काठमाडौं– सर्वोच्च अदालतले जोखिमपूर्ण अवस्था नरहेको अवस्थामा पक्राउ परेका व्यक्तिलाई हत्कडी नलगाउन प्रहरीका नाममा आदेश जारी गरेको छ ।
न्यायाधीश डा. नहकुल सुवेदी र शान्तिसिंह थापाको इजलासले पक्राउ परेका व्यक्ति भाग्ने जोखिममा रहेको, हिंसात्मक व्यवहार गरेको वा आफू तथा अरूलाई क्षति पुर्याउन सक्ने अवस्था रहेको वस्तुनिष्ठ रूपमा देखिएमा मात्रै आवश्यकताअनुसार हत्कडी लगाउन सकिने आदेश दिएको हो ।
सर्वोच्चले हत्कडी लगाउनैपर्ने अपरिहार्य परिस्थिति देखिएमा त्यसको कारण र प्रयोगको अभिलेखसमेत राख्न प्रहरीलाई भनेको छ ।
पक्राउ पर्नेबित्तिकै सबैलाई हत्कडी लगाउने अभ्यास संवैधानिक तथा कानुनी व्यवस्थाको मर्मअनुकूल नभएको सर्वोच्चको आदेशमा उल्लेख छ ।
प्रहरी ऐन, २०१२ र मुलुकी फौजदारी कार्यविधि संहिता, २०७४ ले पक्राउ परेको व्यक्ति भाग्न खोजेमा वा जोरजुलुम गरेमा नियन्त्रणमा लिन आवश्यक बल प्रयोग गर्न सकिने व्यवस्था गरेको छ । यही व्यवस्थाको आधारमा प्रहरीले पक्राउ परेकालाई हत्कडी लगाउने अभ्यास गर्दै आएको थियो ।
हत्कडीको गैरकानुनी प्रयोग भएको दाबी गर्दै विवेक चौधरी, रोशन आउजा र विकास यादवले सर्वोच्चमा रिट निवेदन दिएका थिए । सो रिटको अन्तिम टुंगो नलागेसम्म मनमौजी रूपमा हत्कडी नलगाउन सर्वोच्चले अन्तरिम आदेश दिएको हो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821309.webp)
-1789993953.png)
-1789992067.jpeg)
-1786602170.png)
-1789631269.jpg)
