काठमाडौं– नेपाली कांग्रेसमा १५औँ महाधिवेशनको विवाद थप चर्किँदै गएको छ। महाधिवेशन तयारी समितिका संयोजक डा. शशांक कोइरालाले पार्टीभित्रको असहमति समाधान गर्ने नाममा पद बाँडफाँड र सौदाबाजी स्वीकार्य नहुने बताएका छन्।
सोमबार पत्रकार सम्मेलन गर्दै कोइरालाले कांग्रेसका नेता–कार्यकर्ताको आत्मसम्मान कुनै पदको लेनदेनको विषय बन्न नसक्ने स्पष्ट पारे।
उनले निश्चित सर्त स्वीकार गरेपछि मात्रै पद व्यवस्थापन गर्ने वा राजनीतिक सहमतिका नाममा पद बाँडफाँडलाई समाधानको आधार बनाउने प्रवृत्तिले कांग्रेसको लोकतान्त्रिक संस्कार र गौरवशाली इतिहास कमजोर पार्ने बताए।
पार्टीको आधिकारिकतासम्बन्धी विषय सर्वोच्च अदालतमा विचाराधीन रहेको अवस्थामा अधिवेशन र महाधिवेशनको कार्यतालिका एकतर्फी रूपमा अघि बढाउनु उचित नभएको कोइरालाको भनाइ छ।
उनले विशेष महाधिवेशन पक्षधरले वार्ता र संवादमार्फत सहमतिको वातावरण बनाउनुपर्ने अथवा सर्वोच्च अदालतको निर्णय पर्खनुपर्ने बताए।
कोइरालाले पार्टीको अधिवेशन तथा महाधिवेशन स्थगित गरेर सहमतिमा पुग्ने प्रयास नगरी एकतर्फी रूपमा प्रक्रिया अघि बढाउने कदमलाई आफूहरूले स्वीकार गर्न नसक्ने बताए।
कांग्रेसभित्रको विवाद कुनै व्यक्ति वा पदको मात्र विषय नभएको भन्दै कोइरालाले यसलाई पार्टीको वैधानिकता, लोकतान्त्रिक संस्कार, संगठनात्मक एकता र भविष्यसँग जोडिएको गम्भीर राजनीतिक प्रश्नका रूपमा व्याख्या गरे।
उनका अनुसार आफूहरूले सुरुदेखि नै सहमति, सहकार्य र एकताका आधारमा १५औँ महाधिवेशन सम्पन्न गर्न पहल गर्दै आएका थिए। पार्टीलाई विभाजनतर्फ लैजाने कदम रोक्न र संवादमार्फत समाधान खोज्न पटक–पटक आग्रह गरे पनि त्यसलाई सकारात्मक रूपमा नलिइएको उनले बताए।
विशेष महाधिवेशनबाट बनेको नेतृत्वले अघि बढाउने अधिवेशन र महाधिवेशनले पार्टीलाई एकताबद्ध बनाउनेभन्दा विभाजनलाई संस्थागत गर्ने खतरा रहेको कोइरालाले दाबी गरे।
कोइरालाले विशेष महाधिवेशन पक्षधरले असोज ३ गतेदेखि सुरु गर्ने भनिएको अधिवेशन तथा महाधिवेशन प्रक्रियामा सहभागी नहुन नेता–कार्यकर्तालाई आग्रह गरेका छन्।
उनले १४औँ महाधिवेशनबाट निर्वाचित वैधानिक नेतृत्वले सार्वजनिक गरेको कार्यतालिकाअनुसार हुने वडा तथा विभिन्न तहका अधिवेशनमा सहभागी हुन आग्रह गरे।
कोइरालाका अनुसार उक्त कार्यतालिकाअनुसार असोज १५ गतेदेखि वडा हुँदै विभिन्न तहका अधिवेशन सुरु हुने र मंसिर २१, २२ र २३ गते केन्द्रीय महाधिवेशन सम्पन्न हुनेछ।
कांग्रेसको वर्तमान विवादले पार्टीको आन्तरिक शक्ति संघर्ष मात्र नभई लोकतान्त्रिक चरित्र र भविष्यसमेत प्रभावित गर्ने भन्दै उनले नेता–कार्यकर्तालाई भ्रमपूर्ण तथा गैरजिम्मेवार राजनीतिक प्रचारबाट प्रभावित नहुन आग्रह गरे।
‘कांग्रेसको शक्ति यसको इतिहास, विचार, लोकतान्त्रिक चरित्र र कार्यकर्ताको निष्ठामा छ,’ कोइरालाको भनाइ थियो, ‘विधि, विधान, वैधानिकता र एकताको बाटोबाट मात्रै पार्टीलाई पुनः सशक्त र नागरिकको भरोसाको केन्द्र बनाउन सकिन्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
