काठमाडौं– नेपाली कम्युनिष्ट पार्टीका सांसद युवराज दुलालले त्रिपुरेश्वरस्थित राहदानी विभागअगाडि सार्वजनिक बसमा आगलागी हुँदा चालक अर्जुन लामा दोङको मृत्यु भएको घटनाको सत्यतथ्य छानबिन गर्न उच्चस्तरीय न्यायिक छानबिन आयोग गठन गर्न सरकारसँग माग गरेका छन्।
मंगलबार बसेको प्रतिनिधिसभाको बैठकमा बोल्दै सांसद दुलालले ट्राफिक प्रहरी र चालकबीच विवाद भएपछि बसमा आगलागी भएको र चालकको मृत्यु भएको घटनाप्रति दुःख व्यक्त गरे।
उनले भने, ‘सबभन्दा पहिला म यो घटनाप्रति दुःख व्यक्त गर्न चाहन्छु। मृतक अर्जुन लामा दोङप्रति हार्दिक श्रद्धाञ्जली व्यक्त गर्न चाहन्छु।’
दुलालले ट्राफिक प्रहरीसँगको विवादका क्रममा चालकले आफूलाई थप दबाब दिइएमा आफ्नो लास हुने चेतावनी दिएको दाबी गरे। उक्त कुरा सम्बन्धित व्यक्तिमार्फत ट्राफिक प्रहरी तथा राज्यसम्म पुगे पनि समयमै संवेदनशीलता नदेखाइएको उनको आरोप थियो।
‘राज्यले सुन्यो, तर विवेक गुमायो, संवेदनशीलता गुमायो र यो उद्घोष गर्ने युवा मर्छ कि मर्दैन भनेर लामो समय राज्य कुरेर बस्यो र अन्ततः उनको शरीरमाथि आगलागी भयो,’ उनले भने।
उनले घटनालाई चालकको उत्तेजना वा आवेगको घटनाका रूपमा मात्रै लिन नहुने बताए। यसले राज्यप्रति नागरिकको निराशा र रोजगारीमा रहेका युवाको पीडा समेत अभिव्यक्त गरेको उनको भनाइ थियो।
‘यो घटना केवल एउटा चालकको उत्तेजना अथवा आवेगको घटना मात्रै होइन, यसले सिङ्गो सरकारप्रति, राज्यप्रति नागरिकको निराशा, लाखौँ बेरोजगार र यस्तै रोजगारीमा रहेका युवाहरूको पीडा अभिव्यक्त गर्छ,’ उनले भने।
दुलालले ट्राफिक प्रहरी र चालकबीचको विवाद तथा नियमनकारी निकायको व्यवहारमाथि समेत प्रश्न उठाए। उनले गृहमन्त्रीलाई नेपाल प्रहरीअन्तर्गतको ट्राफिक प्रहरी बलको जिम्मेवारीबारे प्रश्न गर्दै सरकार नागरिकप्रति संवेदनशील हुनुपर्ने बताए।
त्यस्तै, उनले ठूला सवारीको चालक अनुमतिपत्रसम्बन्धी व्यवस्थामा पुनरावलोकन गर्नुपर्ने बताए। साना सवारीको लाइसेन्स नलिई ठूला सवारीको लाइसेन्स लिन नपाउने व्यवस्थाले क्षमता र योग्यता भएका व्यक्तिलाई समेत समस्या परेको उनको भनाइ थियो।
उनले सुरक्षित र व्यवस्थित सडक पूर्वाधार निर्माण तथा नियमनकारी निकायलाई मर्यादित र अनुशासित बनाउन सरकारको ध्यानाकर्षण गराए।
सार्वजनिक यातायातमा कार्यरत चालक तथा सहचालकको जीवन र भविष्य सुरक्षित नगरी व्यवस्थित सार्वजनिक यातायातको परिकल्पना गर्न नसकिने दुलालले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790071578.png)
-1786602170.png)
-1789631269.jpg)
