काठमाडौं– एभरेष्ट प्रिमियर लिग (इपिएल) टी–२० क्रिकेट प्रतियोगिता सुरु हुनुअघि काठमाडौं किंग्स ११ लाई झड्का लागेको छ। काठमाडौंमा विदेशी खेलाडीको रुपमा आवद्ध भएङ्का जिम्बावेका अलराउन्डर सिकन्दर राजाले इपिएल सुरु हुनु ५ दिन अघि नआउने बताएका छन्।
राजाले सोमबार ट्वीटरमार्फत इपिएलका लागि आउन नसक्ने बताएका हुन्। उनले यो सिजनका लागि आउन नसकेको बताउँदै काठमाडौंलाई शुभकामना समेत दिएका छन्। उनले अर्को सिजन नेपाल आउने आसा व्यक्त गर्दै नेपालमा रहेका आफ्ना शुभचिन्तकसँग माफी मागेका छन्।
जिम्बावेको राष्ट्रिय टिमको कप्तानी सम्हालिसकेका राजा १२ टेस्ट, ८८ एकदिवसीय र २८ टि–२० खेलेका छन्। उनले टेस्टमा १ र एकदिवसीयमा ३ शतक प्रहार गरेका छन्। गत वर्ष जिम्बावेमै भएको एकदिवसीय विश्वकप छनोटमा उनले नेपालविरुद्ध शतक प्रहार गरेका थिए।
काठमाडौंले राजासँग सम्झौता भएको गत भदौंमा नै सार्वजनिक गरेको थियो। सोमपाल कामी मार्की खेलाडी रहेको काठमाडौंमा राजासँगै आयरल्यान्डका केभिन ओ'ब्रायन र युएईका कप्तान रोहन मुस्ताफासँग सम्झौता गरेको थियो।
आगामी मंसिर २२ देखि हुने तय भएको इपिएल कीर्तिपुरस्थित त्रिभुवन विश्वविद्यालयको मैदानमा हुनेछ। इपिएलमा काठमाडौं किंग्स इलेभेन, ललितपुर पाट्रिओट्स, विराटनगर वारियर्स, भैरहवा ग्लाडिएटर, पोखरा राइनोज् र चितवन टाइगर्सले प्रतिस्पर्धा गर्नेछन्। उद्घाटन खेलमा विराटनगर वारियर्स र ललितपुर पाट्रिओट्सबीच प्रतिस्पर्धा हुनेछ। १५ दिन चल्ने लिगमा १९ खेल हुनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
