काठमाडौं– नेपाली कांग्रेसका निवर्तमान सभापति शेरबहादुर देउवाले पार्टीभित्र देखिएको असन्तुष्टि र आन्तरिक विवाद समाधानका लागि आफू संवाद र छलफलमार्फत अघि बढ्न तयार रहेको बताएका छन्।
नेपाली कांग्रेस भक्तपुरले बुधबार आयोजना गरेको कार्यक्रममा देउवाले लोकतान्त्रिक पार्टीमा आन्तरिक बहस, फरक मत र असन्तुष्टि हुनु स्वाभाविक भए पनि त्यसलाई विवादका रूपमा लम्ब्याउन नहुने बताए।
‘म सबैको कुरा सुन्न तयार छु। पार्टीभित्रको विवाद समाधान गर्न सम्बन्धित पक्षसँग छलफल गर्छु। आन्तरिक समस्यालाई पार्टीभित्रै बसेर संवाद र सहमतिमार्फत टुङ्ग्याउनुपर्छ,’ देउवाले भने।
उनले पार्टीलाई एकताबद्ध र थप सशक्त बनाएर अघि बढाउनु अहिलेको आवश्यकता रहेको बताए। आन्तरिक मतभेदले पार्टीलाई कमजोर बनाउने भन्दै उनले कार्यकर्तालाई संयमित भएर अघि बढ्न आग्रह गरे।
देउवाले कांग्रेसका नेता तथा कार्यकर्ताको भावना बुझेर अघि बढ्ने प्रतिबद्धता जनाउँदै विवादबाट कसैलाई फाइदा नहुने बताए। ‘पार्टीभित्र सानातिना मतभेद हुनु सामान्य हो। तर त्यसलाई लिएर विवाद गरिरहनु हुँदैन। हाम्रो साझा उद्देश्य कांग्रेसलाई बलियो बनाउनु हो,’ उनले भने।
लोकतान्त्रिक पार्टीमा मतभेदलाई व्यवस्थापन गर्दै अघि बढ्नु नै पार्टीको शक्ति भएको उल्लेख गर्दै देउवाले आन्तरिक समस्या छिट्टै समाधान गरी कांग्रेसलाई थप सुदृढ बनाउने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
