काठमाडौं– नेपाली कांग्रेसले १५औँ केन्द्रीय महाधिवेशनको पूर्वनिर्धारित मिति परिवर्तन नगरी तल्लो तहको अधिवेशनको निर्वाचन तालिका भने परिमार्जन गरेको छ । कांग्रेस निर्वाचन समितिको आज बसेको बैठकले असोज १६ देखि १९ गतेसम्म केन्द्रीय महाधिवेशन सम्पन्न गर्ने गरी पहिलो चरणको निर्वाचन कार्यक्रम सार्वजनिक गरेको हो।
भदौ १० गते भोटेकोशी नदीमा आएको बाढीबाट भएको ठूलो जनधनको क्षति तथा त्यसबाट देशभर परेको प्रभावलाई ध्यानमा राख्दै विभिन्न जिल्ला तथा क्षेत्रबाट प्राप्त सुझावमाथि छलफल गरेपछि समितिले पूर्वनिर्धारित महाधिवेशन तालिकालाई निरन्तरता दिने निर्णय गरेको हो।
निर्वाचन समितिका अनुसार महाधिवेशनको वैधानिक दायित्व पूरा गर्न पहिलो चरणमा वडा, गाउँ–नगर तथा प्रदेश सभा र प्रतिनिधि सभा निर्वाचन क्षेत्रीय अधिवेशनको तालिका तय गरिएको छ।
सार्वजनिक तालिकाअनुसार तत्लो तहका अधिवेशन अब असोज ३ र ४ गते देशभरका ६ हजार ७४३ वडामा वडा अधिवेशन हुनेछ। सो क्रममा वडा कार्यसमितिको निर्वाचनसँगै क्षेत्रीय प्रतिनिधिसमेत चयन गरिनेछ।
त्यसपछि असोज ७ गते गाउँपालिका तथा नगरपालिका अधिवेशन आयोजना गरिनेछ। यस्तै प्रदेश सभा निर्वाचन क्षेत्रीय अधिवेशन र प्रतिनिधि सभा निर्वाचन क्षेत्रीय अधिवेशन असोज १० गते गर्ने गरी मिति निर्धारण गरिएको छ।
कांग्रेसको केन्द्रीय महाधिवेशन भने असोज १६ देखि १९ गतेसम्म काठमाडौंमा सम्पन्न गर्ने पूर्वनिर्धारित कार्यक्रमलाई नै कायम राखिएको छ। जिल्ला अधिवेशन र प्रदेश अधिवेशनको विस्तृत समयतालिका भने दोस्रो चरणमा सार्वजनिक गरिने निर्वाचन समितिले जनाएको छ।
बाढीबाट बढी प्रभावित रसुवा, नुवाकोट र धादिङ जिल्लामा भने तोकिएका निर्वाचन अधिकृत र पार्टीका स्थानीय तहबीच समन्वय गरी अधिवेशन सम्पन्न गरिने भएको छ। प्रभावित जिल्लाको अवस्थालाई ध्यानमा राखेर स्थानीय परिस्थिति र आवश्यकताअनुसार निर्वाचन प्रक्रिया अघि बढाइने कांग्रेसले जनाएको छ।
त्यस्तै, नेपाली जनसम्पर्क समितिअन्तर्गत बाँकी रहेका देशका अधिवेशनहरू असोज १० गतेभित्र सम्पन्न गर्ने निर्णय गरिएको छ। कांग्रेस निर्वाचन समितिले पार्टीका सबै तह र निकायलाई निर्धारित तालिकाअनुसार अधिवेशनका कार्यक्रममा उत्साहपूर्ण सहभागिता जनाउन अनुरोध गरेको छ।
भोटेकोशी बाढीबाट सिर्जित विपत्तिका कारण देश शोकमा रहेको अवस्थामा अधिवेशन प्रक्रिया अघि बढाउनुपर्ने चुनौती रहे पनि पार्टीको वैधानिक दायित्वलाई मध्यनजर गर्दै महाधिवेशनको पूर्वनिर्धारित मिति कायम राखिएको कांग्रेसको भनाइ छ।
यससँगै कांग्रेसले १५औँ केन्द्रीय महाधिवेशन असोज १६ देखि १९ गतेसम्म नै गर्ने निर्णयलाई निरन्तरता दिएको छ। यता संस्थापन इतर पक्षले पनि मंसिरमा निर्वाचन तालिका सार्वजनिक गरेको छ ।
-1788866808.png)
-1788866808.png)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1788425345.png)
