काठमाडौं– अविरल वर्षा, बाढी र पहिरोका कारण देशका विभिन्न जिल्लाका राजमार्ग तथा सडकखण्ड प्रभावित भएका छन्।
धादिङ, कालिकोट, मुगु, रोल्पा र रसुवाका सडकखण्ड पूर्ण रूपमा अवरुद्ध भएका छन् भने ललितपुर र धादिङका केही सडकखण्डमा एक लेनबाट यातायात सञ्चालन भइरहेको छ। काभ्रे–सिन्धुली र मकवानपुरका सडकमा भने सवारीसाधन सञ्चालनका लागि समय तथा मार्ग निर्धारण गरिएको नेपाल प्रहरी जनाएको छ।
काभ्रेपलाञ्चोक र सिन्धुली जोड्ने खुर्कोट–नेपालथोक–कटुन्जेबेँसी सडकखण्डमा भदौ १६ गतेदेखि राति ७ बजेदेखि बिहान ५ बजेसम्म १० टनसम्म तौल भएका मालवाहक तथा ढुवानीका साधन सञ्चालन हुनेछन्। निजी तथा सार्वजनिक यात्रुवाहक सवारीसाधन भने बिहान ४ बजेदेखि बेलुका ६ बजेसम्म सञ्चालन हुने प्रहरीले जनाएको छ।
मकवानपुरका विभिन्न राजमार्गमा १० चक्कासम्मका मालवाहक तथा ठूला यात्रुवाहक सवारीसाधन काठमाडौं जाँदा त्रिभुवन राजपथ र फर्किंदा कान्ति राजमार्ग प्रयोग गर्नुपर्ने व्यवस्था गरिएको छ। कान्ति राजमार्ग हुँदै हेटौंडातर्फ आउने यात्रुवाहक सवारीसाधनले साँझ ६ बजेसम्म इलाका प्रहरी कार्यालय ठिङ्गन चेकपोस्ट पार गरिसक्नुपर्नेछ।
१४ सिटभन्दा कम क्षमताका साना यात्रुवाहक सवारीसाधन हेटौंडातर्फ आउँदा फर्पिङ–फाखेल–कुलेखानी हुँदै भीमफेदी र काठमाडौं जाँदा भीमफेदी–कुलेखानी–सिस्नेरी–दक्षिणकाली मार्ग प्रयोग गर्न सक्नेछन्। त्रिखण्डी नजिकको बेलीब्रिजको भारवहन क्षमता कमजोर रहेकाले इन्धन तथा भारी मालवाहक सवारीसाधनले उक्त पुल प्रयोग नगरी सँगैको डाइभर्सन प्रयोग गर्नुपर्नेछ।
विपद्जन्य अवस्था रहेकाले अत्यावश्यक अवस्थामा मात्र यात्रा गर्न, आफ्नो पालोमा धैर्य र अनुशासनपूर्वक सवारी चलाउन, ओभरटेक नगर्न तथा ट्राफिक व्यवस्थापनमा खटिएका सुरक्षाकर्मी र ट्राफिक प्रहरीको निर्देशन पूर्ण रूपमा पालना गर्न आग्रह गरिएको छ।
नुवाकोटको टोखा–छहरे सडकखण्डमा वर्षाका कारण अत्यावश्यक सेवाबाहेक अन्य सार्वजनिक तथा निजी सवारीसाधनको रातिको आवतजावत बन्द गरिएको छ। भदौ १ गतेदेखि अर्को सूचना जारी नभएसम्म राति १० बजेदेखि बिहान ५ बजेसम्म उक्त सडकखण्डमा सवारीसाधन सञ्चालन गर्न रोक लगाइएको छ।
रसुवाको पासाङ ल्हामु राजमार्ग पूर्ण रूपमा अवरुद्ध छ। साउन ८ गते उत्तरगया गाउँपालिका–५ खाल्टेस्थित त्रिशूली–मैलुङ–स्याफ्रुबेँसी जाने कच्ची सडकखण्डमा त्रिशूली नदीले सडकमुनिबाट कटान गरेको थियो। त्यसपछि भदौ १० गते आएको बाढीका कारण सडकको अधिकांश भाग नष्ट भएको जनाइएको छ।
