काठमाडौं– नेपालमा लगानी तथा व्यावसायिक प्रयोजनका लागि लिएको भिसाको उद्देश्यविपरीत काम गरेको पाइएपछि ८८ जना चिनियाँ नागरिक कारबाहीमा परेका छन्। अध्यागमन विभागले उनीहरूको व्यावसायिक भिसा रद्द गरी जरिवानासहित नेपालबाट निष्कासन गर्ने प्रक्रिया अघि बढाएको छ।
अध्यागमन विभागले सम्बन्धित निकायसँगको समन्वयमा गरेको अनुगमनका क्रममा विदेशी नागरिकहरू आफूले भिसा प्राप्त गर्दा उल्लेख गरेको व्यवसाय वा लगानीसँग सम्बन्धित कामभन्दा फरक प्रकृतिको रोजगारी, श्रम तथा अन्य गतिविधिमा संलग्न रहेको भेटिएको जनाएको छ।
त्यसक्रममा सिन्धुलीको मरिण गाउँपालिका–४, साहानस्थित जियान फुड्स प्रालिमा कार्यरत ८८ जना चिनियाँ नागरिकले भिसाको उद्देश्यअनुसार काम नगरेको पाइएको हो। उनीहरूले अन्य कम्पनीको नाममा व्यावसायिक भिसा लिएर उक्त उद्योगमा काम गरिरहेको अनुगमनबाट खुलेको स्रोतको भनाइ छ।
चीनमा प्रशोधित भैँसीको मासु निर्यात गर्ने उद्देश्यले निर्माण भइरहेको उक्त उद्योगमा चीनको छेङ्दु तियान फुड लिमिटेडको आर्थिक साझेदारी रहेको छ। उद्योग निर्माणकै चरणमा रहे पनि त्यहाँ ठूलो संख्यामा चिनियाँ नागरिक कार्यरत रहेको विषय यसअघि पनि विवादमा आएको थियो।
अध्यागमन विभागका अनुसार व्यावसायिक भिसा लिँदा जुन उद्देश्य र व्यवसायका लागि स्वीकृति दिइएको हुन्छ, विदेशी नागरिकले नेपालमा रहँदा त्यही उद्देश्यअनुसारका गतिविधि गर्नुपर्छ। भिसाको आधार रोजगारी वा श्रमका लागि नभएको अवस्थामा सोही भिसाबाट अन्यत्र वा अन्य प्रकृतिको काम गर्न पाइँदैन।
अध्यागमन ऐन, २०४९ अनुसार कारबाही
भिसाको उद्देश्यविपरीत काम गरेको पुष्टि भएपछि ८८ जनाको व्यावसायिक भिसा रद्द गरिएको हो। उनीहरूलाई अध्यागमन ऐन, २०४९ बमोजिम जरिवाना गराएर निष्कासन गर्ने प्रक्रिया अघि बढाइएको अध्यागमन स्रोतले जनाएको छ।
अध्यागमन नियमावली, २०५१ ले पनि व्यावसायिक भिसा प्राप्त गरेका विदेशी नागरिकले भिसा स्वीकृतिको उद्देश्यअनुसार नेपालमा बस्नुपर्ने व्यवस्था गरेको छ। त्यस्तो भिसालाई रोजगारी, श्रम वा अन्य असम्बन्धित काममा प्रयोग गर्न नपाइने व्यवस्था छ।
विभागले पछिल्लो समय विदेशी नागरिकको भिसा प्रयोग र उनीहरू संलग्न गतिविधिबारे अनुगमन बढाएको जनाएको छ। विभागले विदेशी नागरिकलाई आफूले प्राप्त गरेको भिसाको उद्देश्य र सर्तअनुसार मात्रै गतिविधि गर्न आग्रह गर्दै आएको छ।
त्यस्तै, उद्योग, कम्पनी, प्रतिष्ठान तथा रोजगारदातालाई पनि सम्बन्धित निकायको स्वीकृति र उपयुक्त भिसाबिना विदेशी नागरिकलाई काममा नलगाउन निर्देशन दिइएको छ।
यसअघि नै उठेको थियो ठूलो संख्यामा चिनियाँ कामदारको प्रश्न
सिन्धुलीको यही मासु प्रशोधन उद्योगमा ठूलो संख्यामा चिनियाँ नागरिक कार्यरत रहेको विषय यसअघि पनि सार्वजनिक भएको थियो। उद्योग निर्माणका क्रममा करिब ५०१ जना चिनियाँ नागरिक कार्यरत रहेको र तीमध्ये अधिकांशले भिसाको उद्देश्यविपरीत काम गरिरहेको पाइएको विवरण सार्वजनिक भएको थियो।
सिन्धुली प्रशासनले गरेको अनुगमनका क्रममा केही विदेशी नागरिकले व्यावसायिक भिसाको सर्तविपरीत काम गरेको र केहीसँग राहदानीसमेत नरहेको पाइएको थियो।
त्यसपछि विदेशी नागरिकको भिसा, उनीहरूलाई काममा लगाउने कम्पनी र उनीहरूको वास्तविक कार्यक्षेत्रबारे प्रश्न उठेको थियो। पछिल्लो अनुगमनपछि भने ८८ जनाको भिसा रद्द गरी जरिवानासहित निष्कासनको प्रक्रिया अघि बढाइएको हो।
यस घटनाले नेपालमा विदेशी लगानी तथा व्यावसायिक प्रयोजनका लागि आउने विदेशी नागरिकले लिने भिसाको प्रयोग र उनीहरूलाई काममा लगाउने कम्पनीमाथि नियमन तथा अनुगमनको विषयलाई पुनः चर्चामा ल्याएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
