काठमाडौं– सरकारले प्रधानमन्त्री बालेन्द्र शाहको नेतृत्वमा संयुक्त राष्ट्रसंघको ८१औँ महासभामा सहभागी हुने नेपाली प्रतिनिधिमण्डलको भ्रमण स्वीकृत गरेको छ। बिहीबार बसेको मन्त्रिपरिषद् बैठकले प्रधानमन्त्रीको अमेरिका भ्रमणसँगै मिटरब्याज अपराध नियन्त्रणसम्बन्धी विधेयक तर्जुमा गर्न सैद्धान्तिक स्वीकृति दिने लगायतका निर्णय गरेको छ।
सरकारका प्रवक्ता तथा शिक्षामन्त्री सस्मित पोखरेलले मन्त्रिपरिषद्का निर्णय सार्वजनिक गर्दै विभिन्न निर्णयबारे जानकारी दिएका हुन्।
मन्त्रिपरिषद्का प्रमुख निर्णय :
–प्रधानमन्त्रीको अमेरिका भ्रमण स्वीकृत : संयुक्त राष्ट्रसंघको ८१औँ महासभामा सहभागी हुन प्रधानमन्त्री बालेन्द्र शाहको नेतृत्वमा नेपाली प्रतिनिधिमण्डल अमेरिका जाने भएको छ। असोज ६ देखि १० गतेसम्म हुने महासभामा सहभागी हुने प्रतिनिधिमण्डलको भ्रमण मन्त्रिपरिषद्ले स्वीकृत गरेको हो।
–मिटरब्याज अपराध नियन्त्रणसम्बन्धी विधेयक ल्याउने : गृह मन्त्रालयको प्रस्तावमा अनुचित लेनदेन अर्थात् मिटरब्याज अपराध नियन्त्रणसम्बन्धी विधेयक तर्जुमा गर्न सरकारले सैद्धान्तिक स्वीकृति दिएको छ। यससँगै मिटरब्याजबाट पीडित नागरिकलाई न्याय दिलाउन आवश्यक कानुनी व्यवस्था निर्माण गर्ने बाटो खुलेको छ।
–शिक्षक सेवा आयोगमा पदाधिकारी नियुक्त : सरकारले शिक्षक सेवा आयोगको अध्यक्षमा भक्तपुरका डा. हरिप्रसाद लम्साललाई नियुक्त गरेको छ। सदस्यमा मकवानपुरका रामशरण सापकोटा र महिला सदस्यमा काठमाडौंकी विष्णु घिमिरे (रिमाल) लाई नियुक्त गर्ने निर्णय भएको छ।
–दुई सहसचिव सचिवमा बढुवा : लोकसेवा आयोगको सिफारिसमा वरिष्ठताका आधारमा विनोदबहादुर कुँवर र उत्तरकुमार खत्रीलाई नेपाल सरकारको सचिव पदमा बढुवा गरिएको छ।
–प्रदेश प्रमुख सचिवमा पदस्थापन : सचिवमा बढुवा भएका कुँवरलाई लुम्बिनी प्रदेश र खत्रीलाई सुदूरपश्चिम प्रदेशको प्रमुख सचिवमा पदस्थापन गर्ने निर्णय गरिएको छ।
–भारतसँगको आईजीएससी बैठकका लागि वार्ताटोली गठन : भारतको नयाँ दिल्लीमा हुने नेपाल–भारत अन्तरसरकारी उपसमिति (आईजीएससी) को बैठकमा सहभागी हुन नेपाली वार्ताटोली गठन गर्ने निर्णय भएको छ। बैठकमा नेपाल–भारतबीचका व्यापार तथा वाणिज्यसम्बन्धी विषयमा छलफल हुने बताइएको छ।
–पाँच जिल्लाका गरिब परिवारको सूची स्वीकृत : काठमाडौं, भक्तपुर, ललितपुर, सप्तरी र दाङका २७ स्थानीय तहका १७ हजार ४३८ गरिब घरपरिवारको सूची स्वीकृत गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
