काठमाडौं– नेपाली सेनाका पूर्व प्रधानसेनापति गौरव शमशेर जङ्गबहादुर राणा संयुक्त अधिराज्य (यूके) का लागि नेपालको राजदूतमा सिफारिस भएका छन् ।
मन्त्रिपरिषद्को यो निर्णयसँगै नेपाल र बेलायतबीचको ऐतिहासिक एवं कूटनीतिक सम्बन्धलाई थप उचाइमा पुर्याउन उनको सिफारिसलाई महत्त्वका साथ हेरिएको छ।
राणाले नेपाली सेनामा चार दशकभन्दा बढी सेवा गरी प्रधानसेनापति (२०१२-२०१५) का रूपमा आफ्नो कार्यकाल पूरा गरेका थिए । उनले विस्तृत शान्ति सम्झौताअनुसार पूर्वमाओवादी लडाकुहरूलाई नेपाली सेनामा समायोजन गर्ने कार्यको निर्देशन दिएका थिए ।
नेपालको संघीय लोकतान्त्रिक गणतन्त्रमा रूपान्तरणको समयमा सेनाको नेतृत्व गरेको अनुभव उनीसँग छ । उनले सेनाको ‘१० वर्षे दीर्घकालीन योजना तथा सैन्य सिद्धान्त २०१३’ लागू गरेका थिए।
प्रधानसेनापतिको रूपमा उनले सन् २०१५ को भूकम्पपछि नेपालको सैन्य उद्धार कार्य ‘अपरेशन संकट मोचन’को नेतृत्व गर्दै राहत कार्यमा १८ वटा विदेशी सैन्य टोलीको सहभागिताको समन्वय गरेका थिए । उनले पाकिस्तानको कायदे-आजम युनिभर्सिटीबाट रक्षा तथा रणनीतिक अध्ययनमा स्नातकोत्तर र त्रिभुवन विश्वविद्यालयबाट इतिहास तथा राजनीतिशास्त्रमा स्नातक गरेका छन् ।
राणा रोयल मिलिटरी एकेडेमी स्यान्डहर्स्ट (यूके), युएस आर्मी कमान्ड एण्ड जनरल स्टाफ कलेज (फोर्ट लिभनवर्थ) र पाकिस्तानको नेशनल डिफेन्स युनिभर्सिटीका स्नातक हुन् । उनी हाल कन्जर्भेसन एलायन्स नेपालको अध्यक्ष छन् र हार्भरर्ड युनिभर्सिटी, इन्टरनेशनल इन्स्टिच्युट फर स्ट्र्याटेजिक स्टडिज (लन्डन) तथा संयुक्त राष्ट्रसंघको पहिलो डिफेन्स चीफ्स कन्फरेन्सजस्ता संस्थाहरूमा नियमित वक्ताका रूपमा सहभागी हुँदै आएका छन् ।
नेपाल-बेलायत सम्बन्धमा सैन्य कूटनीतिको ठूलो प्रभाव रहने भएकाले उनको पृष्ठभूमि यूकेका लागि अनुकूल मान्न सकिन्छ । नेपाल र बेलायतबीच दुई शताब्दीभन्दा पुरानो द्विपक्षीय सम्बन्ध छ । विशेषगरी गोर्खा सैनिकहरूको मुद्दा, रक्षा सहयोग र बेलायतले नेपालको विकासमा पुर्याउँदै आएको सहयोगका सन्दर्भमा सैन्य पृष्ठभूमिको उच्च कूटनीतिज्ञ हुनुको फाइदा पुग्न सक्छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789732040.png)
-1786602170.png)
-1789631269.jpg)
