काठमाडौं– राष्ट्रिय पुनर्निर्माण प्राधिकरणले भने पुस मसान्तसम्म तीन लाख घर निर्माण सम्पन्न हुने दाबी गरेको छ।
भूकम्प अति प्रभावित १४ जिल्लामा निर्माण सम्पन्न र निर्माणाधीन घरको संख्या हाल दुई लाख नाघेको र दुई महिनामा एक लाख थप हुने दाबी राष्ट्रिय पुनर्निर्माण प्राधिकरणले गरेको छ।
निजी आवास पुनर्निर्माणको तथ्याङ्क अद्यावधिक गर्ने निकाय शहरी विकास मन्त्रालय अन्तर्गतको केन्द्रीय आयोजना कार्यान्वयन इकाइको सोमवार दिउँसो २ बजेसम्मको तथ्याङ्क अनुसार भूकम्प अति प्रभावित १४ जिल्लामा निर्माण सम्पन्न र निर्माणाधीन घरको संख्या दुई लाख एक हजार ५ सय १९ पुगेको प्राधिकरणले जनाएको छ।
निर्माण सम्पन्न घरको संख्या ५८ हजार ६ सय ५६ र निर्माणाधीन घरको संख्या १ लाख ४२ हजार ८ सय ६३ पुगेको छ।
दशैं तिहारका कारण निर्माण सम्पन्न भएका र निर्माणाधीन घरको संख्या प्राधिकरणको तथ्यांकमा समावेश हुन बाँकी रहेकाले संख्या बढ्ने प्राधिकरणका इन्जिनियर प्रविण आचार्यले बताए। राष्ट्रिय पुनर्निर्माण प्राधिकरणले निजी आवास अनुदानका लागि समय सीमा निर्धारण गरेपछि घर बन्ने प्रक्रिया तिब्रता पाएको उनले दाबी गरे।
तर अधिकांश लाभग्राही अझै पनि पालमै रहेको भनी आलोचना भइरहेको छ।
‘जिल्लास्थित कार्यालय, जिल्ला कार्यान्वयन इकाइ र स्थलगत अध्ययनबाट आगामी पुस मसान्तसम्ममा निर्माण सम्पन्न र निर्माणधीन घरको संख्या ३ लाख ५० हजार पुग्ने देखिएको छ’, इन्जिनियर आचार्यले भने।
प्रधानमन्त्री नेतृत्वको निर्देशक समितिको पछिल्लो बैठकको निर्णय अनुसार प्राधिकरणले पहिलो किस्ता लिइसकेका लाभग्राहीले आगामी पौष समान्तसम्म दोस्रो किस्ता लिइसक्नुपर्ने समय तालिका निर्धारण गरेको छ।
अहिलेसम्म प्राधिकरणको सूचना प्रणालीमा दर्ता भएको तथ्याङ्क अनुसार सिन्धुपाल्चोकमा सबैभन्दा धेरै १८ हजार ८ सय ७२ घर निर्माणाधीन अवस्थामा छन् भने ६ हजार १ सय ७५ घर निर्माण सम्पन्न भइसकेका छन्।
जिल्लामा निर्माणाधीन र निर्माण सम्पन्न कतिपय घरको प्राविधिक निरीक्षण गरेर तथ्याङ्क संकलन गर्ने कार्य भइरहेको र तिहारपछि उक्त तथ्याङ्क सूचना प्रणालीमा दर्ता भएपछि यो संख्यामा उल्लेखनीय बृद्धि हुने प्राधिकरणको भनाई छ।
हालै पुनर्निर्माण सम्पन्न सुनकोशी–६, खनियाडाँडास्थित आफ्नो घरअगाडि शान्ता सार्की
समन्वय अभावका कारण किस्ता वितरणमा ढिलाइको गुनासो
लाभग्राहीलाई घर निर्माणका लागि रकम अभाव नहोस् भनी प्राधिकरणले अग्रिम रुपमा बजेट जिल्ला पठाए पनि कोष तथा लेखा नियन्त्रण कार्यालय र बैंकहरुको समन्वयको अभावमा अनुदान रकम वितरणमा तिव्रता आउन सकेको छैन।
प्राधिकरणले ५३ अर्ब रुपैया बजेट अनुदान किस्ता वितरणका लागि भूकम्प प्रभावित जिल्लामा पठाइसकेको दाबी गरेको छ। तर, विभिन्न प्रक्रियागत झन्झट र जिल्लास्थित निकायबीचको आपसी समन्वयमा देखिएको कमजोरीका कारण रकम वितरणमा तिब्रता नआएको उसको दाबी छ।
हाल अति प्रभावित १४ जिल्लामा दोस्रो किस्ता पाउनका लागि लागि १ लाख ४ हजार ७ सय ४२ लाभग्राहीले निवेदन दिइसकेको छन् भने ९३ हजार ३ सय ५ लाभग्राहीको निवेदन प्रमाणीकरण भइसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769166231.png)
-1769158577.png)
-1769161919.png)
-1764146706.png)
