काठमाडौं– जापानका रोजगारदाताबाट नेपाली कामदारको माग ल्याएर म्यानपावर कम्पनीमार्फत कामदार पठाउने भन्दै नेपाली कामदारसँग चर्को रकम असुल्ने गरेको आरोप लागेका जापानी बिचौलिया यामानो शिनिचिरोसँग नेपाल वैदेशिक रोजगार व्यवसायी संघले सहकार्य गर्न लागेको भन्दै संघकै पदाधिकारी असन्तुष्ट बनेका छन्।
जापानका विभिन्न कम्पनीबाट कामदारको माग ल्याएर नेपाली म्यानपावर कम्पनीलाई उपलब्ध गराउने र रोजगारदाताले सम्पूर्ण खर्च व्यहोरेर कामदार निःशुल्क जापान जानुपर्ने व्यवस्थाका बाबजुद यामानोले कामदारसँग प्रतिव्यक्ति ७ लाख रुपैयाँसम्म उठाउने गरेको व्यवसायीहरूको आरोप छ। यामानोसँग संघले सहकार्य गर्न लागेको विषयमा भने संघभित्रै असन्तुष्टि देखिएको व्यवसायीहरूको भनाइ छ।
संघका महासचिव हिराबहादुर डाँगी (हरि)ले भने संघको पहलमा जापानी रोजगारदाता कम्पनी र नेपालका इजाजतपत्रवाला वैदेशिक रोजगार व्यवसायी संस्थाबीच रोजगार मेला सञ्चालन गर्ने विषयमा छलफल भइरहेको बताएका छन्। डाँगीका अनुसार २०२६ नोभेम्बरमा नेपालमा रोजगार मेला (Job Fair) सञ्चालन गर्ने सम्बन्धमा जापानका रोजगारदाता कम्पनी तथा नेपाली इजाजतपत्रवाला व्यवसायीबीच महत्वपूर्ण छलफल सम्पन्न भएको छ।
महासचिव डाँगीले व्यवसायीहरूलाई जानकारी गराउँदै भनेका छन्, “नेपाल वैदेशिक रोजगार व्यवसायी संघको पहलमा २०२६ नोभेम्बर महिनामा जापानका रोजगारदाता कम्पनीहरू तथा नेपालका इजाजतपत्रवाला वैदेशिक रोजगार व्यवसायी संस्थाहरूबीच नेपालमा रोजगार मेला (Job Fair) सञ्चालन गर्ने सम्बन्धमा महत्वपूर्ण छलफल सम्पन्न भएको छ।”
उनका अनुसार उक्त छलफलमा जापानका रोजगारदाता कम्पनीहरूको प्रत्यक्ष सहभागितामा नेपाली श्रमिकका लागि रोजगारीका अवसर सिर्जना गर्ने, रोजगारदाता र नेपालका इजाजतपत्रवाला संस्थाबीच समन्वय तथा सहकार्य गर्ने र रोजगार मेलालाई प्रभावकारी रूपमा सञ्चालन गर्ने विषयमा विस्तृत छलफल भएको थियो।
यता, व्यवसायीहरूका अनुसार यामानो हरेक तीन महिनामा नेपाल आउने गरेका छन्। नेपाल आएर कामदारसँग गैरकानुनी रूपमा रकम उठाउने र हुन्डीमार्फत रकम जापान लैजाने गरेको आरोपसमेत उनीमाथि लागेको छ।
यामानोले यसअघि पनि विभिन्न नेपाली म्यानपावर कम्पनीसँग जापानमा कामदारको माग ल्याइदिने भन्दै १० लाखदेखि १५ लाख रुपैयाँसम्म रकम लिएको व्यवसायीहरूको दाबी छ। तर, प्रतिबद्धताअनुसार माग नल्याएपछि सम्बन्धित म्यानपावर कम्पनीलाई रकम फिर्ता गरेको उनीहरूको भनाइ छ।
नेपालमा यामानोलाई रमेश लामाले समन्वय तथा सहयोग गर्ने गरेको व्यवसायीहरूको आरोप छ। संघकै पूर्वएक पदाधिकारीले आफूले समेत यामानोलाई ६ महिनाअघि १५ लाख रुपैयाँ दिएको दाबी गरे।
“६ महिनाअघि डिमाण्ड ल्याइदिने भनेर उनले मसँग १५ लाख लिए। तर डिमाण्ड नल्याएपछि उनले त्यो रकम फिर्ता गरे। उनको शर्त डिमाण्ड ल्याएबापत कामदारबाट पैसा उठाएर दिनुपर्ने रहेछ,” ती पूर्वपदाधिकारीले भने।
नेपाल सरकारले जापानमा दक्ष कामदार पठाउने सम्बन्धमा तयार गरेको कार्यविधिअनुसार कामदारको सम्पूर्ण खर्च रोजगारदाताले व्यहोर्नुपर्ने व्यवस्था छ। यस्तो व्यवस्थाबीच कामदारबाट लाखौं रुपैयाँ असुल्ने गतिविधि भएमा त्यसले जापान रोजगारीको ‘निःशुल्क’ प्रक्रियामाथि प्रश्न उठाउने व्यवसायीहरूको भनाइ छ।
“सहकार्य गर्नुअघि त्यो व्यक्तिको पृष्ठभूमि पनि हेरिनुपर्छ। उनी हरेक तीन महिनामा नेपाल आएर के गतिविधि गरिरहेका छन्, कामदार लैजाने प्रक्रिया कस्तो छ, बरु त्यो पो संघले हेर्नुपर्छ। त्यस विषयमा पो चनाखो हुनुपर्छ,” एक व्यवसायीले भने।
संघले यामानो शिनिचिरोसँगको सहकार्यको ठ्याक्कै प्रकृति, उनको भूमिका, कामदारबाट रकम उठाउने विषयमा लागेको आरोप र संघले अपनाउने निगरानी संयन्त्रबारे भने थप स्पष्ट धारणा सार्वजनिक गर्न बाँकी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
