काठमाडौं– सरकारले विपद्पछिको खोज तथा उद्धार कार्यका लागि अन्तर्राष्ट्रिय समुदायसँग अत्याधुनिक उपकरण र विशेष सामग्रीहरू माग गरेको छ।
भोटेकोशी बाढीले विध्वंस मच्चाएको तेह्रौँ दिनमा परराष्ट्र मन्त्रालयले सोमबार प्रभावित क्षेत्रमा उद्धार अभियानलाई तीव्रता दिन र जोखिम न्यूनीकरण गर्न उच्च प्राविधिक उपकरणहरूको सूची बनाएर सहयोगको अपिल गरेको हो।
मन्त्रालयले जारी गरेको विवरणअनुसार जलविद्युत आयोजनाका सुरुङभित्र फसेकाहरूको उद्धारका लागि बाक्लो लेदोका कारण मानिसको पहुँच पुग्न नसकेपछि विदेशी नियोग र मित्रराष्ट्रहरूसँग सहयोगको हात फैलाएको हो। सुरुङभित्रको अवस्था स्क्यानिङ गरी बेपत्ताको खोजी गर्न उच्च क्षमताका ड्रोन र लाइडरको माग गरिएको मन्त्रालयले जनाएको छ। बाक्लो लेदो र जलविद्युत् जलविB't आयोजनाको सुरुङमा पसेर सुरक्षित उद्धार गर्न प्रयोग गरिने विशेष पोसाक पनि माग गरिएको छ।
सरकारले डुबानमा परेका क्षेत्र र सुरुङभित्र जमेको पानी तथा लेदो तत्काल बाहिर फाल्न उच्च क्षमताका पम्प, बाढीले बगाएका पुलहरूको स्थानमा तत्काल जडान गरी सडक सञ्जाल सुचारु गर्न बेली ब्रिज, डीएनए परीक्षण किट र ल्याब फ्रिजर आदि पनि माग गरेको छ।
बाढी प्रभावित क्षेत्रमा फैलिन सक्ने सरुवा रोग र महामारी नियन्त्रणका लागि आवश्यक पर्ने चिकित्सकीय तथा स्वास्थ्य सामग्री पनि माग गरिएको छ।
सरकारले सुरुङभित्र फसेकाहरूको उद्धार गर्न नेपाली सेनाको समन्वयमा भारत, चीन, दक्षिण कोरिया, यूएई र मलेसियाका विशेष टनेल उद्धार टोली परिचालन गरिरहेको छ।
मन्त्रालयका अनुसार माथिल्लो त्रिशूली १, माथिल्लो त्रिशूली ३ ए, माथिल्लो त्रिशूली ३ बी, चिलिमे, रसुवागढी र लाङटाङ लगायतका प्रभावित जलविद्युत आयोजनाहरूमा उद्धार कार्यलाई निरन्तरता दिन थप उपकरण र प्राविधिक जनशक्ति परिचालन भइरहेकोमा थप उपकरण प्राप्त भए अझ सहज हुनेछ।
छिमेकी, मित्रराष्ट्र र अन्तर्राष्ट्रिय समुदायबाट प्राप्त उद्धार उपकरण, उच्च क्षमताका ड्रोन र भार बोक्ने सामग्रीहरू अहिले पनि प्रयोग भइरहेका छन्। तर पर्याप्त छैनन्।
बेपत्ता व्यक्तिहरूको खोजी र शवको पहिचानका लागि भारत, चीन, जापान, सिङ्गापुर र दक्षिण कोरियाका फरेन्सिक टोलीहरूले नेपाल प्रहरीसँग मिलेर डीएनए सङ्कलन र विश्लेषणको काममा खटिएका छन्। विपद् प्रतिकार्य प्रभावकारी बनाउन प्रधानमन्त्री वालेन्द्र शाह बालेन र परराष्ट्रमन्त्री शिशिर खनालले विश्वभरका समकक्षीहरूसँग निरन्तर टेलिफोन संवाद गरिरहेको र सोमबार माल्दिभ्सकी परराष्ट्रमन्त्री इरुथिशम आदमसँग संवाद भएको परराष्ट्र मन्त्रालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
