काठमाडौं- स्थानीय तहको तेस्रो चरणको निर्वाचनका लागि मनोनयन मिति दुई दिन बाँकी हुँदा राजनीतिक दलहरुले अझैसम्म उम्मेदवार टुंगो लगाउन सकेका छैनन्।
उम्मेदवारहरुको आकांक्षी बढी र आन्तरिक सन्तुलन समेत मिलाउनुपर्ने भएपछि दलहरुलाई उम्मेदवार छनोट गर्न मुस्किल परेको हो। प्रदेश नम्बर २ को ८ जिल्लाका १ सय ३६ स्थानीय तहमा असोज २ गते हुने निर्वाचनका लागि दलहरुले भाद्र २१ गतेभित्र उम्मेदवारको मनोनयन गरिसक्नुपर्नेछ।
निर्वाचन आयोगले उम्मेदवारी मनोननयनका लागि भदौ २१ गतेको मिति तोकेको छ । दुई दिन मात्रै समय बाँकी रहँदा संघीय समाजवादी फोरम नेपाल बाहेकका कुनै पनि दलले उम्मेदवारको टुंगो लगाउन सकेका छैनन् । उम्मेदवारको नाम तय गर्न दलहरु आन्तरिक छलफलमा व्यस्त छन्। ठूला दलहरु एक-अर्को दलको उम्मेदवार घोषणा कुरिरहेकाले नामावली तय गर्न ढिलाइ भइरहेको छ।
नेपाली कांग्रेसले उम्मेदवारको नामावली तयार गरिसकेको दाबी गरे पनि सार्वजनिक गरेको छैन । प्रधानमन्त्री तथा कांग्रेस सभापति शेरबहादुर देउवा पक्ष र नेता रामचन्द्र पौडेलबीच सन्तुलन मिलाउनुपर्ने कारण नामावलीलाई अन्तिम रुप दिन नसकेको हो । देउवा अस्वस्थ रहेको र नेता पौडेल युएईको भ्रमणमा छन्।
पार्टी कार्यालयका मुख्य सचिव कृष्ण पौडेलले एक-दुई दिनमै उम्मेदवारको टुंगो लगाउने बताए। 'नामावली एकसरो तयार भए पनि अन्तिम रुप दिन बाँकी छ, एक-दुई दिनमै उम्मेदवारको सूची सार्वजनिक हुन्छ', पौडेलले भने।
कांग्रेसभित्र विवादका कारण नामावली घोषणा हुन ढिलाइ भइरहेको बताइरहँदा विवादको कुरा हल्ला मात्र भएको केन्द्रीय सदस्य कल्याण गुरुङले दाबी गरे ।
तराई सुगम जिल्ला भएकाले प्रचारका लागि समस्या नहुने र अन्य प्रतिस्पर्धी दलहरुले समेत उम्मेदवार सार्वजनिक नगरेकाले केही दिन पर्खेको गुरुङले बताए । उनले भने, 'सोमबारसम्ममा सबै तहमा उम्मेदवार हुने व्यक्तिको नाम सार्वजनिक गरी प्रचारको जिम्मेवारी दिइनेछ।'
उम्मेदवार छान्न महामन्त्री शशांक कोइराला, विमलेन्द्र निधि, कोषाध्यक्ष सीतादेवी यादव र दुई नम्बर प्रदेशका केन्द्रीय सदस्यहरु सहभागी भएको गुरुङले जानकारी दिए।
यता नेकपा एमालेलाई आकांक्षीलाई चित्त बुझाउन समय लागेपछि उम्मेदवार टुंगो लगाउन अप्ठ्यारो भएको छ। उम्मेदवार टुंगो लगाउन शनिबार बसेको स्थायी समिति बैठकले वीरगञ्ज महानगरपालिका, कलैया उपमहानगर र जितपुर सिमराका उम्मेदवारहरुको नाम टुंगो लगाएको छ।
