कैलाली– टीकापुरमा भएका दुई वटा घटनामा परी ३ जनाको ज्यान गएको छ । टीकापुर नगरपालिकाको वडा नं ७ खैरीमा आइतबार राति साढे ८ बजेतिर अनटेष्ट मोटरसाइकल डन्लपमा ठोक्किंदा त्यसमा सवार टीकापुर वडा नं ७ बैदीका ३८ वर्षका जिवानन्द कोइराला र २७ वर्षका विष्णु रिमालको ज्यान गएको हो।
उनीहरुलाई उपचारका लागि टीकापुर अस्पताल ल्याउँदै गर्दा बाटैमा ज्यान गएको इलाका प्रहरी कार्यालय टीकापुरका प्रहरी सहायक निरीक्षक भानु बजगाईंले जानकारी दिए।
मोटरसाइकल चालक पवन पाण्डेको हात भाँच्चिएको छ। उनको कोहलपुर मेडिकल कलेजमा र अर्का घाइते डन्लप चालक बम्पर चौधरीको नेपालगञ्जमा उपचार भइरहेको छ। मोटरसाइकल चालक पवनका जिवान्नद मामा र विष्णु भिनाजु रहेको पारिवारिक स्राेतले जनाएको छ।
यस्तै टीकापुर नगरपालिका– २ बन्दिपुरमा टायर पञ्चर भई रोकिराखेको ट्याक्टरको ट्रलीमा से६प १९४१ नं.को मोटरसाइकल ठोकिंदा मोटरसाइकल चालक अस्नेहरीका आशिष चौधरीकाे ज्यान गएकाे छ। दुर्घटनामा घाइते भई उपचारका लागि कोहलपुर रेफर भएकोमा उनको ज्यान गएको प्रहरीले जानकारी दिएको छ।
मोटरसाइकलमा सवार महेन्द्र चौधरीको टीकापुर अस्पतालमा उपचार भएको छ। मृतक जिवानन्द र विष्णुको शब टीकापुर अस्पतालमा राखिएको छ भने चौधरीको शव पनि कोहलपुरबाट टीकापुर ल्याउन लागेको इलाका प्रहरी कार्यालय टीकापुरले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
