काठमाडौं– विपक्षी दलहरूको बैठकले भोटोकोशी बाढीबाट प्रभावित क्षेत्रमा अहिलेसम्म भए गरेका कामको विषयमा सरकारको ध्यानाकर्षण गराउने निर्णय गरेको छ ।
प्रमुख प्रतिपक्ष दल नेपाली कांग्रेसले बिहीबार सिंहदरबारमा बोलाएको विपक्षी दलहरूको बैठकले यस विषयमा सरकारको ध्यानाकर्षण गराउने निर्णय भएको हो ।
सिंहदरबारस्थित कांग्रेस संसदीय दलको बैठकमा बसेको बैठकले रसुवा बाढीमा उद्धार, खोज तथा पुन:स्थापनाका विषयमा निगरानी गर्नका लागि संसदीय विशेष समिति बनाउन माग गर्ने बैठकले निर्णय गरेको नेकपा एमालेकी उपनेता पद्मा अर्यालले बताइन्।
‘बाढी लगत्तै बसेको सर्वदलीय बैठकमा हामीले रास्वपा सभापति रवि लामिछानेसँग बाढीपछि उद्धार, खोज तथा पुन:स्थापनाका विषयमा सरकारले गरेका कामलाई निगरानी गर्न संसदीय विशेष समिति बनाउनुपर्ने माग गरेका थियौँ। त्यो अझै गठन भएको छ। फेरि उक्त समिति गठन गर्न माग गर्ने निर्णय हामीले गरेका छौँ’, अर्यालले बैठकपछि सञ्चारकर्मीसँग भनिन्।
यस्तै बैठकले बाढीपीडितहरू होल्डिङ सेन्टरमा बस्न नसक्ने भन्दै छिटो अस्थायी पुन: स्थापनाका लागि सरकारको ध्यानाकर्षण गराउने निर्णय गरेको छ।
बैठकले हालसम्म उद्धार तथा खोजीमा खटिएका निकायहरू र भएका कामलाई धन्यवाद दिदै पूर्वतयारी र सुरुआती चरणमा पर्याप्त सल्लाह–परामर्श एवं समन्वय नहुँदा केही कमीकमजोरी देखिएको निष्कर्ष निकालेको अर्यालले जानकारी दिइन् ।
उनले जनताको धैर्यता टुट्न नदिन सरकारले तत्काल अस्थायी पुनर्स्थापनाको काम तीव्र गतिमा अगाडि बढाउनुपर्नेमा जोड दिएको उल्लेख गरिन् ।
राष्ट्रिय विपत्तिको घडीमा दलीय राजनीतिक स्वार्थ र एजेन्डाहरूलाई पूर्ण रूपमा पन्छाएर सरकारसँग हातेमालो गर्ने प्रतिपक्षी दलहरूको साझा प्रतिबद्धता रहेको उनको भनाइ छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
