाइगर्सले प्रतिस्पर्धा गर्नेछन्। उद्घाटन खेलमा विराटनगर वारियर्स र ललितपुर पाट्रिओट्सबीच प्रतिस्पर्धा हुनेछ। १५ दिन चल्ने लिगमा १९ खेल हुनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
