काठमाडाैं– ‘एसिया प्यासिफिक समिट’मा सहभागी हुन आएकी म्यानमारकी स्टेट काउन्सिलर आङसाङ सुकी स्वदेश फर्किएकी छन्। काठमाडौंमा आयोजना भएको समिटमा सहभागी हुन सुकी मंसिर १३ गते काठमाडौं आएकी थिइन्।
नेपालमा रहँदा सुकीले राष्ट्रपति विद्यादेवी भण्डारी, प्रधानमन्त्री केपी शर्मा ओली, परराष्ट्रमन्त्री प्रदीप ज्ञवालीसँग छुट्टा छुट्टै भेटवार्ता गरेकी थिइन्। उनी युनिभर्सल पिस फेडेरेसनको आयोजना र नेपाल सरकारको सह–आयोजनामा सम्पन्न हुँदै गरेको कार्यक्रममा सहभागी हुन नेपाल आएकी हुन्।
तीन साताअघि संयुक्त राष्ट्रसंघमा म्यानमारको रोहिङ्ग्याको मानव अधिकारको विषयमा भएको निर्वाचनमा नेपाल अनुपस्थित भएर म्यानमारको साथ दिएको थियो। यस्तै गत वर्षबाट नेपाल राष्ट्रसंघको मानव अधिकार आयोगको सदस्यका रुपमा निर्वाचित भएकाले रोहिङ्ग्या समस्यामा नेपालको साथ खोज्न नेपाल भ्रमणमा आएको चर्चा चलेको छ।
यस्तै ‘प्यासिफिक समिट’मा आज प्रधानमन्त्री ओलीलाई युनिभर्सल पिस फेडेरेसनले सम्मान गर्दैछ। फेडेरेसनका तर्फबाट संस्थाकी प्रमुख हक जा हानले सम्मान प्रदान गर्न लागेकी हुन्। आज नै १५ सय जोडीलाई पनि हानले नै आशिर्वाद दिने कार्यक्रम रहेको छ।
इसाई धर्म प्रचार गर्ने आइएनजीओको कार्यक्रममा सरकार सहभागी भएको भन्दै कार्यक्रमको विपक्षी दल नेपाली कांग्रेस लगायत विभिन्न वर्गका मानिसहरूले विरोध गरेका छन्।
दुई दिने कार्यक्रममा सहभागी हुन नेपाल आएकी सुकीलाई उप–प्रधान तथा रक्षामन्त्री ईश्वर पोखरेलले त्रिभुवन विमान स्थलको अति विशिष्ट कक्षबाट विदाइ गरेका छन्। कार्यक्रम आज समापन हुँदैछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