एमालेले वीरगञ्जमा बसरुद्दिन अन्सारीलाई मेयर र सोफिया आचार्यलाई उपमेयरको उम्मेदवार बनाएको छ। त्रिभुवन विश्वविद्यालयले सम्बन्धन स्थगित गरेको विवादित काठमाडौं नेसनल मेडिकल कलेजका सञ्चालक समेत रहेका अन्सारी केही समयअघि मात्र माओवादी केन्द्र छाडेर एमाले प्रवेश गरेका थिए।
बाराको कलैया उपमहानगरपालिका प्रमुखमा विनोद साह र उपमेयरमा प्रतिमा यादवलाई उम्मेदवार बनाएको छ भने बाराकै जितपुर सिमरा उपमहानगरपालि प्रमुखमा कृष्ण पौडेल र उपप्रमुखमा सरस्वती चौधरीलाई टिकट दिएको छ।
एमालेले बाँकी ठाउँमा उम्मेदवारको नाम टुंगो लगाउने भन्दै आइतबार पनि स्थायी समिति बैठक बोलाएको छ।
'हाम्रोमा आकांक्षी बढी भएर व्यवस्थापन गर्न समय लागेको हो । आज हामी नाम टुंगो लगाउछौं', एमाले सचिव योगेश भट्टराईले नेपाल लाइभलाई भने।
माओवादी केन्द्र पनि उम्मेदवारको नामावली तयार गर्न जुटेको छ। शनिबार वीरगञ्जमा बसेको केन्द्रीय सचिवालय बैठकले नामावली तयार गर्न नसकेपछि माओवादी केन्द्र आइतबार पनि छलफलमा व्यस्त छ।
नेता नारायणकाजी श्रेष्ठले आंकाक्षीहरुलाई मनाउन नसक्दा उम्मेदवार छनोटमा ढिला भएको प्रतिक्रिया दिएका छन्। सम्भवत: आज उम्मेदवारको नाम टुंगिने उनले बताए।
केन्द्र केही दिनदेखि तराईमै पुगेर उम्मेदवार चयनमा लागिरहेको छ । अध्यक्ष पुष्पकमल दाहाल 'प्रचण्ड' समेत केही दिनयता तराईमै छन् । तराईका मतदातालाई रिझाउनेदेखि पार्टी प्रवेशका कार्यक्रममा दाहाल आफैं सहभागी भएर तराईमा माओवादीको अवस्था सुधार्न जुटिरहेका छन्।
माओवादीले वीरगञ्ज महानगरपालिकामा मेयरको रुपमा रहबर अन्सारीलाई अगाडि सारेको छ । गण्डक मेडिकल कलेज सञ्चालक अन्सारीको नाम पार्टीले घोषणा गरिनसके पनि उनी नै हुने तय भएकाले प्रचार समेत सुरु भइसकेको छ ।
राष्ट्रिय जनता पार्टीका जिल्ला कमिटीले प्रत्येक जिल्लाबाट उम्मेदवारको सम्भावित नामावली केन्द्रमा सिफारिस गरिसकेका छन् । राजपाले उम्मेदवारको नामावली टुंगो लगाउने जिम्मा अध्यक्ष मण्डलका नेता महन्थ ठाकुरलाई दिएको छ । ठाकुर नेतृत्वको उच्चस्तरीय समितिले केही दिनमै उम्मेदवारको नाम टुंगो लगाउने अध्यक्ष मण्डलका सदस्य महिन्द्र राय यादवले बताए।
'हामीले ठाकुरजीलाई उम्मेदवारको टुंगो लगाउने जिम्मा दिएका छौं, भोली उम्मेदवारको सूची सार्वजनिक गर्ने जानकारी उहाँले गराउनुभएको छ,' यादवले भने।
प्रदेश नम्बर २ का आठ जिल्लामा १ महानगर, ३ उपमहानगर, ७३ नगरपालिका र ५९ गाउँपालिकामा असोज २ गते निर्वाचन हुनेछ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