रसुवा र नुवाकोट हुँदै रसुवागढी नाकासम्म जाने मुख्य पासाङ ल्हामु राजमार्गको त्रिशूली नदी किनारको अधिकांश भाग कटान भएपछि राजमार्ग पूर्ण रूपमा अवरुद्ध भएको छ। स्याफ्रुबेँसीसम्म पुग्न काठमाडौं–टोखा–छहरे–विदुर–नुवाकोट दरबार–फलाँटे–चोकदे–लच्याङ–सरमथली–पार्च्याङ–भोर्ले–० किमि–कालिकास्थान–स्याउबारी–राम्चे–सोले–धुन्चे–स्याफ्रुबेँसी हुँदै जाने सिंगल लेनको कच्ची सडकलाई वैकल्पिक मार्गका रूपमा प्रयोग गर्न सकिने जनाइएको छ।
धादिङमा पृथ्वी लोकमार्गका विभिन्न स्थानमा सडक प्रभावित भएको छ। बेनिघाट रोराङ गाउँपालिका–७ कृष्णभीरमा भदौ१४ गते त्रिशूली नदीले सडक कटान गर्दा सडक भासिएपछि राजमार्ग पूर्ण रूपमा अवरुद्ध भएको थियो। गजुरी गाउँपालिका–२ परेवा भीरमा सोही दिन बाढीका कारण सडकको तल्लो भाग भासिए पनि एक लेनबाट यातायात सञ्चालन भइरहेको छ।
बेनिघाट रोराङ गाउँपालिका–१० ज्वाङखोलास्थित पृथ्वी लोकमार्गमा भदौ १६ गते बाढीका कारण सडकमा चिरा परेपछि एक लेनबाट यातायात सञ्चालन भइरहेको छ। यस्तै, गजुरी गाउँपालिका–२ चालिसेस्थित पृथ्वी लोकमार्गमा भदौ२० गते राति ११:४० बजे सडक माथिबाट सुक्खा पहिरो खसेपछि सडकखण्ड पूर्ण रूपमा अवरुद्ध भएको छ।
मुगुको छायानाथ रारा नगरपालिका–४ ताल्चास्थित नाग्मा–मुगु गमगढी सडकखण्ड पनि पूर्ण रूपमा अवरुद्ध छ। भदौ१६ गते साँझ ६:१५ बजे अविरल वर्षाका कारण माथिबाट ढुंगा, माटो र लेदोसहितको पहिरो आएपछि सडक अवरुद्ध भएको हो।
रोल्पाको परिवर्तन गाउँपालिका–३ भालखोरस्थित सहिद राजमार्ग सडकखण्डमा भदौ १७ गते रातिदेखि परेको अविरल वर्षाका कारण पहिरो खसेपछि सडक पूर्ण रूपमा अवरुद्ध भएको छ।
ललितपुरको बागमती गाउँपालिका–३ भट्टेडाँडा क्षेत्रमा पनि कान्तिलोकपथ प्रभावित भएको छ। भदौ २० गते साँझ ५:२० बजे टाकुर्चेस्थित सडक अविरल वर्षाका कारण भासिएपछि कान्तिलोकपथमा एक लेनबाट यातायात सञ्चालन भइरहेको छ।
कालिकोटको शुभकालिका गाउँपालिका–१ गगने खोलामा भदौ २० गते साँझ करिब ६:२० बजे सडक माथिबाट लेदोसहितको पहिरो आएपछि कर्णाली राजमार्ग पूर्ण रूपमा अवरुद्ध भएको जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790816682.webp)
-1786602170.png)
