काठमाडौं– पृथ्वी राजमार्गअन्तर्गत कृष्णभिरमा गएको पहिरोले मुख्य सडक अवरुद्ध भएपछि काठमाडौँ उपत्यकामा खाना पकाउने एलपी ग्यासको आपूर्ति प्रणालीमा गम्भीर असर परेको छ ।
मुख्य मार्ग ठप्प भएपछि उद्योगीहरूले त्रिभुवन राजपथ जस्ता असहज र घुमाउरो वैकल्पिक मार्गबाट ग्यास ढुवानी गर्न बाध्य हुनुपरेको छ, जसका कारण बजारको मागअनुसार पर्याप्त परिमाणमा ग्यास भित्र्याउन सकिएको छैन ।
ढुवानीमा देखिएको यही असहजताका कारण मंगलबार उपत्यकामा ९ वटा विभिन्न ग्यास कम्पनीहरूबाट जम्मा १८ हजार २ सय ५९ वटा सिलिन्डर मात्र डिलरहरूसम्म पुग्न सकेका छन् ।
एलपी ग्यास उद्योग संघका अध्यक्ष दिवान चन्दका अनुसार पछिल्ला दिनहरूमा काठमाडौँ उपत्यकामा दैनिक १ लाख सिलिन्डर ग्यासको उच्च माग रहेको छ, यद्यपि सामान्य अवस्थामा भने दैनिक ३५ देखि ४० हजार सिलिन्डर उपभोग हुने गरेको थियो ।
नेपाल आयल निगमको एलपीजी विभागले उपलब्ध गराएको तथ्यांकअनुसार मंगलबार सबैभन्दा धेरै सगरमाथा ग्यासले ४ हजार ६ सय ९९ र एभरेस्ट ग्यासले ३ हजार ४ सय ७५ सिलिन्डर वितरण गरेका छन् ।
त्यसैगरी, सुगम ग्यासले २ हजार ४ सय २३, एसटीसी ग्यासले २ हजार १ सय ४६, श्री ग्यासले १ हजार ९ सय ६०, सीताश्री ब्रान्डले १ हजार ६ सय, श्रीमाया ग्यासले १ हजार २ सय ९१, श्रीराम ग्यासले ३६० र मनोज ग्यासले ३ सय ५ थान सिलिन्डर मात्र बजारमा पठाएका छन् ।
माग र आपूर्तिको यो विशाल खाडलका कारण उपत्यकावासी उपभोक्ताहरू ग्यास प्राप्त गर्नका लागि डिलर तथा ग्यास डिपोहरूमा दिनभर लाइन बस्न बाध्य बनेका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1788425345.png)
