काठमाडौं– भोटेकोशी बाढी तथा त्यसबाट प्रभावित विभिन्न क्षेत्रमा आज पनि नेपाली सेनाले खोज तथा उद्धार, राहत, सडक तथा पुल सञ्चालन र आपत्कालीन स्वास्थ्य सेवाका कामलाई निरन्तरता दिएको छ।
देवीघाटमा पुल निर्माण तीव्र
नुवाकोटको विदुर नगरपालिका–५ देवीघाटस्थित तादी नदीमा नेपाली सेनाको इन्जिनियरिङ फौजले पुल निर्माणको काम तीव्र बनाएको छ। पुल निर्माणका लागि सेनाको ५५ जनाको टोली परिचालन गरिएको छ।
आज १३ जनाको हवाई उद्धार
नेपाली सेनाले आज दिनभर विभिन्न प्रभावित क्षेत्रबाट हवाई साधनमार्फत १३ जनाको उद्धार गरेको छ। हालसम्म हवाई साधनबाट उद्धार हुनेको संख्या ३ हजार ९७५ पुगेको छ। उद्धार गरिएकामध्ये ३ हजार ६९८ नेपाली र २७७ विदेशी रहेका छन्।
जलविद्युत आयोजनाका टनेलमा खोजी जारी
रसुवागढी जलविद्युत आयोजनामा Composite Quick Reaction Team तथा आयोजनाका प्रतिनिधिसहितको टोली पावरहाउस र कन्ट्रोल पोइन्टसम्म पुगेर खोजी गरेको छ।
त्रिशूली–३ ‘ए’ को पावरहाउस तथा टनेल क्षेत्रमा नेपाली सेनाको टोलीले उद्धार उपकरणसहित खोज तथा उद्धार कार्य जारी राखेको छ।
त्रिशूली–३ ‘बी’ मा अडिट–२ बाट प्रवेश गरेको टोली अडिट–१ बाट बाहिर निस्किएको छ। अडिट–२ टनेलबाट एक्स्काभेटर लैजान सक्ने गरी बाटो सफा गर्ने काम भइरहेको छ। हालसम्म त्यहाँबाट कुनै व्यक्ति फेला परेका छैनन्।
चिलिमे हाइड्रोमा विदेशीसहितको संयुक्त टोलीले मिनी एक्स्काभेटर र मड पम्प प्रयोग गरी टनेलभित्र जमेको लेदो हटाउने काम गरेको छ। हेलिकप्टरमार्फत स्याफ्रुबेँसी झारिएको एक्स्काभेटरलाई टनेल क्षेत्रमा लैजाने काम पनि भइरहेको छ।
माथिल्लो त्रिशूली–१ मा विदेशीसहितको टोलीले थर्मल क्यामेरामार्फत टनेलभित्र थप खोजी गरेको छ।
मैलुङदेखि स्याफ्रुबेँसीसम्म पैदल खोजी
प्रभावित क्षेत्रको मैलुङदेखि स्याफ्रुबेँसीसम्म नेपाली सेनाले पैदल गस्तीमार्फत खोज तथा उद्धार कार्य जारी राखेको छ।
यसैगरी, सेनाले त्रिशूली र धुन्चेमा स्थापना गरेका आपत्कालीन उपचार केन्द्र तथा मेडिकल पेट्रोलबाट हालसम्म ३ हजार २९८ जनाले स्वास्थ्य सेवा पाएका छन्।
९ हजारभन्दा बढी सैनिक परिचालन
रसुवाको टिमुरेदेखि नुवाकोट, धादिङ, चितवन र नवलपरासी पूर्वका प्रभावित क्षेत्रसम्म नेपाली सेनाका ९ हजार ३०० भन्दा बढी जनशक्ति प्रत्यक्ष रूपमा परिचालन भएका छन्।
सेनाले घाइते तथा प्रभावितको खोज तथा उद्धार, शव व्यवस्थापनमा सहयोग, राहत सामग्री ढुवानी, अवरुद्ध सडक तथा पुल सञ्चालन र आपत्कालीन उपचारलगायतका कामलाई निरन्तरता दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
