काठमाडौं– बंगलादेश क्रिकेट बोर्ड (बीसीबी) ले सन् २०२७ भित्र नेपालसँग द्विपक्षीय सिरिज खेल्ने तयारी अघि बढाएको जनाएको छ।
नेपाल क्रिकेट संघ (क्यान) ले आफ्नै घरेलु मैदानमा सिरिज खेल्न गरेको प्रस्तावपछि बीसीबीले यस विषयमा सकारात्मक रूपमा छलफल अघि बढाएको हो।
बीसीबीका क्रिकेट सञ्चालन प्रमुख शाह्रियार नफिसले शनिबार पत्रकारहरूसँग कुरा गर्दै नेपाल क्रिकेट संघबाट केही समयअघि नै द्विपक्षीय शृंखला खेल्न प्रस्ताव आएको बताए।
‘क्यानले केही समयअघि नै बंगलादेशसँग द्विपक्षीय सिरिज खेल्ने इच्छा व्यक्त गर्दै प्रस्ताव पठाएको थियो। बीसीबीले उक्त निमन्त्रणालाई निकै सकारात्मक रूपमा लिएको छ,’ नफिसले भने।
उनका अनुसार अहिले बीसीबी र क्यानबीच सिरिज आयोजनाको सम्भावनाबारे छलफल भइरहेको छ। नफिसले नेपालसँग सिरिज खेल्ने विषयमा हालसम्म सकारात्मक छलफल भइरहेको पुष्टि गरे पनि निश्चित मिति भने तय भइनसकेको स्पष्ट पारे।
बंगलादेशको आगामी क्रिकेट तालिका व्यस्त रहेकाले उपयुक्त समय मिलाउन चुनौती भए पनि सन् २०२७ सम्मको वर्तमान फ्युचर टुर्स प्रोग्राम (एफटीपी) चक्रभित्रै सिरिज आयोजना गर्ने प्रयास भइरहेको उनले बताए।
‘हाम्रो एफटीपी निकै व्यस्त छ। त्यसका बाबजुद यो चक्रभित्र उपयुक्त समय मिलाउन सकिएमा सिरिज आयोजना गर्ने प्रयास गरिरहेका छौं। सबै कुरा मिल्यो भने यो सिरिज हुन सक्छ,’ उनले भने।
उनले भनेका छन्,‘यो चक्र सन् २०२७ सम्मको हो। हामी यही चक्रभित्र सिरिज आयोजना गर्ने इच्छामा छौं। क्यानबाट पनि त्यही अनुरोध आएको छ। त्यसैले हामी सकारात्मक रूपमा काम गरिरहेका छौं,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789383080.png)
