काठमाडौं– नेपाली कांग्रेसले १५ औं महाधिवेशन निर्वाचन निर्देशिका जारी गरेको छ।
कांग्रेसले असोज ३ र ४ गते वडा अधिवेशन गर्दैछ। त्यसपछि तहगत अधिवेशन गर्दै असोज १६ देखि १९ गतेसम्म केन्द्रीय महाधिवेशन हुनेछ।
सोही अधिवेशनका लागि कांग्रेसले आज निर्देशिका जारी गरेको हो।
निर्देशिकाले उम्मेदवारहरूका लागि आचारसंहिता लागू गरेको छ। निर्वाचनको स्वच्छता कायम राख्न प्रचार–प्रसारका क्रममा जुलुस, कोणसभा वा अन्य कार्यक्रम गर्दा मर्यादित र अनुशासित हुनुपर्ने प्रावधान राखिएको छ।
उम्मेदवारले आफ्नो नाम वा चुनाव चिह्न अङ्कित टोपी, भेस्ट, ज्याकेट, मास्क वा अन्य प्रचार सामग्रीको प्रयोग गर्न पाउने छैनन्। त्यस्तै, सार्वजनिक स्थलमा होहल्ला गर्न, सवारी साधनको दुरुपयोग गर्न र बालबालिकालाई निर्वाचनसम्बन्धी गतिविधिमा सहभागी गराउन निषेध गरिएको छ।
यसपटकको महाधिवेशनमा निर्वाचन प्रक्रियालाई थप प्रविधिमैत्री बनाइएको छ। उम्मेदवारी दर्ता गर्दा लाग्ने शुल्क भुक्तानीका लागि क्यूआर कोडको व्यवस्था गरिएको छ ।
साथै, निर्वाचन परिणाम वेबसाइटमा इन्ट्री गर्ने र डिजिटल माध्यमबाट मतदाता नामावली सच्याउनेलगायतका व्यवस्थाले प्रक्रियालाई छिटो र पारदर्शी बनाउने विश्वास गरिएको छ।
निर्देशिकामा नेपालको संविधान र पार्टी विधानअनुसार समावेशी प्रतिनिधित्वलाई प्राथमिकता दिइएको छ। अनुसूची–२४ मा उल्लेखित दलित, आदिवासी जनजाति, खस–आर्य, मधेसी, थारु र मुस्लिम समुदायको प्रतिशतलाई ध्यानमा राख्दै पार्टीका विभिन्न तहमा समावेशी सिट सुनिश्चित गरिएको छ।
पिछडिएको क्षेत्र (हुम्ला, जुम्ला, कालिकोट, मुगु, डोल्पा, पश्चिम रुकुम, सल्यान, दैलेख, सुर्खेत, जाजरकोट, बाजुरा, बझाङ र अछाम) लाई समेत प्रतिनिधित्वको विशेष व्यवस्था गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789383080.png)
